മുഖ്യമന്ത്രി പിണറായി വിജയനെ പരിഹസിച്ചും സര്‍ക്കാരിനെ വിമര്‍ശിച്ചും കോണ്‍ഗ്രസ് എംഎല്‍എ ഷാഫി പറമ്ബില്‍. എറണാകുളം ബ്രോഡ് വേയിലെ ചില കടകളുടെ വാതിലില്‍ എല്ലാം പുഷ് എന്ന് അര്‍ത്ഥത്തില്‍ പിണറായി എന്നാണ് എഴുതിവെച്ചിരിക്കുന്നതെന്ന് അദ്ദേഹം പറഞ്ഞു.പുഷ് എന്നതിന് പകരം, തള്ളുക എന്നതിന് പകരം, ഇപ്പോ അങ്ങനെ എഴുതിയാലും ആളുകള്‍ക്ക് ബോധ്യം വരുമെന്നാണ്. ആ തള്ളല്ലാതെ അഡ്‌മിനിസ്ട്രേഷന്റെ കാര്യത്തില്‍ നാട്ടില്‍ ഒന്നും നടക്കുന്നില്ല.

യുഡിഎഫ് സര്‍ക്കാര്‍ കൊണ്ടുവന്ന വികസനപ്രവര്‍ത്തനങ്ങള്‍ അല്ലാതെ മറ്റൊന്നും ഈ സര്‍ക്കാരിന് ചൂണ്ടിക്കാണിക്കാനില്ലെന്നും ഷാഫി വിശദമാക്കി. എറണാകുളം മറൈന്‍ ഡ്രൈവില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്ക് സ്വീകരണമൊരുക്കിയ, അരലക്ഷത്തോളം വരുന്ന കോണ്‍ഗ്രസ് ബൂത്ത് പ്രസിഡന്റുമാരുടെ യോഗത്തിലായിരുന്നു ഷാഫിയുടെ വിമര്‍ശനം.

'എറണാകുളം ബ്രോഡ് വേയിലെ ചില കടകളില്‍ എല്ലാം, അകത്തേക്ക് കയറാനുള്ള വാതിലില്‍ ഇപ്പോള്‍ എഴുതി വെച്ചിരിക്കുന്നത് പിണറായി എന്നാണ്. എന്താണ് കാര്യം എന്ന് ചോദിക്കുമ്ബോള്‍ ആളുകള്‍ പറയുന്നത് പുഷ് എന്നതിന് പകരം, തള്ളുക എന്നതിന് പകരം, ഇപ്പോ അങ്ങനെ എഴുതിയാലും ആളുകള്‍ക്ക് ബോധ്യം വരുമെന്നാണ്. ആ തള്ളല്ലാതെ അഡ്‌മിനിസ്ട്രേഷന്റെ കാര്യത്തില്‍ നാട്ടില്‍ ഒന്നും നടക്കുന്നില്ല. ഭരണത്തിന്റെ കാര്യത്തില്‍ നടപ്പിലാക്കിയ വികസന പ്രവര്‍ത്തനങ്ങള്‍ കൊച്ചിയിലെ മെട്രൊ ആണെങ്കിലും കണ്ണൂരിലെ വിമാനത്താവളം ആണെങ്കിലും അതുപോലുള്ള വികസന പ്രവര്‍ത്തനങ്ങള്‍ യുഡിഎഫ് സര്‍ക്കാര്‍ കൊണ്ടുവന്നത് ഉദ്ഘാടനം ചെയ്യുക എന്നതല്ലാതെ പുതിയതായി ഒന്നും ഈ സര്‍ക്കാര്‍ സംഭാവന ചെയ്തിട്ടില്ല'.

കോണ്‍ഗ്രസ് പ്രസ്ഥാനം നവോത്ഥാനം പ്രസംഗിക്കുന്നത് വ്യാജമായ അവകാശവാദങ്ങളിലൂടെയല്ലാ. ബൂത്ത് പ്രസിഡന്റ് മുതല്‍ ഇന്ത്യന്‍ പ്രസിഡന്റ് വരെയുള്ള പദവികളില്‍ വനിതകള്‍ക്ക് അവസരം കൊടുത്തത് ഇന്ത്യന്‍ നാഷണല്‍ കോണ്‍ഗ്രസാണെന്ന് ഓര്‍മ്മിപ്പിക്കുന്നു. ലോക്സഭാ തെരഞ്ഞെടുപ്പില്‍ 20 സീറ്റുകളും യുഡിഎഫിന് തന്നെയാണ് ജനങ്ങള്‍ കരുതിവെച്ചിരിക്കുന്നതെന്നും അദ്ദേഹം പറയുന്നു.