പിളരുന്തോറും വരുന്ന പ്രസ്ഥാനമാണ് കേരളാ കോണ്ഗ്രസ്. എന്നാല് ഇനിയൊരു പിളര്പ്പുണ്ടായാല് തളരുമെന്നാണ് നേതാക്കളുടെ തന്നെ വിലയിരുത്തല്, അതിനിടെയാണ് പി.ജെ. ജോസഫും കെ.എം മാണിയും തമ്മില് മുറുമുറുപ്പ് തുടങ്ങിയത്
പിളരുന്തോറും വരുന്ന പ്രസ്ഥാനമാണ് കേരളാ കോണ്ഗ്രസ്. എന്നാല് ഇനിയൊരു പിളര്പ്പുണ്ടായാല് തളരുമെന്നാണ് നേതാക്കളുടെ തന്നെ വിലയിരുത്തല്. അതിനിടെയാണ് പി.ജെ. ജോസഫും കെ.എം മാണിയും തമ്മില് മുറുമുറുപ്പ് തുടങ്ങിയത്. ലോക്സഭാ തെരഞ്ഞെടുപ്പിന്റെ വക്കിലെത്തി നില്ക്കുമ്പോള് അടിച്ച്പിരിഞ്ഞാല് അത് അവര്ക്ക് മാത്രമല്ല യു.ഡി.എഫിനും തിരിച്ചടിയാകും. അവസരം മുതലെടുക്കാന് പി.ജെ ജോസഫിന്റെ കൂടെയുണ്ടായിരുന്ന ആന്റണി രാജുവും ഫ്രാന്സിസ് ജോര്ജ്ജും നേതൃത്വം നല്കുന്ന ജനാധിപത്യ കേരളാ കോണ്ഗ്രസ് രംഗത്തെത്തി. ചെങ്ങന്നൂര് ഉപതെരഞ്ഞെടുപ്പ് സമയത്ത് കേരളാ കോണ്ഗ്രസ് മാണി വിഭാഗം എല്.ഡി.എഫിലേക്ക് ചേക്കേറാന് തീരുമാനിച്ചിരുന്നെങ്കിലും ജോസഫ് എതിര്ത്തിരുന്നു.
സ്വന്തം പാര്ട്ടിയുടെ ശക്തിയില് പ്രമാണിയായി വാണിരുന്ന ജോസഫ് മാണിയുമായി കൈ കോര്ത്തതോടെ ഒന്നാമനായിരുന്ന ജോസഫ് രണ്ടാമനായി. പാര്ട്ടിയിലും പാര്ലമെന്ററി രംഗത്തും മാണിയും ജോസ് കെ.മാണിയും പിടിമുറുക്കിയെന്നാണ് ജോസഫിന്റെയും കൂട്ടരുടെയും ആക്ഷേപം. രാജ്യസഭാ സീറ്റ് ജോസ് കെ.മാണിക്ക് നല്കിയപ്പോള് ലോക്സഭാ സീറ്റ് തങ്ങള്ക്ക് കിട്ടുമെന്നാണ് ജോസഫും മോന്സ് ജോസഫും കരുതിയിരുന്നത്. എന്നാല് അതും മാണി കൊണ്ടുപോകുമെന്ന് ഉറപ്പായതോടെയാണ് കേരളാ കോണ്ഗ്രസിന് രണ്ട് സീറ്റുവേണമെന്ന ആവശ്യം ജോസഫ് മുന്നോട്ട് വെച്ചത്. ചാലക്കുടിയോ, ഇടുക്കിയോ വേണമെന്നാണ് ആവശ്യം. കുറേ നാളായി പാര്ട്ടിയിലുള്ള ഭിന്നത മറനീക്കി പുറത്ത് വരുന്നതാണ് ജോസഫിന്റെ പ്രതികരണം. പ്രായാധിക്യം കാരണം കെ.എം മാണി ചെയര്മാന് സ്ഥാനം ഒഴിയുമ്പോള് ജോസ് കെ. മാണി പാര്ട്ടിയില് പിടിമുറുക്കുമെന്നാണ് റിപ്പോര്ട്ട്. അതും ജോസഫിനെ അസ്വസ്ഥനാക്കുന്നു.
