തെരഞ്ഞെടുപ്പ് ഫലം വരുന്നതിന് മുമ്പ് ഒരുമുഴം മുമ്പേയെറിഞ്ഞ് തുഷാര്‍ വെള്ളാപ്പള്ളി. എന്‍ഡിഎ അധികാരത്തില്‍ വന്നാല്‍ കേന്ദ്ര സര്‍ക്കാരില്‍ ബിഡിജെഎസ് ഉണ്ടാകുമെന്നാണ് തുഷാര്‍ വെള്ളാപ്പള്ളി പറയുന്നത്. അധികാരങ്ങള്‍ ഇല്ലാതെ ഇനി ഒരു മുന്നണിയിലും തുടരാന്‍ ആകില്ലെന്ന് ബിഡിജെഎസ് സംസ്ഥാന നേതൃയോഗങ്ങള്‍ക്കു ശേഷം തുഷാര്‍ പറഞ്ഞു. തിരഞ്ഞെടുപ്പ് പ്രചാരണത്തില്‍ ബിജെപി പൂര്‍ണമായും സഹകരിച്ചതായും യോഗം വിലയിരുത്തി. 

വയനാട്ടില്‍ രാഹുല്‍ ഗാന്ധിക്കെതിരെ മത്സരിച്ചത് ബിജെപി ദേശീയ നേതൃത്വം ആവശ്യപ്പെട്ടതിനാലാണെന്നു ഓര്‍മിപ്പിച്ചു കൊണ്ടാണു കേന്ദ്രത്തില്‍ സാഹചര്യം ഒത്താല്‍ അധികാരത്തിന്റെ ഭാഗമാകുമെന്നു തുഷാര്‍ തുറന്നു പറഞ്ഞത്. 

അധികാരങ്ങള്‍ ഇല്ലാതെ ഇനി മുന്നോട്ട് പോകില്ലെന്നു പ്രവര്‍ത്തകര്‍ക്കു ഉറപ്പ് നല്‍കിയതായും തുഷാര്‍ പറഞ്ഞു. വയനാട്ടില്‍ ഉള്‍പ്പെടെ എല്ലാ സീറ്റിലും ബിജെപി കാര്യമായി പിന്തുണച്ചു. വയനാട്ടില്‍ രാഹുല്‍ ഗാന്ധി ജയിക്കുമെന്നു പറയാന്‍ വെള്ളാപ്പള്ളി നടേശന്‍ അവിടെ വോട്ടര്‍ ആയിരുന്നോ എന്നു തുഷാര്‍ ചോദിച്ചു. 

അതേസമയം വയനാട്, മാവേലിക്കര, ആലത്തൂര്‍ മണ്ഡലങ്ങളില്‍ ബിജെപി സംഘടന സംവിധാനം പൂര്‍ണമായും പിന്തുണച്ചില്ലെന്ന പരാതി ഭാരവാഹികള്‍ യോഗത്തില്‍ ഉന്നയിച്ചു.

കേരളത്തില്‍ എന്‍ഡിഎ മൂന്ന് സീറ്റുകള്‍ നേടുമെന്നാണ് പാര്‍ട്ടിയുടെ വിലയിരുത്തലെന്ന് തുഷാര്‍ വെള്ളാപ്പള്ളി വ്യക്തമാക്കി. ബിജെപി ശക്തമല്ലാത്ത ചിലയിടങ്ങളില്‍ പ്രചാരണത്തില്‍ പ്രശ്‌നങ്ങള്‍ നേരിട്ടെന്നും തുഷാര്‍ ആലപ്പുഴയില്‍ പറഞ്ഞു. വയനാട്ടില്‍ തുടക്കത്തില്‍ പ്രചാരണവുമായി ബന്ധപ്പെട്ട് ചില ബുദ്ധിമുട്ടുകളുണ്ടായിരുന്നു. 

