ആലപ്പുഴയിലെ വോട്ടര്മാരുടെ തെരഞ്ഞെടുപ്പ് മന:ശാസ്ത്രം പ്രത്യേക തരത്തിലുള്ളതാണ്, നിയമസഭാ തെരഞ്ഞെടുപ്പില് എല്.ഡി.എഫിനൊപ്പം നീന്തുകയും ലോക്സഭാ തെരഞ്ഞെടുപ്പില് യു.ഡി.എഫിനൊപ്പം തുഴയെറിയുകയും ചെയ്യുന്ന ചരിത്രമാണ് കിഴക്കിന്റെ വെനീസിനുള്ളത്
ആലപ്പുഴയിലെ വോട്ടര്മാരുടെ തെരഞ്ഞെടുപ്പ് മന:ശാസ്ത്രം പ്രത്യേക തരത്തിലുള്ളതാണ്. നിയമസഭാ തെരഞ്ഞെടുപ്പില് എല്.ഡി.എഫിനൊപ്പം നീന്തുകയും ലോക്സഭാ തെരഞ്ഞെടുപ്പില് യു.ഡി.എഫിനൊപ്പം തുഴയെറിയുകയും ചെയ്യുന്ന ചരിത്രമാണ് കിഴക്കിന്റെ വെനീസിനുള്ളത്. ആലപ്പുഴ ജില്ലയിലെ അരൂര്, ചേര്ത്തല, ആലപ്പുഴ, അമ്പലപ്പുഴ, ഹരിപ്പാട്, കായംകുളം നിയമസഭാ മണ്ഡലങ്ങളും കൊല്ലം ജില്ലയിലെ കരുനാഗപ്പള്ളിയും ചേര്ന്നതാണ് ആലപ്പുഴ പാര്ലമെന്റ് മണ്ഡലം. ഹരിപ്പാട് ഒഴിച്ചുള്ള നിയമസഭ മണ്ഡലങ്ങള് ഇടതുപക്ഷത്തിനൊപ്പമാണ്. എന്നാല് ലോക്സഭാ തെരഞ്ഞെടുപ്പില് യു.ഡി.എഫിനൊപ്പമാണ് ആലപ്പുഴയുടെ ജനമനസ്. 12 ലോക്സഭാ തെരഞ്ഞെടുപ്പുകള് ഇവിടെ നടന്നപ്പോള് എട്ട് തവണയും യു.ഡി.എഫ് സ്ഥാനാര്ത്ഥികളാണ് വിജയിച്ചത്. സി.പി.ഐയിലെ പി.കെ വാസുദേവന് നായരും സി.പി.എമ്മിലെ സുശീലാ ഗോപാലനും അടക്കമുള്ള പ്രമുഖരും ഇവിടെ അട്ടിമറി വിജയം നടത്തിയിട്ടുണ്ട്.
അതിഥികളെ അകമഴിഞ്ഞ് സ്നേഹിക്കുന്നവരാണ് ആലപ്പുഴക്കാര്. തൃശൂരുകാരനായ വി.എം സുധീരനെ നാല് തവണയാണ് ഇവര് പാര്ലമെന്റിലേക്ക് അയച്ചത്. ഒരു തവണ അപരനായ സുധീരന് ചിലര് വോട്ട് മാറി കുത്തിയത് കൊണ്ട് മാത്രമാണ് പരാജയപ്പെട്ടത്. തിരുവനന്തപുരത്തുകാരനായ വക്കം പുരുഷോത്തമന് രണ്ട് തവണ ആലപ്പുഴ എംപിയായി. പിന്നീട് പയ്യപ്പൂരുകാരനായ കെ.സി വേണുഗോപാല് ആലപ്പുഴ എം.എല്.എയും 2008ലും 14ലും എം.പിയുമായി. ആലപ്പുഴക്കാരായ സുശീലാ ഗോപാലനും ടി.ജെ ആഞ്ചലോസും കെ.എസ് മനോജും ഓരോ തവണ വീതം ഇവിടെ നിന്ന് പാര്ലമെന്റിലെത്തിയിട്ടുണ്ട്. ലോക്സഭ തെരഞ്ഞെടുപ്പില് ദേശീയടിസ്ഥനത്തില് ചിന്തിക്കുന്നവരാണ് ആലപ്പുഴയിലെ വോട്ടര്മാര്.