പാര്്ട്ടി വിട്ടാലും തന്റെ പഴയ പാര്ട്ടിയായി യു.ഡി.എഫില് തുടരാനാണ് ജോസഫ് ആലോചിക്കുന്നത്. കോട്ടയം സീറ്റില് മോന്സ് ജോസഫിനെ മത്സരിപ്പിക്കാന് ആലോചനയുണ്ടായിരുന്നെങ്കിലും അത് നടക്കാത്തതിനെ തുടര്ന്നാണ് രണ്ടാം സീറ്റെന്ന തന്ത്രം ജോസഫ് മുന്നോട്ട് വെച്ചത്.
സമാധാന സന്ദേശവുമായി ഗാന്ധിജി സ്റ്റഡി സെന്ററിന്റെ ബാനറില് നാളെ തിരുവനന്തപുരത്ത് പിജെ ജോസഫ് പ്രാര്ത്ഥനാ യജ്ഞത്തിനെത്തുന്നുണ്ട്. പാര്ട്ടിയിലെ പിളര്പ്പ് ഉള്പ്പെടെയുള്ള പല ഘട്ടങ്ങളിലും പിജെ ജോസഫ് ഗാന്ധിജി സ്റ്റഡി സെന്റര് മറയാക്കിയിട്ടുണ്ട്. ജോസ് കെ മാണി നടത്തുന്ന കേരള യാത്രക്കിടെയാണ് ജോസഫിന്റെ പുതിയ നീക്കം എന്നതും ശ്രദ്ധേയമാണ്. ബാര് കോഴ ആരോപണത്തെ തുടര്ന്ന് മുന്നണി വിടാന് മാണി തീരുമാനിച്ചത് മുതല് രണ്ട് വര്ഷം യുഡിഎഫിന് പുറത്ത് നിന്നതും വീണ്ടും തിരിച്ചെത്തിയതും അടക്കം എല്ലാറ്റിലും കെഎം മാണിയുടെ ഏകപക്ഷീയ താല്പര്യം ഉണ്ടായെന്നാണ് ജോസഫിന്റെ ആക്ഷേപം.
മാണി കോണ്ഗ്രസില് പിളര്പ്പുണ്ടായാല് അത് രണ്ടാമത്തേതാകും. മാണിക്കൊപ്പം ജോസഫും പി.സി ജോര്ജ്ജും ലയിച്ചതോടെ കേരളാ കോണ്ഗ്രസ് വലിയ ശക്തിയായി മാറിയിരുന്നു. മാണിയുടെയും ജോസ് കെ.മാണിയുടെയും അപ്രമാദിത്വം അംഗീകരിക്കാന് ജോര്ജ്ജ് ആദ്യം മുതലേ തയ്യാറായില്ല. സോളാര് വിവാദം വന്നപ്പോള് ജോസ് കെ.മാണിയെ അധിക്ഷേപിക്കാന് ജോര്ജ്ജ് ശ്രമിച്ചതോടെ അദ്ദേഹത്തിന്റെ പുറത്തേക്കുള്ള വഴി തുറന്നിരുന്നു. അതിന്റെ ഭാഗമായി ചീഫ് വിപ്പ് സ്ഥാനത്ത് നിന്ന് നീക്കണമെന്ന് പാര്ലമെന്ററി പാര്ട്ടി നേതാവ് കൂടിയായ കെ.എം മാണി മുഖ്യമന്ത്രിയായിരുന്ന ഉമ്മന്ചാണ്ടിക്ക് കത്ത് നല്കി. അങ്ങനെ ജോര്ജ്ജ് പഴയ ലാവണത്തിലേക്ക് പോയി. രണ്ടാമുഴം ജോസഫിനാകുമോ? കാത്തിരിക്കാം.
https://www.facebook.com/Malayalivartha
