കാനറാ ബാങ്കില്‍ നിന്നും 15 വര്‍ഷം മുമ്പെടുത്ത ഭവനവായ്പ മുടങ്ങിയതിന്റെ പേരില്‍ ബാങ്ക് ജപ്തി നടപടിയുമായി മുന്നോട്ട് പോയതോടെ വൈഷ്ണവിയെന്ന പെണ്‍കുട്ടിയും അമ്മ ലേഖയും തീകൊളുത്തി ആത്മഹത്യ ചെയ്ത സംഭവത്തില്‍ നാട് നടുങ്ങിയിരിക്കുകയാണ്. 

തുഛമായ കടം ബാങ്കില്‍ തിരിച്ചടക്കാനാകാത്തതിന്റെ പേരില്‍ ഈ കുടുംബം ആത്മഹത്യ ചെയ്യുന്ന സംഭവം ആദ്യത്തേതല്ല. നിത്യവും വാര്‍ത്തകളില്‍ ഇടംപിടിക്കുന്ന ഇത്തരം കടങ്ങള്‍ എഴുതിത്തള്ളാനോ ഇളവു നല്‍കാനോ അധികൃതരോ ബാങ്കുകളോ തയ്യാറാകുന്നില്ല. എന്നാല്‍ വന്‍കിട തട്ടിപ്പുകാരോടുള്ള മനോഭാവം മറ്റൊന്നാണെന്ന് നേരത്തെ പുറത്തു വന്ന പഞ്ചാബ് നാഷനല്‍ ബാങ്കിലെ തട്ടിപ്പ് വ്യക്തമാക്കുന്നു

9,000 കോടിയുടെ ലോണെടുത്ത് 13,000 കോടിയുടെ കടവുമായി വിജയ് മല്യ ഒരു പോക്കുപോയിട്ട് പിന്നെ ഒരു അഡ്രസുമില്ല. വിജയ് മല്യ സുന്ദരിമാരോടൊപ്പം ഇംഗ്ലണ്ടില്‍ കഴിയുകയാണ്. സാമ്പത്തിക തട്ടിപ്പ് നടത്തി രാജ്യം വിജയ് മല്യയെ പിടികിട്ടാപ്പുള്ളിയായി മുംബൈ അഴിമതി വിരുദ്ധ കോടതി പ്രഖ്യാപിച്ചത് മാത്രം മിച്ചമായി. 2018ലെ ഫ്യുജിറ്റിവ് ഇക്കണോമിക് ഒഫന്‍ഡേഴ്‌സ് ആക്ട് പ്രകാരമാണു നടപടി. ഈ നിയമം ചുമത്തപ്പെടുന്ന ഇന്ത്യയിലെ ആദ്യ പ്രമുഖ വ്യവസായിയാണ് വിജയ് മല്യ. 

ഇന്ത്യയിലെ ബാങ്കുകളില്‍നിന്നു ശതകോടികള്‍ വായ്പയെടുത്തു മുങ്ങി ലണ്ടനില്‍ കഴിയുന്ന വിവാദ വ്യവസായി വിജയ് മല്യയുടെ കടബാധ്യതകളെക്കുറിച്ചു വിവരമില്ലെന്ന നിലപാടിലാണ് കേന്ദ്ര ധനമന്ത്രാലയം. ഇന്ത്യയിലെ വിവിധ ബാങ്കുകളില്‍ നിന്ന് ഒന്‍പതിനായിരം കോടി രൂപ വായ്പയെടുത്തു തിരിച്ചടയ്ക്കാതെ മുങ്ങി ഇംഗ്ലണ്ടില്‍ കഴിയുന്ന വിജയ് മല്യയെ വിട്ടുകിട്ടാന്‍ ഇന്ത്യാ സര്‍ക്കാരിന്റെ വിവിധ ഏജന്‍സികള്‍ നല്‍കിയ കേസില്‍ വെസ്റ്റ് മിനിസ്റ്റര്‍ മ ജിസ്‌ട്രേട്ട് കോടതിയില്‍ വാദം നടക്കുകയാണ്. 2016 മാര്‍ച്ച് രണ്ടിന് ഇന്ത്യ വിട്ട മല്യ ബ്രിട്ടനില്‍ പ്രവാസിയായി കഴിയുകയാണ്. കേസില്‍ രണ്ടുതവണ അറസ്റ്റിലായ മല്യ ജാമ്യത്തിലാണ്.

പഞ്ചാബ് നാഷനല്‍ ബാങ്കില്‍ (പിഎന്‍ബി) അതിസമ്പന്ന വജ്രവ്യാപാരി നീരവ് മോദി ഉള്‍പ്പെട്ട 13,600 കോടി രൂപയുടെ തട്ടിപ്പാണ് പുറത്തുവന്നത്. നീരവ് മോദിക്കും ഒരു ജ്വല്ലറി കമ്പനിക്കുമെതിരെ പിഎന്‍ബിയുടെ രണ്ടു പരാതികള്‍ ലഭിച്ചതായി സിബിഐ സ്ഥിരീകരിച്ചു. എന്‍ഫോഴ്‌സ്‌മെന്റ് ഡയറക്ടറേറ്റും അന്വേഷണം ആരംഭിച്ചു. 

