യാത്രക്കായി സ്വകാര്യ ബസില്‍ കയറിയ വീട്ടമ്മയെ ഇന്റര്‍വ്യൂ ചെയ്യുകയും ദുരുദ്ദേശത്തോടെയുള്ള ആംഗ്യം കാണിക്കുകയും അസഭ്യം പറയുകയും ചെയ്ത സംഭവത്തില്‍ ബസ് കണ്ടക്ടര്‍ അറസ്റ്റില്‍. സംഭവം കേസായതോടെ ബസ് ഡ്രൈവര്‍ ഒളിവില്‍ പോയി. അയാള്‍ക്കായി പോലീസ് അന്വേഷണം ഊര്‍ജിതമാക്കി.

തലശേരി- കൊട്ടിയൂര്‍ റൂട്ടിലോടുന്ന മെട്രോ ബസിലെ കണ്ടക്ടര്‍ പേരാവൂര്‍ സ്വദേശി സിബി (40)യെയാണ് എസ്‌ഐ എം.അനിലും സംഘവും അറസ്റ്റ് ചെയ്തത്. ഇന്ത്യന്‍ ശിക്ഷാ നിയമം 509 വകുപ്പ് പ്രകാരം സ്ത്രീത്വത്തെ അപമാനിച്ചതിനാണ് പ്രതിയെ അറസ്റ്റ് ചെയ്തിട്ടുള്ളതെന്നും മറ്റ് പ്രതികള്‍ക്കായി തെരച്ചില്‍ നടത്തി വരികയാണെന്നും എസ്‌ഐ എം.അനില്‍ പറഞ്ഞു.

തലശേരിയില്‍ നിന്നും കൊട്ടിയൂരിലേക്ക് പോകുകയായിരുന്ന ബസില്‍ എരഞ്ഞോളി ചോനാടത്തേക്ക് പോകുന്നതിനായി കയറിയ വീട്ടമ്മയ്ക്കാണ് യാത്രയിലുടെനീളം ജീവനക്കാരില്‍ നിന്നും ദുരനുഭമുണ്ടായത്. ദീര്‍ഘദൂര ബസില്‍ ചെറിയ ദൂരത്തേക്കാണ് വീട്ടമ്മ യാത്ര ചെയ്തിരുന്നത്.

ഇക്കാരണത്താല്‍ കടുത്ത ഇന്റര്‍വ്യൂ നേരിട്ടു കൊണ്ടാണ് വീട്ടമ്മ ബസിനുള്ളില്‍ തന്നെ പ്രവേശിച്ചത്. ചോനാടത്തേക്ക് ടിക്കറ്റ് എടുത്തതോടെ ജീവനക്കാര്‍ ഒരോരുത്തരായി വീട്ടമ്മയെ മറ്റ് യാത്രക്കാരുടെ മുന്നില്‍ വെച്ച് അപമാനിക്കാന്‍ തുടങ്ങി.

വീട്ടമ്മക്കിറങ്ങേണ്ട സ്‌റ്റോപ്പില്‍ ബസ് നിര്‍ത്തുകയും ചെയ്തില്ല. സ്‌റ്റോപ്പില്ലാത്ത സ്ഥലത്ത് ബസ് നിര്‍ത്തുകയും ഡ്രൈവര്‍ ആംഗ്യ ഭാഷയിലും മറ്റ് ജീവനക്കാര്‍ അസഭ്യ വര്‍ഷം ചൊരിഞ്ഞുമാണ് വീട്ടമ്മയെ ബസില്‍ നിന്നിറക്കി വിട്ടത്. സങ്കടം സഹിക്കാനാവാതെ വീട്ടമ്മ പോലീസ് സ്‌റ്റേഷനില്‍ നേരിട്ടെത്തി പരാതി നല്‍കുകയായിരുന്നു. തുടര്‍ന്ന് എസ്‌ഐയുടെ നേതൃത്വത്തിലുള്ള പോലീസ് സംഘം ബസ് കസ്റ്റഡിയിലെടുക്കുകയും കണ്ടക്ടറെ അറസ്റ്റ് ചെയ്യുകയുമായിരുന്നു.

സ്വകാര്യ ബസ് ജീവനക്കാരുടെ യാത്രാക്കാരോടുള്ള ഇന്റര്‍വ്യൂ ഉള്‍പ്പെടെയുള്ള നിയമ വിരുദ്ധ പ്രവര്‍ത്തനങ്ങളെ ശക്തമായി നേരിടുമെന്ന് സിഐ എം.പി. ആസാദ് പറഞ്ഞു.