ശബരിമലയില്‍ മകരവിളക്ക് ഭക്തര്‍ കത്തിക്കുന്നതാണെന്ന വെളിപ്പെടുത്തലുമായി ബി.ജെ.പി എം.എല്‍.എ ഒ. രാജഗോപാല്‍ നിയമസഭയില്‍. വിളക്ക് കത്തിച്ചിരുന്ന മലഅരയ വിഭാഗക്കാര്‍ക്ക് ഇതിന്റെ അവകാശം തിരികെ നല്‍കണമെന്നും അദ്ദേഹം നിയമസഭയില്‍ ആവശ്യപ്പെട്ടു. ഒ. രാജഗോപാലിന്റെ ശ്രദ്ധക്ഷണിക്കല്‍ ചരിത്രപരമായ നാഴികക്കല്ലാണെന്ന് സ്പീക്കര്‍ പി. ശ്രീരാമകൃഷ്ണന്‍ പറഞ്ഞു. മലഅരയര്‍ക്ക് അവകാശങ്ങള്‍ പുനസ്ഥാപിച്ച് നല്‍കുന്ന കാര്യം സര്‍ക്കാരിന്റെ പരിഗണനയിലില്ലെന്നും ഇക്കാര്യം ബന്ധപ്പെട്ടവരുമായി ആലോചിച്ച് തീരുമാനം എടുക്കാമെന്നും ദേവസ്വം മന്ത്രി കടകംപള്ളി സുരേന്ദ്രന്‍ നിയമസഭയെ അറിയിച്ചു. ശബരിമലയില്‍ മകരവിളക്ക് കത്തിക്കുന്നതുമായി ബന്ധപ്പെട്ട് നിരവധി വിവാദങ്ങള്‍ മുമ്പും ഉണ്ടായിട്ടുണ്ട്. എന്നാല്‍ അതിനൊരു ഔദ്യോഗിക സ്ഥിരീകരണം നിയമസഭയില്‍ ഉണ്ടാകുന്നത് ആദ്യമായാണ്.

ശബരിമല സമരവുമായി ബി.ജെ.പി മുന്നോട്ട് പോകുന്നതിനിടെയാണ് രാജഗോപാല്‍ നിയമസഭയില്‍ നിര്‍ണായകമായ ആവശ്യം ഉന്നയിച്ചത്. ശബരിമലയില്‍ ഈഴവര്‍ക്കും മലഅരയര്‍ക്കും ഉള്ള അവകാശങ്ങള്‍ എടുത്ത് കളഞ്ഞപ്പോള്‍ ബി.ജെ.പി എവിടെയായിരുന്നു എന്നാണ് പിന്നാക്ക, ദളിത് വിഭാഗങ്ങള്‍ ആരോപിച്ചത്. അതിന് മറുപടി നല്‍കുന്നതിനാണ് ഇക്കാര്യം നിയമസഭയില്‍ ഉന്നയിച്ചത്. ഇത് തെരഞ്ഞെടുപ്പ് മുന്നില്‍ കണ്ടുള്ള രാഷ്ട്രീയ നീക്കമാണ്. എന്നാല്‍ ഇടത്പക്ഷം മറ്റൊരു രീതിയിലാണ് ഇതിനെ സമീപിച്ചത്. മകരവിളക്ക് മനുഷ്യനിര്‍മിതിയാണെന്ന് ഇടത്പക്ഷം പണ്ട് മുതലേ ആരോപിക്കുന്നതാണ്. അത് ശരിവയ്ക്കുന്നതാണ് രാജഗോപാലിന്റെ പ്രസ്താവന. അതിനാല്‍ ശബരിമലയുമായി ബന്ധപ്പെട്ട വിഷയങ്ങളില്‍ തങ്ങള്‍ മുമ്പ് പറഞ്ഞിരുന്നത് ബി.ജെ.പി ഇപ്പോള്‍ ശരിവയ്ക്കുകയാണെന്ന് സി.പി.എമ്മിന് ചൂണ്ടിക്കാട്ടാം.


മകരവിളക്ക് കത്തിക്കുന്നതല്ലെന്നാണ് തന്ത്രി കുടുംബം അടക്കം മുമ്പ്‌നിലപാടെടുത്തത്. അതിനെ മലഅരയ വിഭാഗം എതിര്‍ത്തിരുന്നു. തങ്ങള്‍ പറഞ്ഞത് ദേവസ്വം ബോര്‍ഡും തന്ത്രിയും കേട്ടിരുന്നെങ്കില്‍ 2011ലെ പുല്ലുമേട് ദുരന്തം സംഭവിക്കുമായിരുന്നില്ലെന്ന് മലഅരയ നേതാവ് പി.കെ സജീവ് ചൂണ്ടിക്കാട്ടി. രാജഗോപാലിന്റേത് ചരിത്രപരമായ തീരുമാനമാണെന്നും തങ്ങളുടെ അവകാശം സര്‍ക്കാര്‍ പരിശോധിക്കുകയല്ല, പുനസ്ഥാപിക്കുകയാണ് വേണ്ടതെന്നും സജീവ് പറഞ്ഞു. ശബരിമലയിലെ ആദ്യത്തെ തന്ത്രി കരിമല അരയനാണെന്നും അദ്ദേഹത്തിന്റെ പേര് പതിനെട്ടാംപടിയിലെ ആദ്യത്തെ പടിയില്‍ കൊത്തിവെച്ചിട്ടുണ്ടെന്നും ആ പടി തിരിച്ചിട്ടിരിക്കുകയാണെന്നും സജീവ് ആരോപിച്ചു.

ദേവസ്വംബോര്‍ഡും തന്ത്രി കുടുംബവും ചേര്‍ന്നാണ് മലഅരയരുടെ ശബരിമലയിലെ അവകാശങ്ങള്‍ എടുത്ത് കളഞ്ഞതെന്ന് അവര്‍ തന്നെ ആരോപിച്ചിരുന്നു. മകരവിളക്ക് കത്തിക്കാനുള്ള അവകാശം അവര്‍ക്ക് മടക്കി നല്‍കണമെന്ന് ആവശ്യപ്പെട്ട് രാഹുല്‍ ഈശ്വര്‍ ഹൈക്കോടതിയില്‍ കേസ് കൊടുത്തിട്ടുണ്ട്. കരിമലയില്‍ മലഅരയര്‍ക്കുണ്ടായിരുന്ന ക്ഷേത്രം ദേവസ്വം അധികൃതരാണ് നശിപ്പിച്ചതെന്നും അതിനൊപ്പമുണ്ടായിരുന്ന കുളം ഇപ്പോഴും അവിടെ ഉണ്ടെന്നും പി.കെ സജീവ് ആരോപിക്കുന്നു. അതേസമയം ബി.ജെ.പി ഉന്നയിച്ച ആവശ്യം സി.പി.എം നിയന്ത്രണത്തിലുള്ള സര്‍ക്കാര്‍ നടപ്പാക്കാന്‍ യാതൊരു സാധ്യതയും കാണുന്നില്ല. പ്രത്യേകിച്ച് പൊതുതെരഞ്ഞെടുപ്പ് അടുത്തിരിക്കുന്ന സാഹചര്യത്തില്‍.