വിദ്യാര്ത്ഥി രാഷ്ട്രീയ കാലം മുതല് ആലപ്പുഴയില് നിറഞ്ഞു നില്ക്കുന്ന അഡ്വ. ഷാനിമോള് ഉസ്മാനെയാണ് യു.ഡി.എഫ് ഇത്തവണ മത്സരത്തിനിറക്കിയിരിക്കുന്നത്. നിയമസഭ മണ്ഡലങ്ങളിലെ മുന്തൂക്കത്തിന്റെ അടിസ്ഥാനത്തില് എല്.ഡി.എഫ് അരൂര് എം.എല്.എ എ.എം ആരിഫിനെ സ്ഥാനാര്ത്ഥിയാക്കി. മണ്ഡലത്തില് രണ്ടരലക്ഷം മുസ്്ലിംവോട്ടുകളുണ്ട്. അത് ലക്ഷ്യംവെച്ചാണ് സി.പി.എം ആരിഫിനെ ഇറക്കിയത്. അപ്പോഴേക്കും സിറ്റിംഗ് എം.പി കെ.സി വേണുഗോപാല് മത്സരരംഗത്ത് നിന്ന് പിന്മാറുകയും ഷാനിമോള് ഉസ്മാന് നറുക്ക് വീഴുകയുമായിരിരുന്നു. അതിനാല് കടുത്തമത്സരമാണ് ഇക്കുറി. ഷാനിമോള് ഉസ്മാനും കെ.സി വേണുഗോപാലും തമ്മിലുള്ള പോര് തെരഞ്ഞെടുപ്പ് പ്രചരണത്തില് തിരിച്ചടിയാകുമോ എന്ന ആശങ്ക യു.ഡി.എഫിലെ ചിലരെങ്കിലും പങ്കുവയ്ക്കുന്നുണ്ട്. ഡി.സി.സി പ്രസിഡന്റ് ഷുക്കൂറും എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശനുമായുള്ള അഭിപ്രായഭിന്നതയും ഷാനിമോള്ക്ക് ജയിക്കുന്ന സീറ്റ് കൊടുത്തില്ലെന്ന വെള്ളാപ്പള്ളിയുടെ പരാമര്ശവും തിരിച്ചടിയാകുമെന്ന ആശങ്കയും യു.ഡി.എഫ് ക്യാമ്പിനുണ്ട്.
സിപിഎമ്മിലെ ഗ്രൂപ്പ് രാഷ്ട്രീയത്തിന്റെ ഭാഗമായി സ്ഥാനാര്ത്ഥിത്വം ഏറ്റെടുക്കേണ്ടിവന്ന ആരിഫ് ഔദ്യോഗിക നേതൃത്വത്തിന്റെ കണ്ണിലെ കരടാണ്. കൂടാതെ സ്വന്തം മണ്ഡലമായ അരൂരില് ഇടത് ഭരണത്തിന് കീഴില്പോലും കാര്യമായ പദ്ധതികള് എത്തിക്കാന് കഴിയാത്തതില് ജനവികാരവും ശക്തമാണ്. അരൂരിന് പുറത്തുള്ള മണ്ഡലങ്ങളില് പരിചിതനല്ലാത്തതും പ്രചരണ രംഗത്ത് ആരിഫിനെ പ്രതികൂലമായി ബാധിക്കുന്നുണ്ട്. മുന് പി.എസ്.സി ചെയര്മാന് ഡോ.കെ.എസ് രാധാകൃഷ്ണനാണ് എന്ഡിഎ സ്ഥാനാര്ത്ഥി. ബി.ജെ.പിക്ക് വലിയ വേരോട്ടമില്ലാത്ത മണ്ണാണ് ആലപ്പുഴ. കെ.എസ് രാധാകൃഷ്ണന് കോണ്ഗ്രസ് പാളയത്തില് നിന്നാണ് ഇവിടെ ബി.ജെ.പിക്ക് വേണ്ടി കളത്തിലിറങ്ങിയിരിക്കുന്നത്. കൂടാതെ എസ്യുസിഐ, എസ്ഡിപിഐ,പിഡിപി സ്ഥാനാര്ത്ഥികളും മത്സര രംഗത്തുണ്ട്.
https://www.facebook.com/Malayalivartha
