സംസ്ഥാനത്ത് പാചകവാതക വിതരണമേഖലയില് പെരുമാറ്റച്ചട്ടം ഏര്പ്പെടുത്തി ഉത്തരവ്... പാചകവാതക വിതരണമേഖലയിലെ തൊഴിലാളി സംഘടനകള് ഒരുസമരത്തിലേക്കും നീങ്ങരുതെന്ന് പ്രധാന നിര്ദ്ദേശം
സംസ്ഥാനത്ത് അടിക്കടിയുണ്ടാകുന്ന സമരങ്ങള് പാചകവാതക വിതരണത്തെ പ്രതികൂലമായി ബാധിക്കുന്ന സാഹചര്യത്തില് പാചകവാതക വിതരണമേഖലയില് പെരുമാറ്റച്ചട്ടം ഏര്പ്പെടുത്തി ഉത്തരവായി. അവശ്യവസ്തുവെന്ന നിലയില് പാചകവാതകത്തിന്റെ സുഗമമായ വിതരണവും ലഭ്യതയും ഉറപ്പാക്കാനാണ് പെരുമാറ്റച്ചട്ടം കൊണ്ടുവരുന്നതെന്ന് ഭക്ഷ്യ, സിവില് സപ്ലൈസ് വകുപ്പ് ഉത്തരവില് പറയുന്നു. പാചകവാതക വിതരണമേഖലയിലെ തൊഴിലാളി സംഘടനകള് ഒരുസമരത്തിലേക്കും നീങ്ങരുതെന്നാണ് പെരുമാറ്റച്ചട്ടത്തിലെ പ്രധാന നിര്ദേശം.
തൊഴിലുടമക്കൊപ്പം തൊഴില് വകുപ്പ് ഉദ്യോഗസ്ഥര്ക്കും ഡിമാന്ഡ് നോട്ടീസ് നല്കുകയാണ് സംഘടനകള് ചെയ്യേണ്ടത്. തൊഴില്ത്തര്ക്കം സംബന്ധിച്ച വിവരം ലഭിച്ചാല് ഈ ഉദ്യോഗസ്ഥര് 24 മണിക്കൂറിനകം പ്രശ്നപരിഹാരത്തിന് ഇടപെടണം. പെരുമാറ്റച്ചട്ടം ലംഘിച്ച് സമരം നടത്തിയാല് അവശ്യസേവന നിയമത്തിലെ (കെസ്മ) വ്യവസ്ഥകള് പ്രകാരം പാചകവാതക വിതരണം സുഗമമാക്കാന് ജില്ല കലക്ടര് നടപടിയെടുക്കണം.
ടാങ്കര് ലോറി െ്രെഡവര്മാര്ക്കും ക്ലീനര്മാര്ക്കും വര്ഷത്തിലൊരിക്കല് എണ്ണക്കമ്പനികള് പരിശീലനം നല്കുകയും സുരക്ഷ പരിശീലന സര്ട്ടിഫിക്കറ്റ് ഉറപ്പാക്കുകയും വേണം.പാചകവാതക ലോറികളുടെ ഡ്രൈവര്മാര്ക്ക് സാധുവായ ലൈസന്സ് ഉണ്ടെന്ന് മോട്ടോര് വാഹന വകുപ്പും പൊലീസും ഉറപ്പാക്കണം.
സേവന വേതന വ്യവസ്ഥകള് പുതുക്കുന്നതുസംബന്ധിച്ച തര്ക്കങ്ങള് നിലവിലെ കരാര് തീരുന്നതിന് മൂന്നുമാസം മുമ്ബ് തൊഴില് വകുപ്പ് പരിഹരിക്കണം.
സംസ്ഥാന ലേബര് കമീഷണര് ചെയര്മാനായി സംസ്ഥാന സര്ക്കാര് നിയോഗിച്ച സമിതിയാണ് പെരുമാറ്റച്ചട്ടം തയാറാക്കിയത്. ബന്ധപ്പെട്ടവരുമായുള്ള ചര്ച്ചയില് നിര്ദേശിക്കപ്പെട്ട ഭേദഗതികള്കൂടി ഉള്പ്പെടുത്തി അന്തിമരൂപം നല്കി.പാചകവാതക ടാങ്കര് ലോറികള് അപകടത്തില്പെടുമ്പോള് സ്വീകരിക്കേണ്ട നടപടികളും ഇതോടൊപ്പം നിര്ദേശിച്ചിട്ടുണ്ട്.
പാചകവാതക സിലിണ്ടറുകള് കൂടുതല് അളവില് കൊണ്ടുപോകുമ്പോള് ജി.പി.എസ് സഹായത്തോടെ ഗതാഗത വകുപ്പിന്റെ നിരീക്ഷണം ഉണ്ടായിരിക്കുക, ദീര്ഘദൂര ചരക്കുകടത്തിന് രണ്ട് ഡ്രൈവര്മാരുടെ സേവനം ഉറപ്പാക്കുക, പാചകവാതക ഏജന്സികളില് എണ്ണക്കമ്പനി അധികൃതരുടെ സഹായത്തോടെ സിവില് സപ്ലൈസ് ഉദ്യോഗസ്ഥര് പരിശോധന നടത്തുക, ഉപഭോക്താക്കളോട് മോശമായി പെരുമാറുന്ന ഡെലിവറി ജീവനക്കാരെ അറസ്റ്റുചെയ്യുക തുടങ്ങിയവയാണ് മറ്റുനിര്ദേശങ്ങള്.
https://www.facebook.com/Malayalivartha
