വടകരയിലെ കോണ്‍ഗ്രസ് സ്ഥാനാര്‍ത്ഥി കെ.മുരളീധരനെതിരെ അട്ടിമറി നീക്കം ശക്തം. മുരളിയെ വടക്കാഞ്ചേരി മോഡലില്‍ ഇല്ലാതാക്കാന്‍ ശ്രമിക്കുന്നത് മറ്റാരുമല്ല കോണ്‍ഗ്രസുകാര്‍ തന്നെയാണെന്നാണ് റിപ്പോര്‍ട്ട്. 

മാതൃഭൂമി നടത്തിയ സര്‍വേയില്‍ വടകരയില്‍ പി. ജയരാജന്‍ ജയിക്കുമെന്ന് തെളിഞ്ഞത് അട്ടിമറി ശ്രമത്തിന്റെ ഫലമായാണെന്ന് മനസിലാക്കുന്നു. 

മുരളിയുടെ രാഷ്ട്രീയ വളര്‍ച്ചയില്‍ അറപ്പും വെറുപ്പുമുള്ള കോണ്‍ഗ്രസ് നേതാക്കള്‍ നിരവധിയുണ്ട്. അത് കരുണാകരന്റെ പിന്തുടര്‍ച്ചക്കും കോണ്‍ഗ്രസിലെ ഗ്രൂപ്പു വഴക്കിന്റെയും ഭാഗമായിരുന്നു. മുരളിയെ വട്ടിയൂര്‍കാവില്‍ സ്ഥാനാര്‍ത്ഥിയാക്കുമ്പോള്‍ കോണ്‍ഗ്രസിലെ ഉയര്‍ന്ന നേതാക്കള്‍ വരെ ഇതിനെതിരെ രംഗത്തെത്തിയിരുന്നു. വട്ടിയൂര്‍കാവ് മണ്ഡലത്തില്‍ (നോര്‍ത്ത്) നിന്നും ജയിച്ചിരുന്നവര്‍ തന്നെയാണ് ഇതിനെതിരെ ആദ്യം ശബ്ദമുയര്‍ത്തിയത്. എന്നാല്‍ മണ്ഡലത്തില്‍ മുരളി വന്നു, കണ്ടു, കീഴടക്കി. അതാണ് മുരളിയുടെ ശീലം. 

ഐ ഗ്രൂപ്പുകാരനാണ് മുരളീധരന്‍. പക്ഷേ എ ഗ്രൂപ്പുമായി അദ്ദേഹം ഏറെ അടുപ്പം പുലര്‍ത്തുന്നു. ഉമ്മന്‍ ചാണ്ടിയും എ കെ ആന്റണിയുമായും മികച്ച ബന്ധമാണ് മുരളിക്കുള്ളത്. എന്നാല്‍ മുരളിയുടെ സംസാരമാണ് പ്രശ്‌നം. മുരളിയുടെ മുനകൂടിയ വാചകങ്ങള്‍ക്ക് മുമ്പില്‍ പലപ്പോഴും കോണ്‍ഗ്രസ് നേതാക്കള്‍ നിശബ്ദരായി പോകാറുണ്ട്. മാധ്യമങ്ങള്‍ക്ക് മുരളി ഹോട്ട് സ്‌പോട്ടാണ്. തനതായ ശൈലിയും തനതായ സ്വഭാവരീതിയും പുലര്‍ത്തുന്ന മുരളിക്ക് മുമ്പില്‍ മറ്റ് നേതാക്കള്‍ അപ്രസക്തരാകാറുണ്ട്. 

കെ പി സി സി അധ്യക്ഷന്‍ എന്ന നിലയില്‍ മുരളിയുടെ സംഭാവനകള്‍ വിലമതിക്കാന്‍ കഴിയാത്തതാണ്. എന്നാല്‍ അത് രാജിവച്ചാണ് വൈദ്യുതി മന്ത്രിയാകാന്‍ ഇറങ്ങി പുറപ്പെട്ടത്. അവിടെ നിന്നും മുരളിയുടെ പരാജയം ആരംഭിച്ചു. വട്ടിയൂര്‍കാവ് എം എല്‍ എ പദ്ധതിയില്‍ നിന്നും വടകര എം പി പദവിയില്‍ പദമൂന്നിനുള്ള ആഗ്രഹം മുരളിയെ തറപറ്റിക്കും എന്ന് അടക്കം പറയുന്നവരാണ് കോണ്‍ഗ്രസിലെ പല നേതാക്കളും.

നേതാക്കളെ തെരഞ്ഞടുപ്പുകളില്‍ തോല്‍പ്പിച്ച് ഇല്ലാതാക്കുക എന്ന നയമാണ് കോണ്‍ഗ്രസ് സാധാരണ പിന്തുടരുന്നത്. മുമ്പും വടക്കാഞ്ചേരിയില്‍ മുരളിയോട് പ്രയോഗിച്ചത് ഇതേ നയമാണ്. 

കഴിഞ്ഞ നിയമസഭാ തെരഞ്ഞടുപ്പില്‍ മുരളിയെ വട്ടിയൂര്‍കാവില്‍ നിന്നും തോല്‍പ്പിക്കാന്‍ ശ്രമം നടന്നിരുന്നു. എന്നാല്‍ അത് വേണ്ടത്ര വിജയിച്ചില്ല. ഏഴായിരത്തില്‍പരം വോട്ടുകള്‍ക്ക് മുരളി ജയിച്ചു. ടി.എന്‍ സീമയായിരുന്നു അന്ന് ഇടതുപക്ഷ സ്ഥാനാര്‍ത്ഥി. പക്ഷേ കുമ്മനവുമായിട്ടായിരുന്നു മത്സരം. കുമ്മനം രണ്ടാം സ്ഥാനത്ത് എത്തുകയും ചെയ്തു. 

ഏത് പ്രതിസന്ധിയെയും അതിജീവിക്കാനുള്ള ശക്തി മുരളിക്കുണ്ട്. അത് തന്നെയാണ് അദ്ദേഹത്തിന്റെ വിജയത്തിന്റെ അടിസ്ഥാനം. വയനാട്ടില്‍ രാഹുല്‍ മത്സരിക്കുമ്പോള്‍ വടകരയില്‍ മുരളി തോല്‍ക്കാന്‍ പാടില്ല. വരും ദിവസങ്ങളില്‍ കോണ്‍ഗ്രസിന്റെ ഉയര്‍ന്ന നേതാക്കള്‍ രംഗത്ത് എത്തിയേക്കാം. എന്നാല്‍ ഐ ഗ്രൂപ്പ് നേതാക്കള്‍ വടകര ശ്രദ്ധിക്കുന്നില്ല എന്നത് ഒരു സത്യം തന്നെയാണ്. 

മുരളി തോറ്റാല്‍ അത് കോണ്‍ഗ്രസിലെ ഗ്രൂപ്പ് വഴക്ക് ശക്തമാക്കും. അതിന് ഇടവരുത്താതിരിക്കാന്‍ കോണ്‍ഗ്രസ് ശ്രദ്ധിക്കും. അട്ടിമറി സാധ്യത മുന്‍കൂട്ടി കണ്ട് മുരളിയാകട്ടെ ശ്രദ്ധയോടെയാണ് നീങ്ങുന്നത്.