ശബരിമല സര്‍വിസുകള്‍ തുണച്ചു, കാല്‍ നൂറ്റാണ്ടിന് ശേഷം കെ.എസ്.ആര്‍.ടി.സി സ്വന്തം വരുമാനത്തില്‍ നിന്ന് ജനുവരി മാസത്തെ ശമ്പളം നല്‍കുന്നു. 45.2 കോടി രൂപയാണ് ശബരിമല സീസണില്‍ ലഭിച്ചത്. മുന്‍വര്‍ഷത്തെക്കാള്‍ 30 കോടി രൂപയുടെ വര്‍ധന. ഇതാണ് 25 വര്‍ഷത്തിന് ശേഷം സ്വന്തം വരുമാനത്തില്‍നിന്ന് ശമ്പളം നല്‍കാനുള്ള സാഹചര്യമൊരുക്കിയതെന്ന് മാനേജ്മന്റെ് ചൂണ്ടിക്കാട്ടുന്നു. കഴിഞ്ഞമാസം വരെ 20 50 കോടി സര്‍ക്കാര്‍ ധനസഹായവും അതിന് മുമ്പ് 50 കോടി രൂപക്ക് മുകളില്‍ തുക ബാങ്ക് വായ്പയുമെടുത്താണ് കോര്‍പറേഷന്‍ ശമ്പളം നല്‍കിയത്. 31,270 സ്ഥിരം ജീവനക്കാരും 3926 എംപാനല്‍ താല്‍ക്കാലിക ജീവനക്കാരുമാണ് കെ.എസ്.ആര്‍.ടി.സിക്കുള്ളത്.
15,000 മുതല്‍ 1,50,000 രൂപ വരെ പ്രതിമാസം ശമ്പളമായി നല്‍കുന്നുണ്ട്. ഇവരെല്ലാം പൂര്‍ണമായും ജോലിക്ക് ഹാജരായാല്‍ മാസം 90 കോടി ശമ്പളം ഇനത്തില്‍ നല്‍കണം. 25 വര്‍ഷമായി തുടര്‍ന്നുവന്ന സിംഗിള്‍ ഡ്യൂട്ടി സംവിധാനം നിര്‍ത്തലാക്കിയതും ഗുണം ചെയ്‌തെന്നാണ് മാനേജ്മന്റെ് വിശദീകരിക്കുന്നത്. ആഴ്ചയില്‍ മൂന്ന് ദിവസം എന്നതിന് പകരം ആറ് ദിവസവും ജീവനക്കാര്‍ ഡ്യൂട്ടിക്ക് ഹാജരായി. പ്രതിദിനം 646 പേരുടെ മാനവവിഭവശേഷി ലാഭിക്കാനായതോടെ പ്രതിവര്‍ഷം 58.94 കോടി രൂപ ലാഭിക്കാന്‍ കഴിയുമെന്നാണ് പ്രതീക്ഷിക്കുന്നത്. ദിവസം വിവിധ അലവന്‍സിനത്തില്‍ 8.2 ലക്ഷം രൂപയുടെ ലാഭമാണ് ഉണ്ടായത്.

അദര്‍ ഡ്യൂട്ടിയിലുണ്ടായിരുന്ന 613 കണ്ടക്ടര്‍ ഡ്രൈവര്‍മാരെ സര്‍വിസില്‍ ഓപറേഷനായി മാറ്റിയതിലൂടെ 55.95 കോടി രൂപയുടെ ജോലിലാഭമുണ്ടായി. കഴിഞ്ഞവര്‍ഷം 69.62 കോടി ബസുകളിലെ പരസ്യ ഇനത്തില്‍ ലഭിച്ചിരുന്നത് ഇക്കുറി 189.98 കോടിയായി വര്‍ധിച്ചു. 64 മൊബൈല്‍ ടവറുകള്‍ സ്ഥാപിക്കുന്നതിനുള്ള വാടകയായി 24.5 കോടി രൂപ ലഭിച്ചു. ബസുകളില്‍ കൊറിയര്‍ സര്‍വിസ് നടപ്പാക്കിയപ്പോള്‍ 1.63 കോടി രൂപയാണ് വരുമാന ഇനത്തില്‍ ലഭിച്ചത്.