വജ്രത്തിളക്കത്തിന്റെ പകിട്ടില്‍ നിന്നു സാമ്പത്തിക ക്രമക്കേടിന്റെ നിഴലില്‍ എത്തിയിരിക്കുന്നു നീരവ് മോദി. ഇയാള്‍ ആരാണെന്നുള്ള ചോദ്യമാണ് ഇപ്പോള്‍ രാജ്യമെമ്പാടും ഉയരുന്നത്. 'നിരവ് മോദി ചെയ്ന്‍ ഓഫ് ഓഫ് ഡയമണ്ട് ജ്യൂവലറിയുടെ' സ്ഥാപകനും ക്രിയേറ്റീവ് ഡയറക്ടറുമായ നാല്‍പത്തിയേഴുകാരനായ നീരവ് ഇന്ത്യയ്ക്ക് അകത്തും പുറത്തും അറിയപ്പെടുന്ന ആഭരണവ്യാപാരിയും ഡിസൈനറുമാണ്.

ഓസ്‌കര്‍, ഗോള്‍ഡന്‍ ഗ്ലോബ് അവാര്‍ഡ് നിശകളിലൊക്കെ നീരവിന്റെ ആഭരണങ്ങള്‍ അണിഞ്ഞ പ്രമുഖരില്‍ താരാജി പി. ഹെന്‍സണ്‍, ഡകോട്ട ജോണ്‍സണ്‍ തുടങ്ങിയവര്‍ ഉള്‍പ്പെടും. പ്രിയങ്ക ചോപ്രയാണ് നിരവ് ജ്വല്ലേഴ്‌സിന്റെ ബ്രാന്‍ഡ് അംബാസിഡര്‍. ഇതേ പ്രിയങ്ക ചോപ്ര പിന്നീട് പ്രതിപലം നല്കിയില്ല എന്നാരോപിച്ച് നീരവിനെതിരെ കേസും നല്കി. 2016ല്‍ ന്യൂയോര്‍ക്കില്‍ നിരവ് തുടങ്ങിയ സ്‌റ്റോറിന്റെ ഉദ്ഘാടനത്തിന് നവോമി വാട്‌സ്, ലിസാ ഹെയ്ഡന്‍ തുടങ്ങിയ പ്രമുഖര്‍പങ്കെടുത്തിരുന്നു. രാജ്യാന്തര തലത്തില്‍ പ്രമുഖരുടെയിടയില്‍ നീരവിന്റെ സ്വാധീനം ഇതില്‍ നിന്നു വ്യക്തം.

ബെല്‍ജിയത്തിലെ ആന്റ്‌വെര്‍പ് നഗരത്തിലെ ജനവും കുട്ടിക്കാലവും നീരവില്‍ വജ്രവ്യാപാരത്തിലെ താല്‍പര്യം വളര്‍ത്തിയിരുന്നു. വജ്രത്തിന്റെ തലസ്ഥാനം എന്നറിയപ്പെടുന്ന നഗരമാണ് ആന്റ്വെര്‍പ്. തുടര്‍ന്ന് അമേരിക്കയിലെ പെന്‍സില്‍വേനിയയിലുള്ള വാര്‍ട്ടന്‍ സ്‌കൂളിലെ വിദ്യാഭ്യാസം ഇടയ്ക്കു വച്ച് ഉപേക്ഷിച്ച് വജ്രവ്യാപാരത്തിലിറങ്ങി.

മുംബൈ കേന്ദ്രമാക്കി ഫയര്‍സ്റ്റാര്‍ ഇന്റര്‍നാഷനല്‍ എന്ന സ്ഥാപനം നീരവ് തുടങ്ങിയിരുന്നു. 2014ല്‍ ആദ്യത്തെ പ്രമുഖ സ്‌റ്റോര്‍ ഡല്‍ഹിയില്‍ തുടങ്ങി.ഇന്ന് അദ്ദേഹത്തിന്റെ സ്ഥാപനങ്ങള്‍ ചൈന മുതല്‍വടക്കന്‍ അമേരിക്ക വരെ മൂന്നു ഭൂഖണ്ഡങ്ങളില്‍ വ്യാപിച്ചുകിടക്കുന്നു. 

ഇങ്ങനെ കോടികളുമായി മുങ്ങിയ ഇവര്‍ പേരിന് അറസ്റ്റും ജാമ്യവുമായി സുഖിച്ച് കഴിയുമ്പോഴാണ്. ജീവിക്കാനായി കിടപ്പാടം നഷ്ടപ്പെട്ട വേദനയില്‍ ആത്മഹത്യ ചെയ്തത്. ബാങ്കുകള്‍ ഇത് കണ്‍തുറന്ന് കാണണം.