വിഷു ആഘോഷങ്ങള്‍ക്കായി ബുധനാഴ്ച വൈകീട്ട് മുതല്‍ 10 ദിവസത്തേക്ക് ശബരിമല നട തുറക്കും. തെരഞ്ഞെടുപ്പ് പ്രചാരണം കൊടുമ്പിരി കൊണ്ടിരിക്കെ, ശബരിമല രാഷ്ട്രീയകരുനീക്കങ്ങള്‍ക്ക് വേദിയാകുമെന്ന് അഭ്യൂഹം ഉയരുന്നു. യുവതി പ്രവേശനത്തിനെതിരായ സമരം തങ്ങള്‍ക്ക് ഗുണം ചെയ്തുവെന്നാണ് പ്രചാരണം ചൂടുപിടിച്ചതോടെ ബി.ജെ.പി വിലയിരുത്തുന്നത്.

വിഷുവിനു നട തുറക്കുമ്പോള്‍ ശബരിമല വീണ്ടും ശ്രദ്ധാകേന്ദ്രമാകുന്നത് തങ്ങള്‍ക്ക് കുറച്ചുകൂടി ഗുണമുണ്ടാക്കുമെന്നാണ് ബി.ജെ.പി, ആര്‍.എസ്.എസ് നേതാക്കള്‍ പറയുന്നത്.ഇതിനായി പ്രധാനമന്ത്രി മോദിയെ ശബരിമലയില്‍ എത്തിക്കാന്‍ ആലോചിക്കുന്നുണ്ട്. മോദി ശബരിമലയിലെത്തി ആചാരസംരക്ഷണം സംബന്ധിച്ച് പ്രഖ്യാപനം നടത്തുന്നത് വലിയ തരംഗത്തിന് ഇടവരുത്തുമെന്നാണ് ആര്‍.എസ്.എസ് വിലയിരുത്തുന്നതത്രേ.

ശബരിമലയെ തെരഞ്ഞെടുപ്പ് പ്രചാരണവിഷയമാക്കരുതെന്ന തെരഞ്ഞെടുപ്പ് കമീഷന്റെ വിലക്കാണ് ഇതിനു വിലങ്ങുതടിയായുള്ളത്. മോദി പെട്ടെന്ന് എത്തുന്നത് 41 ദിവസത്തെ വ്രതാനുഷ്ഠാനത്തിനു ശേഷമാണോ എന്ന ചോദ്യമുയരുമെന്ന ആശങ്കയും ആര്‍.എസ്.എസിനുണ്ട്. വിഷു പൂജാവേളയില്‍ യുവതികളെത്തിയാല്‍ തടയുന്നതിനു സര്‍വ സന്നാഹങ്ങളുമായി കാവല്‍ നില്‍ക്കാന്‍ പ്രവര്‍ത്തകരെ സജ്ജീകരിച്ചിട്ടുണ്ടെന്നാണ് വിവരം.

യുവതികളെത്തിയാല്‍ ശക്തമായ പ്രതിഷേധം ഉയര്‍ത്താമെന്നും അതോടെ ശബരിമല വീണ്ടും സജീവ ചര്‍ച്ചയാക്കാമെന്നും അവര്‍ വിലയിരുത്തുന്നു. കുംഭമാസ പൂജക്കായി ഫെബ്രുവരിയിലും ഉത്സവത്തിനായി മാര്‍ച്ചിലും നടതുറന്നപ്പോള്‍ യുവതികളെ തടയുന്നതിനായി കര്‍മസമിതിയുടെ നാമമാത്രം പ്രവര്‍ത്തകരാണ് ഉണ്ടായിരുന്നത്.

രാത്രിയില്‍ നടയടക്കുന്ന വേളയില്‍ നടന്നുവന്ന നാമജപ പ്രതിഷേധവും ഈ ദിവസങ്ങളില്‍ ഉണ്ടായില്ല. ഇതര സംസ്ഥാനക്കാരായ ഏതാനും യുവതികളെത്തിയിരുന്നെങ്കിലും അവരെ കടത്തിവിടാന്‍ പൊലീസ് തയാറായതുമില്ല.യുവതികള്‍ കയറുന്നതാണ് തങ്ങള്‍ക്ക് ഗുണമെന്ന കണക്ക് കൂട്ടലിലാണ് കര്‍മസമിതിക്കാര്‍ ആ ദിവസങ്ങളില്‍ വിട്ടുനിന്നതെന്ന് പറയപ്പെട്ടിരുന്നു.

യുവതികള്‍ കയറുന്നത് ജനങ്ങളില്‍ വലിയ പ്രതിഷേധത്തിനു കാരണമാകുമെന്നതിനാലാണ് ഒരു യുവതിപോലും കയറാതിരിക്കാനുള്ള ജാഗ്രതയില്‍ പൊലീസ് നിലയുറപ്പിച്ചതെന്നും ചൂണ്ടിക്കാട്ടപ്പെട്ടിരുന്നു. തെരഞ്ഞെടുപ്പ് അടുത്ത സമയത്ത് ശബരിമലയില്‍ പ്രശ്‌നങ്ങളുണ്ടാകുന്നതിനെ ഇടതുപക്ഷവും ബി.ജെ.പിയും ഭയപ്പെട്ടിരുന്നു.