വരുന്ന ലോക്‌സഭാ തെരഞ്ഞെടുപ്പില്‍ കൂടുതല്‍ യുവാക്കളും വനിതകളും മത്സരരംഗത്തുണ്ടാകുമെന്നും അവരൊക്കെ പാര്‍ട്ടി നേതൃത്വത്തിലേക്ക് എത്തുമെന്നും കോണ്‍ഗ്രസ് പ്രസിഡന്റ് രാഹുല്‍ ഗാന്ധി. 2019ല്‍ കോണ്‍ഗ്രസ് അധികാരത്തിലെത്തിയാല്‍ വനിതാ സംവരണ ബില്‍ പാസാക്കുമെന്നും അദ്ദേഹം ഉറപ്പ് നല്‍കി. ആലത്തൂര്‍ ബൂത്ത് പ്രസിഡന്റ് ചന്ദ്രേഷ് കോണ്‍ഗ്രസിന്റെ ആപ്പിലൂടെ പങ്കുവെച്ച ചോദ്യത്തിന് മറുപടിയായാണ് രാഹുല്‍ കോണ്‍ഗ്രസ് നേതൃസംഗമ വേദിയില്‍ ഇക്കാര്യം പറഞ്ഞത്. കര്‍ഷകരെയും സ്ത്രീകളെയും സംരക്ഷിക്കാനാണ് കോണ്‍ഗ്രസ് ശ്രമിക്കേണ്ടത്. ഈ വേദിയില്‍ കൂടുതല്‍ വനിതാ നേതാക്കള്‍ ഉണ്ടായിരുന്നെങ്കില്‍ എന്ന് ഞാന്‍ ആഗ്രഹിച്ചുപോകുന്നെന്നും അദ്ദേഹം പറഞ്ഞു.

രാജ്യത്തെ രണ്ടായി വിഭജിക്കാനാണ് പ്രധാനമന്ത്രി നരേന്ദ്രമോദി ആഗ്രഹിക്കുന്നത്. ധനികര്‍ മാത്രമുള്ള ഭാരതം കര്‍ഷകരും തൊഴിലാളികളുമുള്ള ഭാരതം അങ്ങനെയാണ് രണ്ട് കഷണമാക്കുന്നത്. സുഹൃത്തുക്കളായ ബിസിനസുകാര്‍ക്ക് വേണ്ടി മോദി മൂന്നരലക്ഷം കോടി ചെലവഴിച്ചു. കര്‍ഷകര്‍ക്കും പാവപ്പെട്ടവര്‍ക്കും വേണ്ടി എന്ത് ചെയ്‌തെന്നും രാഹുല്‍ ചോദിച്ചു. കോണ്‍ഗ്രസ് എന്നും സമൂലമാറ്റത്തിനും ജനങ്ങളുടെ ജീവിതനിലവാരം ഉയര്‍ത്തുന്നതിനുമാണ്. താല്‍ക്കാലിക നേട്ടത്തിന് വേണ്ടി കോണ്‍ഗ്രസ് രാഷ്ട്രീയം കളിക്കാറില്ല. നമ്മുടെ നാട്ടിലെ പട്ടിണിയും ദാരിദ്രവും ഹരിതവിപ്ലവത്തിലൂടെ മാറ്റിയത് കോണ്‍ഗ്രസാണ്. അതില്‍ ഇനിയും മുന്നേറാനുണ്ട്. ഇന്ത്യ ഭക്ഷസ്വയംപര്യാപ്തത ഉറപ്പ് വരുത്തും ധവളവിപ്ലവത്തിലൂടെ അത് പൂര്‍ത്തിയാക്കാനാകും നമ്മള്‍ ലോകത്തിലെ ഏറ്റവും വലിയ ഭക്ഷസുരക്ഷാ രാജ്യമായി മാറും.

