എറണാകുളത്ത് നിന്ന് കേസന്വേഷണത്തിനായി തമിഴ്നാട്ടിൽ പോയ പൊലീസ് സംഘത്തിന്‍റെ വാഹനം അപകടത്തില്‍പ്പെട്ട് ഒരാൾ മരിച്ചു . തമിഴ്‌നാട്ടിൽ കോയമ്പത്തൂർ വെച്ചാണ് അപകടമുണ്ടായത് . അപകടത്തില്‍ അഞ്ച് പേർക്ക് പരിക്കേറ്റു. തൃപ്പൂണിത്തുറ സ്വദേശിയായ പെൺകുട്ടിയെ കാണാതായ സംഭവം അന്വേഷിക്കാനാണ് സംഘം തമിഴ്‌നാട്ടിലേക്ക് പോയത്. പെൺകുട്ടിയുടെ ബന്ധുവായ ഹരിനാരായണൻ ആണ് മരിച്ചത്.

ഒരു എ എസ് ഐയുടെ നേതൃത്വത്തിലുള്ള നാലംഗ സംഘമാണ് അന്വേഷണത്തിനായി തമിഴ്നാട്ടിലേക്ക് പോയത്. എ എസ് ഐ വിനായകൻ, സിവിൽ പൊലീസ് ഓഫീസർമാരായ രാജേഷ്, അർനോൾഡ്, ഡിനിൽ എന്നിവർക്കാണ് പരിക്കേറ്റത്. ഇവർക്കൊപ്പം ഉണ്ടായിരുന്ന ബന്ധുവിനും പരിക്കേറ്റിട്ടുണ്ട്. എ എസ് ഐ വിനായകന്‍റെ ആരോഗ്യ നില ഗുരുതരമാണ്. ഇവരെ കോയമ്പത്തൂർ കോവൈ മെഡിക്കൽ കോളേജിൽ പ്രവേശിപ്പിച്ചു. സംഘം സഞ്ചരിച്ച സ്വകാര്യ വാഹനം മറ്റൊരു വാഹനവുമായി കൂട്ടിയിടിച്ചാണ് അപകടം.