വിവരാവകാശ നിയമപ്രകാരമുള്ള അപേക്ഷകളില് ഉദ്യോഗസ്ഥര് രേഖകള് നല്കുമ്പോള് പേജ് ഒന്നിന് രണ്ടുരൂപ നിരക്കില് മാത്രമേ ഈടാക്കാവൂവെന്ന് സംസ്ഥാന വിവരാവകാശ കമീഷന്റെ ഉത്തരവ്
വിവരാവകാശ നിയമപ്രകാരമുള്ള അപേക്ഷകളില് ഉദ്യോഗസ്ഥര് രേഖകള് നല്കുമ്പോള് പേജ് ഒന്നിന് രണ്ടുരൂപ നിരക്കില് മാത്രമേ ഈടാക്കാവൂവെന്ന് സംസ്ഥാന വിവരാവകാശ കമീഷന് ഉത്തരവിട്ടു. റവന്യൂ വകുപ്പ് സ്കെച്ച്, പ്ലാന് എന്നിവ നല്കുമ്പോള് 500 രൂപയും ജി.എസ്.ടിയും ഈടാക്കുന്നത് ചോദ്യംചെയ്ത് സമര്പ്പിച്ച അപ്പീലിലാണ് മുഖ്യ വിവരാവകാശ കമീഷണര് വിന്സെന് എം.പോള് അധ്യക്ഷനായ ഫുള്ബെഞ്ചിന്റെ സുപ്രധാന ഉത്തരവ്.
90 ദിവസത്തിനകം വ്യക്തമായ ഉത്തരവ് ഇക്കാര്യത്തില് പുറപ്പെടുവിക്കാന് പൊതുഭരണ വകുപ്പിന് കമീഷന് നിര്ദേശം നല്കി. സുപ്രീംകോടതി വിധിപ്രകാരം അഞ്ച് രൂപയില് കൂടുതല് ആര്.ടി.ഐ അപേക്ഷയില് രേഖകളുടെ ചെലവിനത്തില് ഈടാക്കരുതെന്ന നിര്ദേശവും കമീഷന് ഉത്തരവിലുണ്ട്.തോപ്പുംപടി രാമേശ്വരം വില്ലേജിലെ ഏതാനും സര്വേ നമ്പറുകളിലെ സ്കെച്ച് ആവശ്യപ്പെട്ട് കരുവേലിപ്പടി സ്വദേശി പി.എക്സ്. ജേക്കബ് സമര്പ്പിച്ച പരാതിയാണ് ഉത്തരവിന് കാരണമായത്.
ബി.പി.എല് വിഭാഗത്തില്പെട്ട ആളായതിനാല് സൗജന്യമായി വിവരങ്ങള് നല്കണമെന്ന് ആവശ്യപ്പെട്ടിരുന്നെങ്കിലും അത് നിരാകരിച്ചെന്നും കോര്പറേഷന് സെക്രട്ടറിയുടെ സര്ട്ടിഫിക്കറ്റ് ഹാജരാകാത്തതിനാല് സ്കെച്ച് ഒന്നിന് 571 രൂപ വീതം 3426 രൂപ അടയ്ക്കാന് നിര്ദേശിച്ചെന്നുമാണ് പരാതിയിലുണ്ടായിരുന്നത്.
https://www.facebook.com/Malayalivartha
