വില്ലേജ് ഓഫീസുകളില്‍ സ്വൈപ്പിങ് യന്ത്രം വരുന്നു. ഇതോടെ നികുതിയടക്കം ചെറിയതും വലിയതുമായ എല്ലാ തുകകളും എ.ടി.എം. കാര്‍ഡുപയോഗിച്ച് അടയ്ക്കാം. വില്ലേജ് ഓഫീസുകള്‍ കറന്‍സിരഹിതമാകുമെന്നതും ബാങ്കിലും ട്രഷറിയിലും പണമടയ്ക്കാനുള്ള ഉദ്യോഗസ്ഥരുടെ നെട്ടോട്ടം അവസാനിക്കുമെന്നതുമാണ് മെച്ചം.

സംസ്ഥാനത്തെ വില്ലേജ് ഓഫീസുകളില്‍ നികുതി, റവന്യു റിക്കവറി, ഒറ്റത്തവണ കെട്ടിടനികുതി തുടങ്ങി സര്‍ക്കാരിലേക്ക് ലഭിക്കാനുള്ള ഒട്ടനവധി ഫീസുകള്‍ കാലങ്ങളായി പണമായാണ് സ്വീകരിച്ചിരുന്നത്.
5000 രൂപയില്‍ കൂടുതല്‍ വില്ലേജ് ഓഫീസര്‍ കൈവശംവെക്കരുതെന്ന് ചട്ടമുണ്ടെങ്കിലും പലപ്പോഴും അരലക്ഷം വരെയൊക്കെ ഇവര്‍ കൊണ്ടുനടക്കേണ്ടി വന്നിരുന്നു. ഇത്തരത്തില്‍ ശേഖരിക്കുന്ന പണം ബാങ്കുകളിലും ട്രഷറിയിലുമൊക്കെ അടയ്ക്കുന്നതുവരെ ഓഫീസര്‍മാര്‍ക്ക് ഉറക്കമുണ്ടാകില്ല.

പണം ഓഫീസില്‍ സൂക്ഷിക്കുന്നത് സുരക്ഷിതമല്ലാത്തതിനാല്‍ ഓഫീസര്‍മാര്‍ വീട്ടില്‍ കൊണ്ടുപോകുകയാണ് ചെയ്തിരുന്നത്. കൈയില്‍നിന്ന് നഷ്ടപ്പെട്ടാല്‍ അതിന്റെ ഉത്തരവാദിത്വത്തില്‍നിന്ന് ഇവര്‍ക്ക് ഒഴിഞ്ഞുമാറാനുമാകില്ല. പണം ആഴ്ചയിലൊരിക്കലോ മറ്റോ പല ബാങ്ക് അക്കൗണ്ടുകളിലും ട്രഷറിയിലുമൊക്കെ അടയ്ക്കാന്‍ വില്ലേജ് ഓഫീസര്‍മാര്‍ പോകുമ്പോള്‍ വില്ലേജ് ഓഫീസിലെ ജോലികള്‍ തടസ്സപ്പെടുന്നതും പതിവായിരുന്നു. ഇത്തരം പ്രശ്‌നങ്ങള്‍ക്കെല്ലാം പരിഹാരമാകുന്നതാണ് പുതിയ നടപടി.

ഓണ്‍ലൈനായ എല്ലാ വില്ലേജ് ഓഫീസുകളിലും സ്വൈപ്പിങ് യന്ത്രം സ്ഥാപിച്ച് നികുതിദായകന്റെ എ.ടി.എം. കാര്‍ഡുപയോഗിച്ച് നികുതിയും മറ്റു ഫീസുകളും ബാങ്ക് അക്കൗണ്ടില്‍നിന്ന് നേരിട്ട് സര്‍ക്കാര്‍ അക്കൗണ്ടിലേക്ക് എത്തുന്ന സംവിധാനമാണ് നടപ്പില്‍വരുന്നത്. സംസ്ഥാന ഐ.ടി. മിഷനും ഫെഡറല്‍ ബാങ്കും ചേര്‍ന്നാണ് ഇതു നടപ്പാക്കുന്നത്. ആദ്യഘട്ടത്തില്‍ കണ്ണൂര്‍ ജില്ലയില്‍ യന്ത്രം സ്ഥാപിക്കാനുള്ള പ്രവര്‍ത്തനങ്ങള്‍ ആരംഭിച്ചുകഴിഞ്ഞു. ഇവിടെയുള്ള 132 വില്ലേജ് ഓഫീസുകളിലേക്കുള്ള യന്ത്രങ്ങള്‍ കളക്ടറേറ്റില്‍ എത്തി.
ഓണ്‍ലൈനായ 125 വില്ലേജുകളില്‍ ഈ മാസാവസാനത്തോടെ യന്ത്രം സ്ഥാപിക്കും. അടുത്തമാസം മുതല്‍ മറ്റു ജില്ലകളിലേക്കും പദ്ധതി വ്യാപിപ്പിക്കും.