പാര്ട്ടി ഓഫീസില് റെയ്ഡ് വേണ്ടെന്ന് നിയമസഭയില് പറഞ്ഞ മുഖ്യമന്ത്രി പിണറായി വിജയന് ആര്.എസ്.എസ് കാര്യാലയത്തില് പരിശോധന നടത്താന് അനുമതി നല്കാന് മടിയുണ്ടായില്ല, മലപ്പുറത്ത് ഡി.സി.സി ഓഫീസിലും മുമ്പ് പൊലീസ് കയറി
പാര്ട്ടി ഓഫീസില് റെയ്ഡ് വേണ്ടെന്ന് നിയമസഭയില് പറഞ്ഞ മുഖ്യമന്ത്രി പിണറായി വിജയന് ആര്.എസ്.എസ് കാര്യാലയത്തില് പരിശോധന നടത്താന് അനുമതി നല്കാന് മടിയുണ്ടായില്ല. ശബരിമല കര്മസമിതി ഹര്ത്താലിനോട് അനുബന്ധിച്ച് നടത്തിയ അക്രമങ്ങളെ തുടര്ന്നാണ് നെടുമങ്ങാട് ആര്.എസ്.എസ് ജില്ലാ കാര്യാലയത്തില് പരിശോധന നടത്തിയത്. എന്നാല് തിരുവനന്തപുരം മെഡിക്കല് കോളജ് പൊലീസ് സ്റ്റേഷന് ആക്രമിച്ച പാര്ട്ടി പ്രവര്ത്തകരെ പിടികൂടാന് ഡി.സി.പി ചൈത്ര തെരേസാ ജോണ് തിരുവനന്തപുരം ജില്ലാ കമ്മിറ്റി ഓഫീസില് അര്ദ്ധരാത്രി പരിശോധന നടത്തിയതോടെയാണ് മുഖ്യമന്ത്രി നിലപാട് മാറ്റിയത്.
ഹര്ത്താലിനോട് അനുബന്ധിച്ച അക്രമം നടത്തിയവരെ പിടികൂടാനാണ് നെടുമങ്ങാട് ആര്.എസ്.എസ് കാര്യാലയത്തില് പൊലീസ് ജനുവരി എട്ടിന് പരിശോധന നടത്തിയത്. പരിശോധനയില് ആയുധങ്ങള് കണ്ടെടുത്തിരുന്നു. തിരുവനന്തപുരം ജില്ലാ കമ്മിറ്റി ഓഫീസില് പ്രതി ഒളിവിലുണ്ടെന്ന് അമ്മ മൊഴി നല്കിയതിന്റെ അടിസ്ഥാനത്തിലാണ് റെയ്ഡ് നടത്തിയത്. അതും കോടതിയുടെ അനുമതിയോടെ. എന്നും അതിനെതിരെ ആഭ്യന്തരവകുപ്പ് ഭരിക്കുന്ന മുഖ്യമന്ത്രി രംഗത്തെത്തിയത് അപലപനീയം തന്നെ. ഏത് പാര്ട്ടിയില് പെട്ടവര് അക്രമം നടത്തിയാലും പിടികൂടാനും അക്രമികള് എവിടെ ഒളിവില് കഴിഞ്ഞാലും പരിശോധന നടത്താനും പൊലീസിന് നിയമപരമായ അധികാരമുണ്ട്. അതിന്മേലുള്ള കടന്നുകയറ്റമാണ് മുഖ്യമന്ത്രി നിയമസഭയില് നടത്തിയത്.
റെയ്ഡ് തടയാന് ആദ്യമേ ചില പൊലീസുകാര് ഡി.സി.പിയെ നിരുത്സാഹപ്പെടുത്തിയെങ്കിലും അവര് വഴങ്ങിയില്ല. അതോടെ കൂടെയുള്ളവര് തന്നെ വിവരം ചോര്ത്തിക്കൊടുത്തു. തുടര്ന്ന് പ്രതികളെ പാര്ട്ടി ഓഫീസില് നിന്ന് മാറ്റുകയായിരുന്നു. ജനാധിപത്യസമൂഹത്തിന്റെ അടിസ്ഥാന ശിലകളില് ഒന്നാണ് രാഷ്ട്രീയപാര്ട്ടികള്ക്ക് സ്വതന്ത്രമായ പ്രവര്ത്തനം അനുവദിക്കുന്നത്. രാഷ്ട്രീയ പാര്ടികളുടെ നേതാക്കള് പോലീസുകാരുമായി അന്വേഷണത്തില് സഹകരിക്കുന്ന സ്ഥിതിയുമാണ് സംസ്ഥാനത്ത് പൊതുവില് നിലനില്ക്കുന്നതെന്നും മുഖ്യമന്ത്രി പറഞ്ഞു. നമ്മുടെ നാട്ടില് രാഷ്ട്രീയ പാര്ടികളുടെ ഓഫീസുകള് സാധാരണ രീതിയില് ഇത്തരം പരിശോധനയ്ക്ക് വിധേയമാക്കാറില്ല. പാര്ട്ടി ഓഫീസുകളുടെ പ്രവര്ത്തനം സുഗമമായി മുന്നോട്ടുകൊണ്ടുപോകുന്നതിന് സഹായകമായ സാഹചര്യം സൃഷ്ടിക്കുക എന്നത് ജനാധിപത്യ സമൂഹത്തിന്റെ മുന്നോട്ടുപോക്കിന് അനിവാര്യവുമാണ്. അതുകൊണ്ട് അത്തരം സ്ഥാപനങ്ങളെ സംരക്ഷിച്ചുകൊണ്ടുപോവുക എന്നത് പോലീസിന്റെ പൊതുവായ ചുമതല എന്ന നിലയിലാണ് ജനാധിപത്യസമൂഹം കണക്കാക്കാറുള്ളതെന്നും മുഖ്യമന്ത്രി നിലപാട് വ്യക്തമാക്കി.
കഴിഞ്ഞ ദിവസം സി.പി.എം തിരുവനന്തപുരം ജില്ലാ സെക്രട്ടറി ആനാവൂര് നാഗപ്പന് വാര്ത്താസമ്മേളനത്തില് പങ്കുവെച്ച ആശങ്ക ഇപ്രകാരമാണ്, ഇന്ന് ജില്ലാ കമ്മിറ്റി ഓഫീസ് നാളെ എ.കെ.ജി സെന്ററില് കയറി പരിശോധിക്കില്ലെന്ന് ആരറിഞ്ഞു. അതിനാല് ജില്ലാ നേതൃത്വം വലിയ ആശങ്കയിലാണെന്ന് വ്യക്തമാണ്. കോടതി അനുമതിയോടെ നടത്തിയ പരിശോധന പാര്ട്ടി ഭരണത്തിലിരിക്കുമ്പോള് നടന്നതിനാല് ഭാവിയില് മറ്റ് പൊലീസ് ഉദ്യോഗസ്ഥരും ഇത്തരത്തില് നീങ്ങിയേക്കാം. അത് വലിയ തലവേദന സൃഷ്ടിക്കും. അതിനാലാണ് സാധാരണ നമ്മുടെ നാട്ടില് പാര്ട്ടി ഓഫീസുകളില് പരിശോധന നടത്താത്തെന്ന് മുഖ്യമന്ത്രി പറഞ്ഞത്. എന്നാല് ജീവനക്കാരി കൊല്ലപ്പെട്ടതിനെ തുടര്ന്ന് മലപ്പുറം ഡി.സി.സി ഓഫീസില് പൊലീസ് പരിശോധന നടത്തിയിരുന്നു.
https://www.facebook.com/Malayalivartha
