ലോക്‌സഭാ തെരഞ്ഞെടുപ്പ് മുന്നില്‍ കണ്ട് പ്രവാസികളുടെ വോട്ട് പെട്ടിയില്‍ വീഴ്ത്താന്‍ മുഖ്യമന്ത്രി പിണറായി വിജയന്റെ സൈക്കോളജിക്കല്‍ മൂവ്. കേരളത്തില്‍ നിന്ന് ഗള്‍ഫ് നാടുകളിലേക്കുള്ള വിമാനയാത്രാകൂലി സ്വകാര്യ കമ്പനികള്‍ കുത്തനെ വര്‍ധിപ്പിച്ച നടപടി പിന്‍വലിപ്പിക്കുന്നതിന് ഇടപെടണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന്‍ സിവില്‍ വ്യോമയാന മന്ത്രി സുരേഷ് പ്രഭുവിന് കത്തയച്ചു. വിമാന നിരക്ക് 2019 ഫെബ്രുവരിയില്‍ നിലവിലുണ്ടായിരുന്ന നിലയിലേക്ക് പുനഃസ്ഥാപിക്കണമെന്ന് മുഖ്യമന്ത്രി പറഞ്ഞു. ഏപ്രില്‍, മെയ് മാസങ്ങളില്‍ കേരളത്തില്‍ വിദ്യാലയങ്ങള്‍ക്ക് വേനല്‍ അവധിയാണ്. ഈ വേളയില്‍ വലിയ തോതില്‍ മലയാളികള്‍ കേരളത്തിലേക്കും തിരിച്ചും യാത്ര ചെയ്യുന്നുണ്ട്. ഇതിനിടയിലാണ് 200 മുതല്‍ 400 ശതമാനം വരെ എയര്‍ലൈന്‍ കമ്പനികള്‍ നിരക്ക് വര്‍ധിപ്പിച്ചത്. 

തിരുവനന്തപുരം, കൊച്ചി, കോഴിക്കോട് എന്നീ മൂന്നിടത്തുനിന്നുമുള്ള നിരക്കുകള്‍ ഈ തോതില്‍ വര്‍ധിപ്പിച്ചിട്ടുണ്ട്. ബോയിംഗ് 737 മാക്‌സ് 8 വിഭാഗത്തില്‍പ്പെട്ട ഏതാനും വിമാനങ്ങള്‍ സുരക്ഷാ കാരണങ്ങളാല്‍ പിന്‍വലിച്ചിട്ടുണ്ടെങ്കിലും അതൊന്നും ചാര്‍ജ് വര്‍ധനവിന് ന്യായീകരണമാകുന്നില്ല. യാത്രാക്കൂലി വര്‍ധിപ്പിക്കരുതെന്ന് സിവില്‍ ഏവിയേഷന്‍ ഡയറക്ടര്‍ക്ക്! ജനറല്‍ നിര്‍ദേശിച്ചതായി റിപ്പോര്‍ട്ടുകളുണ്ട്. എന്നാല്‍ യാത്രക്കാര്‍ കൂടുതലുള്ള ഇപ്പോഴത്തെ സാഹചര്യം മുതലാക്കാന്‍ വിമാനകമ്പനികള്‍ തയ്യാറായിരിക്കുകയാണ്. ഗള്‍ഫ് മേഖലയില്‍ പണിയെടുക്കുന്ന ഭൂരിഭാഗം കേരളീയരും ചുരുങ്ങിയ വേതനം ലഭിക്കുന്നവരാണ്. അവരെ സംബന്ധിച്ച് ഇപ്പോഴത്തെ നിരക്ക് വര്‍ധന തങ്ങാനാവില്ല. വിമാനകമ്പനികള്‍ യോജിച്ച് നിരക്ക് കൂട്ടിയിരിക്കുകയാണെന്ന ആശങ്കയും യാത്രക്കാരിലുണ്ട്. ഈ സാഹചര്യം വിലയിരുത്തി അടിയന്തിരമായി ഇടപെടണമെന്ന് കേന്ദ്രമന്ത്രിക്കയച്ച കത്തില്‍ മുഖ്യമന്ത്രി ആവശ്യപ്പെട്ടു.