കഴിഞ്ഞ അഞ്ച് വര്‍ഷമായി പ്രധാനമന്ത്രി നരേന്ദ്രമോദി തമാശ കളിക്കുകയാണ്. അദ്ദേഹത്തിന്റെ പണക്കാരായ സുഹൃത്തുക്കള്‍ക്ക് മിനിമം വരുമാനം ഉറപ്പാക്കി. നീരവ് മോദി 35000 കോടി രൂപയും മുകുള്‍ചോക്‌സി 30000 കോടി രൂപയും വിജയ്മല്യ പതിനായിരം കോടി രൂപയും അനില്‍ അംബാനി അന്‍പതിനായിരം കോടി രൂപയും കൊണ്ടുപോയി. അതേസമയം ഏതെങ്കിലും സാധാരണക്കാരന് സാധാരണക്കാരന് മിനിമം വരുമാനം ഉറപ്പാക്കാനായോ. കോണ്‍ഗ്രസ് അധികാരത്തില്‍ വന്നാല്‍ എല്ലാവര്‍ക്കും മിനിമം വരുമാനം ഉറപ്പ് വരുത്തുമെന്നും രാഹുല്‍ഗാന്ധി ഉറപ്പ് നല്‍കി. അഞ്ച് വര്‍ഷമായി ഇന്ത്യയിലെ എല്ലാ ഭരണഘടനാ സ്ഥാപനങ്ങളും മോദി സര്‍ക്കാര്‍ ആക്രമിക്കുകയാണ്. നാല് ജഡ്ജിമാര്‍ സുപ്രീംകോടതിയില്‍ നിന്ന് പുറത്ത് വന്ന് പ്രവര്‍ത്തിക്കാന്‍ കഴിയില്ലെന്ന് മാധ്യമങ്ങളോട് പറഞ്ഞു. അമിത്ഷായും നരേന്ദ്രമോദിയും അവരെ ജോലി ചെയ്യാന്‍ അനുവദിക്കുന്നില്ലെന്ന സന്ദേശമാണ് നല്‍കിയത്.

എന്തുകൊണ്ടാണ് സി.ബി.ഐ ഡയറക്ടറെ അര്‍ദധരാത്രി മാറ്റിയതെന്ന് അറിയാമോ? ചീഫ് ജസ്റ്റിസ് അദ്ദേഹത്തെ പുനസ്ഥാപിച്ചിട്ടും മണിക്കൂറുകള്‍ക്കകം മോദി മാറ്റി? നരേന്ദ്രമോദി പറഞ്ഞിട്ടാണ് അനില്‍ അംബാനിക്ക് റഫേല്‍ ഇടപാട് കരാര്‍ നല്‍കിയത് എന്തിനെന്ന് ഫ്രഞ്ച് മുന്‍ പ്രസിഡന്റ് പറഞ്ഞത് എന്തിന്? 526 കോടി രൂപ വിലയുള്ള വിമാനം 1200 കോടിക്ക് വാങ്ങിയതെന്തിനാണ്. നാട്ടിലുള്ളവര്‍ക്കെല്ലാം ഇതിന് ഒരേ ഉത്തരമേ ഉള്ളൂ. പ്രധാനമന്ത്രി അഴിമതിക്കാരനാണ്. സി.ബി.ഐ ഡയറക്ടറെ മാറ്റിയതിലൂടെ സ്വയം രക്ഷിക്കുകയായിരുന്നു നരേന്ദ്രമോദി. അനില്‍ അംബാനിയെ സഹായിക്കാന്‍ പ്രധാനമന്ത്രി ചെയ്ത ഇടപാടാണിതെന്ന് അദ്ദേഹത്തിന്റെ മന്ത്രിസഭയിലെ തന്നെ മുന്‍ പ്രതിരോധ മന്ത്രിയായിരുന്ന മനേഹര്‍പരീക്കര്‍ ആരോപിച്ചിരുന്നു. അതിലൂടെ കര്‍ണാടകത്തിലെയും കേരളത്തിലെയും യുവാക്കളുടെ തൊഴിലവസരമാണ് നഷ്ടപ്പെട്ടത്.

നോട്ട് പിന്‍വലിക്കലിലൂടെ രാജ്യത്തെ സമ്പദ്വ്യവസ്ഥ മോദി സര്‍ക്കാര്‍ തകര്‍ത്തെന്നും രാഹുല്‍ ആരോപിച്ചു. പ്രധാനമന്ത്രി കേരളത്തില്‍ വന്ന് ഇന്ത്യ ചൈനയെ മറികടക്കുമെന്ന് പറഞ്ഞു. എന്ത് ധൈര്യത്തിലാണ് അത് പറഞ്ഞത്. രാജ്യത്തെ സമ്പദ്വ്യവസ്ഥയുടെ നട്ടെല്ല് തകര്‍ത്ത ശേഷമാണ് ഇത്തരം വീരവാദങ്ങള്‍ മുഴക്കുന്നത്. ചരക്ക് സേവന നികുതി വലിയ പരാജയമായി.അതില്‍ നിന്ന് കരകയറാന്‍ എന്ത് നടപടിയാണ് കേന്ദ്രം എടുത്തത്. ചെറുകിട വ്യാപാരികളെ തകര്‍ത്തു. നമ്മള്‍ അധികാരത്തില്‍ വന്നാല്‍ ചരക്ക് സേവന നികുതി സമ്പദായം പുനസംഘടിപ്പിക്കുമെന്നും രാഹുല്‍ ഉറപ്പ് നല്കി.