ഇത്രയും വലിയ സ്റ്റാറായ സുരേഷ് ഗോപിക്ക് നമ്മുടെ വീട്ടിലുണ്ടാക്കുന്ന ചാളയും മരിച്ചീനിയും ഒഴിച്ചുകൂട്ടാനും മാത്രം എങ്ങനെ നല്‍കും. തൃശൂരിലെ വോട്ടുകാരുടെ മനസാണ് ഇപ്പോള്‍ ഏറെ ചര്‍ച്ചയാകുന്നത്. ഉച്ചയ്ക്ക് ഒരു മണിയായാല്‍ വീട്ടമ്മമാരുടെ മനസില്‍ ആധിയാണ്. കാരണം തെരഞ്ഞെടുപ്പ് പ്രചാരണത്തിന്റെ ഭാഗമായി ഫീല്‍ഡിലായ സുരേഷ് ഗോപി ഏത് വീട്ടിലും കയറാം. നല്ല നാടന്‍ ഊണ് കഴിക്കുകയാണ് ലക്ഷ്യം. കറി കുറവാണെന്ന് പറഞ്ഞാലൊന്നും സുരേഷ് ഗോപി പിന്‍മാറില്ല. ഉള്ളത് മതിയെന്നേ. എന്നാലും വീട്ടമ്മമാര്‍ക്കൊരിതില്ലേ... ആ വലിയ നടന് നമ്മളുണ്ടാക്കുന്ന സാധാരണ ചാളക്കറിയും ചോറും ഇഷ്ടപ്പെടുമോ ആവോ. സുരേഷ് ഗോപിയുണ്ടോ വിടുന്നു. ചോറുണ്ടിട്ടേ അടങ്ങൂ. അവസാനം ഉണ്ട ചോറിന് നന്ദി കാട്ടി അഭിനന്ദനവും പറഞ്ഞേ പോകൂ. അതോടെ ആ വീട്ടമ്മയും താരമാകുകയാണ്. സുരേഷ് ഗോപിച്ച് ചോറ് കൊടുത്ത ചേച്ചിയാ... അറിയില്ലേ എന്നാണ് നാട്ടില്‍ പരിചയപ്പെടുത്തുന്നത്.

വൈകി എത്തി സ്ഥാനാര്‍ഥിയാണെങ്കിലും പ്രചാരണത്തില്‍ മികച്ച സാന്നിധ്യമാണ് തൃശൂരിലെ എന്‍ഡിഎ സ്ഥാനാര്‍ഥി സുരേഷ്‌ഗോപി നടത്തുന്നത്. വോട്ടുപിടിക്കാന്‍ താരം കണ്ടെത്തിയ മാര്‍ഗങ്ങളും സജീവ ചര്‍ച്ചയാണ് സമൂഹമാധ്യമങ്ങളില്‍. വോട്ടിനൊപ്പം ചോറും കൂടി ചോദിച്ചാണ് താരം സുരേഷ്‌ഗോപി കളം നിറഞ്ഞത്.

ഏതായാലാലും സുരേഷ് ഗോപിയുടെ ചോറുണ്ണല്‍ സൂപ്പര്‍ ഹിറ്റാണ്. അതിനിടെ മോഹല്‍ലാല്‍ പറഞ്ഞിട്ടാണ് ചോറ് ചോദിക്കുന്നതെന്നാണ് റിപ്പോര്‍ട്ട്. അതായത് പ്രചാരണത്തിന്റെ ഈ തന്ത്രം വര്‍ഷങ്ങള്‍ക്ക് മുന്‍പ് മോഹന്‍ലാല്‍ അവതരിപ്പിച്ചതാണെന്നാണ് സൈബര്‍ ലോകം പറയുന്നത്. അവര്‍ ഈ സീന്‍ പങ്കുവയ്ക്കുകയും ചെയ്യുന്നു. 

1987ല്‍ തന്നെ ലാലേട്ടന്‍ ഈ സീനൊക്കെ വിട്ടതാണ് സുരേഷേട്ടാ എന്നാണ് ട്രോള്‍ ലോകത്തെ ഡയലോഗ്. തമ്പി കണ്ണന്താനം സംവിധാനം ചെയ്ത 'ഭൂമിയിലെ രാജാക്കന്മാര്‍' എന്ന സിനിമയില്‍ മോഹന്‍ലാലിന്റെ മഹേന്ദ്രവര്‍മ എന്ന കഥാപാത്രം വോട്ടു തേടി നടക്കുന്ന രംഗം ഇതിന് സമാനമാണ്. മണ്ഡലത്തിലെ വോട്ടറായ ഒരു ചേട്ടത്തിയുടെ വീട്ടില്‍ കയറിച്ചെന്ന് വിശക്കുന്നുണ്ടെന്ന് പറഞ്ഞ് അടുക്കളയില്‍ കയറി കപ്പയും മീന്‍കറിയും കഴിക്കുന്ന മോഹന്‍ലാല്‍, വോട്ടു നേടാന്‍ രാഷ്ട്രീയക്കാര്‍ നടത്തുന്ന സൂത്രപ്പണികളെ തിരശീലയില്‍ നിന്നും സുരേഷ്‌ഗോപി പ്രചാരണത്തില്‍ പുനരാവിഷ്‌കരിക്കുകയായിരുന്നു. ഈ ചിത്രത്തില്‍ ഒരു കഥാപാത്രമായി സുരേഷ്‌ഗോപിയും എത്തുന്നുണ്ട്. 

എന്നാല്‍ താനിത് ആദ്യമായല്ല ഇങ്ങനെ ചെയ്യുന്നതെന്നാണ് സുരേഷ് ഗോപി പറയുന്നത്. എന്റെ സിനിമാക്കാരോടു ചോദിച്ചാല്‍ അവര്‍ പറഞ്ഞു തരും. ഞാനിത് ഇരുപതു ഇരുപത്തിയഞ്ച് വര്‍ഷങ്ങളായി ചെയ്യുന്നതാണ്. ഷൂട്ടിങ് കഴിയുമ്പോള്‍ കൃത്യമായി കാറില്ലെങ്കില്‍ അപ്പോള്‍ ഓട്ടോ പിടിച്ചു കേറിപ്പോകും. സമയത്തു ഭക്ഷണം തന്നില്ലെങ്കില്‍, സമീപത്തുള്ള ഏതെങ്കിലും വീട്ടില്‍ കയറി ചോറു ചോദിച്ചു വാങ്ങിക്കഴിക്കും. എനിക്കതിനകത്ത് ഒരു നാണവുമില്ല. അതു തന്നെയാണ് ഇപ്പോഴും ചെയ്തുള്ളൂ സുരേഷ് ഗോപി നയം വ്യക്തമാക്കി.