ഇന്ത്യയില്‍ ഏറ്റവും കൂടുതല്‍ പ്രവാസി വോട്ടര്‍മാരുള്ളത് കേരളത്തിലാണ്. ആ വോട്ടില്‍ കണ്ണ്‌നട്ടാണ് മുഖ്യമന്ത്രി ഇക്കാര്യം ആവശ്യപ്പെട്ടത്. സാധാരണ വേനലവധിക്കാലത്ത് വിമാനക്കമ്പനികള്‍ ചാര്‍ജ്ജ് വര്‍ദ്ധിപ്പിക്കുന്നത് പതിവാണ്. അത് മുന്നില്‍ കണ്ട് സ്വകാര്യ വിമാനക്കമ്പനികളുമായി ചര്‍ച്ച നടത്താന്‍ പോലും സര്‍ക്കാര്‍ തയ്യാറായില്ല. കണ്ണൂര്‍ വിമാനത്താവളത്തിലേക്ക് വലിയ വിമാനക്കമ്പനികള്‍ സര്‍വ്വീസ് നടത്താത്തതിനെ തുടര്‍ന്ന് ചര്‍ച്ചയ്ക്ക് മുഖ്യമന്ത്രി മുന്‍കൈ എടുത്തിരുന്നു. പ്രവാസികള്‍ ഏറ്റവും കൂടുതല്‍ വിമാനമിറങ്ങുകയും പോവുകയും ചെയ്യുന്ന കരിപ്പൂര്‍ വിമാനത്താവളത്തോട് കേന്ദ്രസര്‍ക്കാര്‍ കാണിക്കുന്ന അവഗണനയ്‌ക്കെതിരെ മുഖ്യമന്ത്രി കാര്യമായ രീതിയില്‍ ഇടപെട്ടില്ല. യു.ഡി.എഫ് എം.പി പി.കെ കുഞ്ഞാലിക്കുട്ടി നേരിട്ട് ഇടപെട്ടാണ് പ്രശ്‌നങ്ങള്‍ക്ക് ഒരുവിധം പരിഹരിക്കാനായത്. 

പ്രവാസി വോട്ട് ലക്ഷ്യംവെച്ച് മുഖ്യമന്ത്രി കത്തയച്ച സാഹചര്യത്തില്‍ പ്രധാനമന്ത്രി നരേന്ദ്രമോദി ഇടപെട്ട് വിമാന കമ്പനികളോട് നിരക്ക് കുറയ്ക്കാന്‍ ആവശ്യപ്പെട്ടാല്‍ മുഖ്യമന്ത്രി പിണറായിക്കും എല്‍.ഡി.എഫിനും തിരിച്ചടിയാകും. ബി.ജെ.പിക്ക് തെരഞ്ഞെടുപ്പ് നേട്ടവുമാകും. കേന്ദ്രസര്‍ക്കാരില്‍ നിന്ന് കേരളത്തിന് കാര്യമായി ഒന്നും ലഭിക്കുന്നില്ലെന്ന് പരാതി പറയുന്നവരാണ് മുഖ്യമന്ത്രിയും മുന്നണിയും. അതിനാല്‍ വിമാനചാര്‍ജ്ജ് കുറച്ച ശേഷം സംസ്ഥാനം ആവശ്യപ്പെട്ടത് ചെയ്‌തെന്ന് പറഞ്ഞ് ജനങ്ങളെ സമീപിക്കാനും കേന്ദ്രം ഒന്നും ചെയ്യുന്നില്ലെന്ന് പറയുന്നവരുടെ വാ അടപ്പിക്കാനും അതിലൂടെ കഴിയും. അതിനാല്‍ മുഖ്യമന്ത്രി പിണറായി വിജയന്റെ നീക്കം അട്ടിമറിക്കാന്‍ സംസ്ഥാനത്തെ ബി.ജെ.പി നേതാക്കള്‍ ഇത്തരത്തിലൊരു നീക്കം നടത്തുന്നുണ്ടെന്ന് അറിയുന്നു.