അനുപമ ഇത് വേറെ ലെവലാ... വോട്ട് ചോദിച്ചു ചോദിച്ച് സുരേഷ് ഗോപി ചെന്നത് പുലിമേടയില്; തോമസ് ചാണ്ടിയെ മുട്ടുകുത്തിച്ച പഴയ ആലപ്പുഴ ജില്ലാ കളക്ടറായ ടി.വി. അനുപമയുടെ മുമ്പില് സുരേഷ് ഗോപിയുടെ മാസ് ഡയലോഗ് വിലപോയില്ല
തൃശൂര് കളക്ടര് അനുപമയെ എല്ലാവര്ക്കുമറിയാം. തോമസ് ചാണ്ടിയെ മുട്ടുകുത്തിച്ച പഴയ ആലപ്പുഴ ജില്ലാ കളക്ടര്. ഒരു ഭരണകൂടം ഒന്നിച്ച് നിന്നിട്ടും ഈ യുവ ഐഎഎസ് ഓഫീസറെ തോല്പ്പിക്കാനായില്ല. പകരം തോമസ് ചാണ്ടിയ്ക്ക് മന്ത്രിസ്ഥാനം രാജിവയ്ക്കേണ്ടിയും വന്നു. ഇപ്പോള് സുരേഷ് ഗോപിയാണ് പെട്ടിരിക്കുന്നത്.
അയ്യപ്പന്റെ പേരില് വോട്ട് തേടിയതിന് തൃശ്ശൂരിലെ എന്ഡിഎ സ്ഥാനാര്ത്ഥിയും രാജ്യസഭാ എംപിയുമായ സുരേഷ് ഗോപിക്ക് തൃശ്ശൂര് ജില്ലാ കളക്ടര് ടിവി അനുപമ നോട്ടീസയച്ചു. 48 മണിക്കൂറിനകം വിശദീകരണം നല്കണമെന്നാണ് ആവശ്യപ്പെട്ടിരിക്കുന്നത്.
അയ്യപ്പന് ഒരു വികാരം ആണെങ്കില് കേരളത്തില് മാത്രമല്ല ഇന്ത്യയിലും അത് അലയടിച്ചിരിക്കുമെന്നും ശബരിമല വിഷയത്തിന്റെ പശ്ചാത്തലത്തിലാണ് താന് വോട്ട് അപേക്ഷിക്കുന്നത് എന്നും സുരേഷ് ഗോപി തൃശൂരില് പറഞ്ഞത്. ശബരിമല വിഷയം താന് പ്രചാരണായുധമാക്കില്ലെന്ന് അണികളോടു പറഞ്ഞ സുരേഷ് ഗോപി എന്നാല് കേരളത്തിലെ കുടുംബങ്ങളിലെ ചര്ച്ച ഇതാണെന്നും കൂട്ടിച്ചേര്ത്തു. ഈ മാസ് ഡയലോഗിനെതിരെയാണ് അനുപമ രംഗത്തെത്തിയത്.
തെരഞ്ഞെടുപ്പില് ജാതിയും മതവും പറഞ്ഞ് വോട്ട് തേടരുതെന്ന മുഖ്യ തെരഞ്ഞെടുപ്പ് ഓഫീസറുടെ നിര്ദേശം ലംഘിച്ചതിനാണ് നോട്ടീസ്. പെരുമാറ്റച്ചട്ട ലംഘനമാണ് സുരേഷ് ഗോപി നടത്തിയതെന്ന് ജില്ലാ കളക്ടര് ടി വി അനുപമ വ്യക്തമാക്കി.
കഴിഞ്ഞ ദിവസം സ്വരാജ് റൗണ്ടില് നടത്തിയ റോഡ് ഷോയ്ക്ക് പിന്നാലെ തേക്കിന്കാട് മൈതാനിയില് എന്ഡിഎ നടത്തിയ തെരഞ്ഞെടുപ്പ് കണ്വെന്ഷനിലാണ് സുരേഷ് ഗോപി ശബരിമലയെ മുന്നിര്ത്തി വോട്ട് ചോദിക്കുന്നുവെന്ന് വോട്ടര്മാരോട് പറഞ്ഞത്.
