ഉറപ്പുകള്‍ പലതും നല്‍കിയെങ്കിലും ഇക്കുറിയും ലോക്‌സഭാതെരഞ്ഞെടുപ്പില്‍ കോണ്‍ഗ്രസിന് കെട്ടിയിറക്കല്‍ സ്ഥാനാര്‍ത്ഥിയുണ്ടാകും. സംസ്ഥാനത്തിലെ നേതാക്കളെ മറികടന്നുകൊണ്ട് കോണ്‍ഗ്രസ് ഹൈക്കമാന്‍ഡിന് താല്‍പര്യമുള്ള ചിലരെങ്കിലും ഇക്കുറിയും നൂലിലിറങ്ങിവരുമെന്നാണ് ഇപ്പോള്‍ ലഭിക്കുന്ന സൂചന. എന്നാല്‍ ഇക്കുറി സംസ്ഥാനത്തിന് പരിചിതരല്ലാത്ത രാഷ്ട്രീയക്കാര്‍ക്ക് പകരം ലോകം അറിയുന്ന നയന്ത്രജ്ഞരുടെ രൂപത്തിലായിരിക്കും ആ വരവ്. ശശീ തരൂര്‍ മോഡല്‍ പരീക്ഷണത്തിനാണ് കോണഗ്രസ് ഇക്കുറി ഒരുങ്ങുന്ന്. അതിന്റെ ഭാഗമായി നയന്ത്രജ്ഞന്‍ വേണുരാജാമണി സ്ഥാനാര്‍ത്ഥിയാകുമെന്ന് ഏറെക്കുറെ ഉറപ്പായിട്ടുണ്ട്.
ശശിതരൂരിന്റെ അതേ നിലവാരത്തിലുള്ള ചില സ്ഥാനാര്‍ത്ഥികള്‍ ഇക്കുറി മത്സരരംഗത്തുണ്ടാകും. അതില്‍ ഏറ്റവും പ്രധാനമായി ഉയര്‍ന്നുവരുന്ന പേരാണ് വിദേശകാര്യ സര്‍വീസിലുള്ള വേണു രാജാമണിയുടേത്. മുന്‍ കെ.എസ്.യു പ്രവര്‍ത്തകന്‍ കൂടിയായ അദ്ദേഹം ഇക്കുറി കോണ്‍ഗ്രസ് ടിക്കറ്റില്‍ രംഗത്തുണ്ടാകുമെന്നാണ് പാര്‍ട്ടി വൃത്തങ്ങള്‍ നല്‍കുന്ന സൂചന.
തൃശൂര്‍, പത്തനംതിട്ട മണ്ഡലങ്ങളിലാണ് വേണു രാജാമണിയുടെ പേര് പരിഗണിക്കുന്നത്. എന്നാല്‍ മണ്ഡലത്തിന്റെ കാര്യത്തില്‍ അന്തിമതീരുമാനം പിന്നീട് മാത്രമേയുണ്ടാകുകയുള്ളു. കോട്ടയം സംബന്ധിച്ച തര്‍ക്കത്തിന് പരിഹാരം ഉണ്ടായതിന് ശേഷം മാത്രമേ പത്തനംതിട്ട മണ്ഡലത്തിന്റെ കാര്യത്തില്‍ അന്തിമനിലപാടില്‍ കോണ്‍ഗ്രസ് എത്തുകയുള്ളു.
ഉമ്മന്‍ചാണ്ടി മത്സരരംഗത്ത് വരികയാണെങ്കില്‍ കോട്ടയം സീറ്റ് കോണ്‍ഗ്രസ് ഏറ്റെടുത്ത് പകരം ഇടുക്കി കേരള കോണ്‍ഗ്രസിന് നല്‍കാനാണ് നീക്കം. കേരള കോണ്‍ഗ്രസിനും ഇക്കാര്യത്തില്‍ വലിയ തര്‍ക്കമുണ്ടാവില്ലെന്നാണ് കോണ്‍ഗ്രസിന്റെ കണക്കുകൂട്ടല്‍. ഇടുക്കി ലഭിച്ചാല്‍ മാണി ഗ്രൂപ്പിലെ തര്‍ക്കത്തിനും ഒരുപരിധി വരെ പരിഹാരം കാണാന്‍ കഴിയും. ഇപ്പോള്‍ തന്നെ ലഭിക്കുന്ന സ്ഥാനങ്ങളെല്ലാം കുടുംബാംഗങ്ങള്‍ക്കായി വീതം വയ്ക്കുന്നുവെന്ന പരാതി ആ പാര്‍ട്ടിക്കുള്ളിലുണ്ട്. അതിന്റെ സൂചന കൂടിയാണ് ഗാന്ധിജി രക്തസാക്ഷിത്വദിനത്തല്‍ പി.ജെ. ജോസഫ് സ്വന്തം നിലയില്‍ സെക്രട്ടേറിയറ്റ് പടിക്കല്‍ നടത്തുന്ന ഉപവാസസമരവും. സാധാരണ സമരമാണെന്ന് പരസ്യമായി പറയുന്നുണ്ടെങ്കിലും അതൃപ്തിയാണ് ഇതിന് പിന്നിലെന്നാണ് പിന്നാമ്പുറ സംസാരം.
