സുപ്രീം കോടതി പരിസരത്ത് 144 പ്രഖ്യാപിച്ചു. ചീഫ് ജസ്റ്റിസിനെതിരായ ലൈംഗികാരോപണത്തില്‍ പ്രതിഷേധം ഉയര്‍ന്നതിന് തൊട്ടുപിന്നാലെയാണ് നടപടി. പ്രതിഷേധിച്ചവരെ അറസ്റ്റ് ചെയ്തുനീക്കി.  ലൈംഗികാരോപണം നേരിട്ട സുപ്രീം കോടതി ചീഫ് ജസ്റ്റീസിന് ക്ലീന്‍ ചിറ്റ് നല്‍കിയതില്‍ സ്ത്രീകൂട്ടായ്മയുടെ നേതൃത്വത്തിലാണ് കോടതിക്ക് മുന്നില്‍ പ്രതിഷേധം നടന്നത്. ഇന്നലെയാണ് സുപ്രീം കോടതി ആഭ്യന്തര അന്വേഷണ സമിതി ചീഫ് ജസ്റ്റീസിന് ക്ലീന്‍ ചിറ്റ് നല്‍കിയത്. സുപ്രീം കോടതിയിലെ മുന്‍ ജീവനക്കാരിയാണ് ചീഫ് ജസ്റ്റീസിനെതിരേ ആരോപണം ഉന്നയിച്ചത്.

ക്ലീന്‍ചിറ്റ് നല്‍കിയ വിധി സംബന്ധിച്ച് സുപ്രീംകോടതി വെബ്‌സൈറ്റില്‍ അപ്‌ലോഡ് ചെയ്ത വാര്‍ത്താക്കുറിപ്പില്‍ പറയുന്നത് ഇങ്ങനെ: മുന്‍ജീവനക്കാരി കഴിഞ്ഞമാസം പത്തൊന്‍പതിന് നല്‍കിയ പരാതിയില്‍ പറഞ്ഞിട്ടുളള ആരോപണങ്ങളില്‍ കഴമ്പില്ലെന്ന് ജസ്റ്റിസ് എസ്.എ. ബൊബ്‌ഡെ അധ്യക്ഷനായ ആഭ്യന്തരഅന്വേഷണസമിതി കണ്ടെത്തി. ചീഫ് ജസ്റ്റിസ് രഞ്ജന്‍ ഗൊഗൊയിക്കെതിരായ ലൈംഗിക പീഡന ആരോപണം സംബന്ധിച്ച അന്വേഷണത്തിന്റെ റിപ്പോര്‍ട്ട് ഇന്നലെ മുതിര്‍ന്ന ജഡ്ജിക്ക് കൈമാറി. റിപ്പോര്‍ട്ടിന്റെ പകര്‍പ്പ് ആരോപണവിധേയനായ ചീഫ് ജസ്റ്റിസിനും നല്‍കി. 2003ലെ ഇന്ദിരാ ജയ്‌സിങ് കേസില്‍ സുപ്രീംകോടതി ആഭ്യന്തരഅന്വേഷണത്തിന്റെ റിപ്പോര്‍ട്ട് പരസ്യമാക്കരുതെന്ന് വിധിയുണ്ടെന്നും വാര്‍ത്താക്കുറിപ്പില്‍ പറയുന്നു.

ഏത് മുതിര്‍ന്ന ജഡ്ജിക്കാണ് റിപ്പോര്‍ട്ട് കൈമാറിയതെന്ന് വാര്‍ത്താക്കുറിപ്പില്‍ വ്യക്തമാക്കിയിട്ടില്ല. നീതി കിട്ടില്ലെന്ന് ചൂണ്ടിക്കാട്ടി പരാതിക്കാരി നേരത്തേ പിന്മാറിയിരുന്നു. അതേസമയം, പരാതി കൈകാര്യം ചെയ്യുന്ന രീതി ഫുള്‍കോര്‍ട്ട് വിളിച്ച് പരിശോധിക്കണമെന്ന് ജസ്റ്റിസ് ഡി.വൈ. ചന്ദ്രചൂഡ് ആവശ്യപ്പെട്ടതായി ഇംഗ്ലീഷ് ദിനപത്രം റിപ്പോര്‍ട്ട് ചെയ്തു. ആഭ്യന്തര അന്വേഷണസമിതിയുടെ അധ്യക്ഷന്‍ ജസ്റ്റിസ് എസ്.എ. ബൊബ്‌ഡെയെ നേരില്‍ കണ്ട് ചന്ദ്രചൂഡ് ഇക്കാര്യം ആവശ്യപ്പെട്ടെന്നും റിപ്പോര്‍ട്ടുകളുണ്ട്. പരാതിക്കാരിയും നടപടിക്കെതിരെ രംഗത്തെത്തിയിരുന്നു.