ഒറ്റയ്ക്ക് താമസിക്കുകയായിരുന്ന റിട്ട. അദ്ധ്യാപികയെ കൊലപ്പെടുത്തി ആഭരണങ്ങള്‍ കവര്‍ന്ന കേസില്‍ ശിക്ഷിക്കപ്പെട്ട പ്രതി പ്രായമായവരെ ലൈംഗികമായി ഉപയോഗിക്കുന്നതില്‍ സന്തോഷം കണ്ടെത്തുന്ന പ്രത്യേക മാനസികാവസ്ഥയ്ക്ക് ഉടമയാണ്. ഇയാളുടെ ഇരകള്‍ എല്ലാം തന്നെ വൃദ്ധരായ സ്ത്രീകളാണ്. അദ്ധ്യാപികയെ തലയ്ക്കടിച്ച് ബോധം കെടുത്തി ബലാത്സംഗം ചെയ്യുകയും തുടര്‍ന്ന് കഴുത്തില്‍ തോര്‍ത്ത് മുറുക്കി കൊലപ്പെടുത്തിയ ശേഷം ആഭരണങ്ങള്‍ കവരുകയും ചെയ്‌തെന്നായിരുന്നു കേസ്. പ്രതി പരുമല കൊട്ടയ്ക്കാമാലി കോളനിയില്‍ സബീറിനെ (36) പത്തനംതിട്ട അഡീഷണല്‍ സെഷന്‍സ് കോടതി ഒന്നാം നമ്പര്‍ ജഡ്ജി എന്‍ ഹരികുമാര്‍ ജീവപര്യന്തം തടവിന് ശിക്ഷിച്ചു.

2010 മേയ് ഒന്നിനായിരുന്നു കൊലപാതകം. രാത്രി ഒന്‍പതുമണിയോടെ അദ്ധ്യാപികയുടെ വീട്ടില്‍ അതിക്രമിച്ച് കയറിയ സബീര്‍ അവരുടെ വാക്കിങ് സ്റ്റിക്ക് കൊണ്ട് തലയ്ക്കടിച്ച് ബോധം കെടുത്തുകയായിരുന്നു. സ്വര്‍ണാഭരണങ്ങളെടുത്തശേഷം വലിച്ചിഴച്ച് വീടിനു പുറത്തെ കൊക്കോമരത്തിന്റെ ചുവട്ടില്‍ കൊണ്ടുപോയി ബലാത്സംഗം ചെയ്തു. പിന്നീട് കഴുത്തില്‍ തോര്‍ത്ത് മുറുക്കി കൊലപ്പെടുത്തുകയായിരുന്നെന്ന് പോലീസ് കണ്ടെത്തി. ദിവസങ്ങള്‍ക്ക് ശേഷമാണ് അഴുകിയ നിലയില്‍ മൃതദേഹം കണ്ടത്.

തിരുവല്ല സി.ഐ.യായിരുന്ന ആര്‍ ജയരാജ് ആയിരുന്നു ആദ്യം അന്വേഷണം നടത്തിയത്. പിന്നീട് കേസ് ക്രൈംബ്രാഞ്ചിന് വിട്ടു. തിരുവല്ല സി.ഐ.യായിരുന്ന സഖറിയ മാത്യുവാണ് പ്രതിയെ പിടികൂടിയത്. സമാനമായ മറ്റൊരു കേസില്‍ ചോദ്യംചെയ്യുന്നതിനിടെയാണ് താനാണ് റെയ്ച്ചലിനെ കൊന്നതെന്ന് സബീര്‍ കുറ്റസമ്മതം നടത്തിയത്. പ്രോസിക്യൂഷന് വേണ്ടി അഡീഷണല്‍ പബ്ലിക് പ്രോസിക്യൂട്ടര്‍ എസ്.മനോജ് ഹാജരായി.

302 വകുപ്പ് പ്രകാരം ജീവപര്യന്തം കഠിനതടവും 50,000 രൂപ പിഴയും ഭവനഭേദനം, ദേഹോപദ്രവം ഏല്‍പ്പിക്കല്‍, മോഷണം, തെളിവ് നശിപ്പിക്കല്‍ എന്നിവക്കായി 20 വര്‍ഷം കഠിനതടവും 18000 രൂപ പിഴശിക്ഷയും അനുഭവിക്കണം.