തെരഞ്ഞെടുപ്പ് പ്രചാരണവുമായി ബന്ധപ്പെട്ട് ബിഡിജെഎസ് വയനാട് ജില്ലാ സെക്രട്ടറി നടത്തിയ പ്രസ്താവന തെറ്റാണ്. ബിജെപി അവിടെ സഹകരിച്ചില്ലെന്ന അഭിപ്രായം ബിഡിജെഎസിനില്ല. പ്രസ്താവനയുമായി ബന്ധപ്പെട്ട് ജില്ലാ സെക്രട്ടറിയോട് വിശദീകരണം ചോദിച്ചതായും തുഷാര്‍ വെള്ളാപ്പള്ളി വ്യക്തമാക്കി. പ്രധാനമന്ത്രിയും അമിത് ഷായും വയനാട്ടില്‍ പ്രചാരണത്തിന് വരാത്തതില്‍ പരാതി ഇല്ല. പ്രധാനമന്ത്രിയുടെ പാക് പരാമര്‍ശമൊന്നും വയനാട്ടില്‍ ദോഷം ചെയ്യില്ല. എന്‍ഡിഎ അധികാരത്തില്‍ വരികയാണെങ്കില്‍ അര്‍ഹിച്ച അംഗീകാരങ്ങളും സ്ഥാനവും ലഭിക്കുമെന്നാണ് പ്രതീക്ഷയെന്നും തുഷാര്‍ കൂട്ടിച്ചേര്‍ത്തു.

വയനാട് ലോക്‌സഭാ മണ്ഡലത്തില്‍ എന്‍ഡിഎ സ്ഥാനാര്‍ത്ഥി തുഷാര്‍ വെള്ളാപ്പള്ളിയുടെ തെരഞ്ഞടുപ്പ് പ്രചാരണത്തില്‍ ബിജെപി നേതാക്കള്‍ വിട്ടുനിന്നെന്ന് ആരോപണവുമായി ബിഡിജെഎസ് നേതാക്കള്‍ രംഗത്തെത്തിയത് ഏറെ വിവാദമായിരുന്നു. ഇത് വോട്ടെടുപ്പ് ദിവസത്തിലടക്കം പ്രകടമായെന്ന് ബിഡിജെഎസ് ജില്ലാ പ്രസിഡന്റ് പറഞ്ഞത്.

കോണ്‍ഗ്രസിന്റെ പ്രധാനമന്ത്രി സ്ഥാനാര്‍ത്ഥി രാഹുല്‍ ഗാന്ധിക്കെതിരെ മത്സരിക്കുമ്പോള്‍ യോജിച്ച പ്രവര്‍ത്തനം ഉണ്ടാകുമെന്ന് ദേശീയ നേതാക്കള്‍ ബിഡിജെഎസ് നേതത്വത്തിന് ഉറപ്പ് നല്‍കിയിരുന്നു. എന്നാല്‍ അതുണ്ടായില്ല. മണ്ഡലത്തിലെത്തുമെന്ന് പറഞ്ഞ ദേശീയ നേതാക്കളെത്താത്തതും ദോഷം ചെയ്‌തെന്നും ഷാജി പറഞ്ഞു. വയനാട് മണ്ഡലത്തില്‍ എന്‍ഡിഎ സംവിധാനം പൂര്‍ണ പരാജയമായിരുന്നെന്നും അദ്ദേഹം പറഞ്ഞു. 

വോട്ട് കുറഞ്ഞാല്‍ പൂര്‍ണ ഉത്തരവാദിത്തം ബിജെപി നേതാക്കള്‍ക്കായിരിക്കും. സ്ഥാനാര്‍ഥിയുടെ ചിഹ്നം താമര അല്ലാത്തതുകൊണ്ടുതന്നെ ചിഹ്നം വോട്ടര്‍മാരില്‍ നല്ല രീതിയില്‍ പരിചയപ്പെടുത്തേണ്ടതായിരുന്നു. ഇക്കാര്യം തുടക്കം മുതല്‍ തന്നെ എന്‍ഡിഎ യോഗങ്ങളിലും ബിജെപി നേതാക്കളോടും ആവശ്യപ്പെട്ടുവെങ്കിലും ആരും ചെവിക്കൊണ്ടില്ല. അമിത് ഷാ ഉള്‍പ്പെടെ പരമാവധി ദേശീയ നേതാക്കളെ മണ്ഡലത്തില്‍ എത്തിക്കാനായിരുന്നു തുടക്കത്തിലുണ്ടാക്കിയ തീരുമാനം. അതുണ്ടായില്ല. സ്മൃതി ഇറാനി റോഡ് ഷോയില്‍ പങ്കെടുക്കുമെന്ന് പ്രചാരണം നടത്തിയെങ്കിലും അവരും തിരിഞ്ഞുനോക്കിയില്ല. സമ്മര്‍ദങ്ങള്‍ക്കൊടുവില്‍ നിര്‍മല സീതാരാമനെ കൊണ്ടുവന്നുവെന്നു മാത്രമെന്നാണ് പരാതി.