ആ സാഹചര്യത്തില്‍ കെ.എം. മാണി വിട്ടുവീഴ്ചയ്ക്ക് തയാറായാല്‍ കോട്ടയവും ഇടുക്കിയും വച്ചുമാറും. കോട്ടയത്ത് ഉമ്മന്‍ചാണ്ടിയും ഇടുക്കിയില്‍ കേരള കോണ്‍ഗ്രസ് സ്ഥാനാര്‍ത്ഥിയും വന്നുകഴിഞ്ഞാല്‍ ഇന്നത്തെ സാഹചര്യത്തില്‍ പത്തനംതിട്ടയില്‍ ഒരു ഹിന്ദുസ്ഥാനാര്‍ത്ഥി വരേണ്ടിവരും. ശബരിമല വിഷയവും മറ്റും ഏറെ ബാധിക്കുന്ന ജില്ലയായ പത്തനംതിട്ടയില്‍ അത്തരമൊരു സ്ഥാനാര്‍ത്ഥിവരുന്നത് സംസ്ഥാനവ്യാപകമായി കോണ്‍ഗ്രസിന് ഗുണം ചെയ്യുമെന്ന വിലയിരുത്തലും പാര്‍ട്ടിയിലുണ്ടാക്കിയിട്ടുണ്ട്. ആ സാഹചര്യം ഉരുത്തിരിയുകയാണെങ്കില്‍ വേണു രാജാമണിയാകും അവിടെ മത്സരിക്കുകയെന്നാണ് കോണ്‍ഗ്രസ് വൃത്തങ്ങള്‍ നല്‍കുന്ന സൂചന.
വിദേശസര്‍വീസിലെ ഉദ്യോഗസ്ഥനാണെങ്കില്‍ കോണ്‍ഗ്രസ് പാരമ്പര്യം അവകാശപ്പെടാവുന്ന വ്യക്തികൂടിയാണ് വേണു രാജാമണി. മുന്‍കാല കെ.എസ്്.യു പ്രവര്‍ത്തകനാണ് അദ്ദേഹം. മഹാരാജാസ് കോളജിലെ കെ.എസ്.യുവിന്റെ നേതാവുമായിരുന്നു. അവിടെ നിന്നാണ് വിദേശകാര്യ സര്‍വീസിലേക്ക് പോയതും. മുന്‍ രാഷ്ട്രപതി പ്രണാബ്കുമാര്‍ മുഖര്‍ജിയുടെ പ്രസ് സെക്രട്ടറിയുമായിരുന്നു അദ്ദേഹം. അതിന് ശേഷം അദ്ദേഹത്തെ നെതര്‍ലന്‍ഡ്‌സിലെ ഹൈക്കമ്മിഷണറായി നിയമിക്കുകയായിരുന്നു.
ഡോ: ശശിതരൂരിനെ തിരുവനന്തപുരത്തുനിന്നും പാര്‍ലമെന്റില്‍ എത്തിച്ച് ദേശീയതലത്തില്‍ വളര്‍ത്തിയ തന്ത്രമാണ് വേണു രാജാമണിയുടെ കാര്യത്തിലും കോണ്‍ഗ്രസ് പ്രതീക്ഷിക്കുന്നത്. ആഗോളതലത്തില്‍ തന്നെ അംഗീകാരം നേടിയ വ്യക്തികള്‍ സ്ഥാനാര്‍ത്ഥിയായി വരുന്നത് ഏറെ ഗുണം ചെയ്യുമെന്നും വിലയിരുത്തലുമുണ്ട്. അത് സംസ്ഥാനവ്യാപകമായി തന്നെ പാര്‍ട്ടിക്ക് ഗുണം ചെയ്യുമെന്നും അവര്‍ വിലയിരുത്തുന്നു.
എന്നാല്‍ ഇതിനെതിരെ പാര്‍ട്ടിയില്‍ അഭിപ്രായവ്യത്യാസമുള്ളവരുമുണ്ട്. കെട്ടിയിറക്കല്‍ സ്ഥാനാര്‍ത്ഥികള്‍ ഉണ്ടാവില്ലെന്ന് പ്രഖ്യാപിച്ചിട്ട് അത്തരത്തിലുള്ള നീക്കമാണ് ഇതിന് പിന്നിലെന്ന് ചില സീറ്റ് മോഹികള്‍ക്ക് അഭിപ്രായമുണ്ട്. എന്നാല്‍ സംസ്ഥാനത്ത് എല്ലാ ഘടകങ്ങളിലും ചര്‍ച്ച ചെയ്ത് സംസ്ഥാനനേതൃത്വത്തിന്റെ നിര്‍ദ്ദേശത്തോടെ ഇദ്ദേഹത്തെ സ്ഥാനാര്‍ത്ഥിയാക്കാനാണ് ഹൈക്കമാന്‍ഡിന്റെ നീക്കം. സിവില്‍, വിദേശകാര്യ സര്‍വീസിലുള്ളവരെ ഒപ്പം കൊണ്ടുവരികയെന്ന കോണ്‍ഗ്രസ് പാര്‍ട്ടിയുടെ നയത്തിന്റെ ഭാഗമായാണ് ഈ നീക്കമെന്നും പാര്‍ട്ടി വൃത്തങ്ങള്‍ വ്യക്തമാക്കുന്നു.