യുവ ഐഎഎസുകാരില് ഏറ്റവും ശ്രദ്ധനേടിയയാളാണ് തൃശൂര് കളക്ടര് കൂടിയായ ടി.വി. അനുപമ. ഐഎഎസ് ഓഫീസര്മാരായ ശ്രീറാം വെങ്കിട്ടരാമന്, ഐപിഎസ് ഓഫീസര്മാരായ യതീഷ് ചന്ദ്ര, ചൈത്ര തെരേസ എന്നിങ്ങനെ ആ പേര് നീളുന്നു. അവസാനം മൂന്നാര് സബ് കളക്ടര് ഡോ. രേണു രാജിലെത്തിയിരിക്കുകയാണ്. ശക്തമായ നിലപാടെടുത്ത്, ചെയ്യുന്ന ജോലിയോട് ആത്മാര്ഥത പുലര്ത്തിയ യുവ ഐഎഎസ് ഉദ്യോഗസ്ഥര്ക്ക് കേരളമാകെ എപ്പോഴും അഭിനന്ദനപ്രവാഹമാണ് നല്കാറുള്ളത്.
നോക്കുകൂലി, പച്ചക്കറികളിലെ കീടനാശിനികളുടെ അമിതസാന്നിധ്യം, ഭക്ഷ്യവസ്തുക്കളിലെ മായം കലര്ത്തല് എന്നിവയ്ക്കെതിരെ വിട്ടുവീഴ്ചയില്ലാത്ത നിലപാടുകള് സ്വീകരിച്ചതോടെയാണ് ടി.വി. അനുപമ വമ്പന് ബ്രാന്ഡുകള് ഉള്പ്പെടെ പലരുടെയും കണ്ണിലെ കരടായത്. അനുപമയുടെ നിലപാടുകള് ജനശ്രദ്ധ നേടി. തമിഴ്നാട്ടില് നിന്നെത്തുന്ന വിഷം തളിച്ച പച്ചക്കറികള്ക്കെതിരെ നടപടി സ്വീകരിച്ചു. കേരളത്തെ വിഷം തീറ്റിക്കില്ലെന്ന അനുപമയുടെ ഉറച്ച തീരുമാനം മലയാളികളെ പോലും ഇരുത്തിചിന്തിപ്പിച്ചു. നേരത്തേ, എട്ടു മാസം ആലപ്പുഴ ജില്ലാ കലക്ടര് ആയപ്പോള് സര്ക്കാരിനെ വിറപ്പിച്ചാണ് അനുപമ നിലകൊണ്ടത്.
കുട്ടനാട് എംഎല്എ തോമസ് ചാണ്ടിക്കു മന്ത്രിപദം നഷ്ടമാക്കിയ വിവാദ ഭൂമി ഇടപാടുകള് സംബന്ധിച്ച നടപടിയിലൂടെയും അനുപമ ശ്രദ്ധാകേന്ദ്രമായി. കലക്ടറുടെ അന്വേഷണ റിപ്പോര്ട്ട് നിര്ണായകമായിരുന്നു. മുന് കലക്ടര് വീണ എന്.മാധവന് തുടങ്ങി വച്ച അന്വേഷണം പൂര്ത്തിയാക്കിയാണ് അനുപമ റിപ്പോര്ട്ട് നല്കിയത്. എന്നാല്, ഈ റിപ്പോര്ട്ട് ഹൈക്കോടതിയുടെ വിമര്ശനത്തിനും വഴിയൊരുക്കി. ഒടുവില് മന്ത്രിയുടെ രാജിയുമുണ്ടായി.
എന്തായാലും സിനിമയിലെ മാസ് ഡയലോഗ്കാരന് കളക്ടര് ടി.വി. അനുപമയ്ക്ക് റിപ്പോര്ട്ട് നല്കിയേ മതിയാകൂ. അനുപമയുടെ തീരുമാനത്തിലായിരിക്കും സുരേഷ് ഗോപി എന്ന സ്ഥാനാര്ത്ഥിയുടെ ഭാവി.
https://www.facebook.com/Malayalivartha
