കോണ്‍ഗ്രസ്, ബിജെപി ഇതര മൂന്നാം മുന്നണിയും ദക്ഷിണേന്ത്യയില്‍നിന്നൊരു പ്രധാനമന്ത്രിയും ലക്ഷ്യമിട്ട് തെലങ്കാന മുഖ്യമന്ത്രി കെ.ചന്ദ്രശേഖര്‍ റാവു (കെസിആര്‍). ഇന്നലെ കേരളത്തിലെത്തി മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തിയതും വരും ദിവസങ്ങളില്‍ കെസിആര്‍ നടത്താനിരിക്കുന്ന കൂടിക്കാഴ്ചകളുമാണ് അഭ്യൂഹം ശക്തമാക്കിയിരിക്കുന്നത്. 1996-ലേതു പോലെ ദക്ഷിണേന്ത്യയില്‍ നിന്നൊരു പ്രധാനമന്ത്രിയെന്ന കാര്യം കെസിആര്‍, പിണറായി വിജയനുമായി ചര്‍ച്ച ചെയ്തുവെന്നാണ് റിപ്പോര്‍ട്ട്. എന്നാല്‍ പ്രധാനമന്ത്രിപദത്തിലേക്ക് ആരെയും നിര്‍ദേശിച്ചിട്ടില്ല. തിരഞ്ഞെടുപ്പ് ഫലപ്രഖ്യാപനത്തിനു ശേഷം ഇക്കാര്യത്തില്‍ സിപിഎം കേന്ദ്ര നേതൃത്വം നിലപാട് വ്യക്തമാക്കും. ആദ്യമായാണ് കെസിആര്‍ ഇടതുപാര്‍ട്ടികളുമായി ഇക്കാര്യം ചര്‍ച്ച ചെയ്യുന്നത്.

ബിജെപിയുമായും കോണ്‍ഗ്രസുമായും സമദൂരം പാലിക്കുന്ന കെസിആര്‍ എന്നാല്‍ അടുത്തിടെ വിവിധ വിഷയങ്ങളില്‍ കേന്ദ്രസര്‍ക്കാരിനെയും നരേന്ദ്ര മോദിയെയും പിന്തുണച്ചിരുന്നു. ബിജെപിയുടെ ബി ടീമാണു ടിആര്‍എസ് എന്ന് കോണ്‍ഗ്രസ് വിമര്‍ശനം ഉന്നയിക്കുകയും ചെയ്തു. മൂന്നാം മുന്നണിയുണ്ടാക്കാനുള്ള നീക്കം ബിജെപിയെ സഹായിക്കുകയെയുള്ളുവെന്നും കോണ്‍ഗ്രസ് കുറ്റപ്പെടുത്തി. കഴിഞ്ഞ വര്‍ഷം കെസിആര്‍, മമതാ ബാനര്‍ജിയുമായും നവീന്‍ പട്നായിക്കുമായും ചര്‍ച്ച നടത്തിയിരുന്നു.

ചന്ദ്രശേഖര്‍ റാവു 13നു ഡിഎംകെ അധ്യക്ഷന്‍ എം.കെ. സ്റ്റാലിന്‍ ഉള്‍പ്പെടെയുള്ളവരുമായും ചര്‍ച്ച നടത്തുന്നുണ്ട്. കര്‍ണാടക മുഖ്യമന്ത്രി എച്ച്.ഡി. കുമാരസ്വാമിയുമായും റാവു ചര്‍ച്ച നടത്തിയിരുന്നു. കേന്ദ്രത്തില്‍ ബിജെപിക്കും കോണ്‍ഗ്രസിനും സര്‍ക്കാരുണ്ടാക്കാനാകാത്ത സാഹചര്യം വന്നാല്‍ കിങ് മേക്കര്‍ പദവിയില്‍ സ്വയം പ്രതിഷ്ഠിക്കാനുള്ള ശ്രമങ്ങളുടെ ഭാഗമാണു റാവുവിന്റെ കൂടിക്കാഴ്ചയെന്നു രാഷ്ട്രീയ നിരീക്ഷകര്‍ വിലയിരുത്തുന്നു.

ഇന്നലെ വൈകിട്ടാണ് ചന്ദ്രശേഖര്‍ റാവു ക്ലിഫ് ഹൗസിലെത്തി മുഖ്യമന്ത്രിയെ കണ്ടത്. കൂടിക്കാഴ്ച ഒരു മണിക്കൂറോളം നീണ്ടു. തിരഞ്ഞെടുപ്പിനു ശേഷം തെലങ്കാന രാഷ്ട്ര സമിതിയും (ടിആര്‍എസും) സിപിഎമ്മും ഉള്‍ക്കൊള്ളുന്ന പാര്‍ട്ടികളുടെ കൂട്ടായ്മയുണ്ടാക്കാനുള്ള സാധ്യതകളും സാഹചര്യങ്ങളുമാണ് പ്രധാനമായി ചര്‍ച്ച ചെയ്തതെന്നാണു സൂചന. ടിആര്‍എസ് എംപിമാരായ ബി.വിനോദ് കുമാര്‍, സന്തോഷ് കുമാര്‍ എന്നിവരും ചര്‍ച്ചകളില്‍ പങ്കെടുത്തു.

കുടുംബസമേതം കേരളത്തിലെത്തിയ റാവു കോവളത്താണ് താമസിക്കുന്നത്. ഭാര്യ കെ.ശോഭയും പേരക്കുട്ടികളും ഒപ്പമുണ്ട്. നാളെ വൈകിട്ട് അദ്ദേഹം കന്യാകുമാരിയിലേക്കു പോകും. രാമേശ്വരം, ശ്രീരംഗം ക്ഷേത്രങ്ങളിലും സന്ദര്‍ശനം നടത്തുന്നുണ്ട്. തിരഞ്ഞെടുപ്പു പ്രഖ്യാപനത്തിനു മുന്‍പ് ഫെഡറല്‍ മുന്നണിയെന്ന ആശയവുമായി റാവു ചെന്നൈയിലെത്തി സ്റ്റാലിനെ കണ്ടിരുന്നു. എന്നാല്‍, കോണ്‍ഗ്രസ് മുന്നണിയില്‍ ഉറച്ചു നിന്ന ഡിഎംകെ, രാഹുല്‍ ഗാന്ധിയെ പ്രധാനമന്ത്രി സ്ഥാനാര്‍ഥിയായി ഉയര്‍ത്തിക്കാട്ടുകയും ചെയ്തു.

ബിജെപി, കോണ്‍ഗ്രസ് മുന്നണിയില്‍ ഇല്ലാത്ത പാര്‍ട്ടികള്‍ തിരഞ്ഞെടുപ്പില്‍ 120 സീറ്റ് വരെ നേടുമെന്നും അടുത്ത സര്‍ക്കാര്‍ രൂപീകരണത്തില്‍ ഈ പാര്‍ട്ടികള്‍ നിര്‍ണായക പങ്കുവഹിക്കുമെന്നും റാവുവിന്റെ മകളും എംപിയുമായ കെ.കവിത അടുത്തയിടെ അവകാശപ്പെട്ടിരുന്നു. ഈ നീക്കങ്ങള്‍ക്കു ശക്തിപകരുന്നതാണു ദക്ഷിണേന്ത്യന്‍ നേതാക്കളുമായുള്ള റാവുവിന്റെ ചര്‍ച്ചകള്‍.