ലോകത്തിലെ ഏറ്റവും സമ്പന്നനായ ദൈവമായ ശ്രീ പത്മനാഭസ്വാമിയുടെ ക്ഷേത്രത്തിന് സമീപത്തെ സ്വകാര്യ ഗോശാലയില്‍ പശുക്കളെ പട്ടിണിക്കിട്ട സംഭവം വഴിത്തിരിവിലേക്ക്. സര്‍ക്കാര്‍ നിയമ നടപടിയ്‌ക്കൊരുങ്ങുകയാണ്. 

അതേസമയം സുരേഷ് ഗോപി കൂടി അംഗമായ സ്വകാര്യ ട്രെസ്റ്റിന് കീഴിലുള്ള പശുക്കളുടെ അവസ്ഥ മനുഷ്യ മനസാക്ഷിയെ ഞെട്ടിച്ചിരിക്കുകയാണ്. എല്ലും തോലുമായ 36 പശുക്കളുടെ ജീവന്‍ പോലും അപകടത്തിലാണ്. ഗോമാതാവിന് വേണ്ടി വാദിക്കുന്നവരെ കേരളത്തില്‍ കാണാന്‍ പോലുമില്ല. ഇത് ഉത്തരേന്ത്യയിലായിരുന്നെങ്കില്‍ വന്‍ വിവാദമായേനെ. ഈ വിഷയം രാഷ്ട്രീയമായി ഏറ്റെടുത്തിരിക്കുകയാണ് മന്ത്രിമാരും. അതേസമയം ഇതിനെപ്പറ്റി പ്രതികരിക്കാന്‍ സുരേഷ് ഗോപിയോ മറ്റ് ബിജെപിക്കാരോ രംഗത്തെത്തിയില്ല. 

ഇവിടെയുള്ള പശുക്കളുടെ സംരക്ഷണം ഏറ്റെടുക്കാന്‍ തയാറാണെന്ന് ഗോശാല സന്ദര്‍ശിച്ച മൃഗസംരക്ഷണ മന്ത്രി കെ. രാജു അറിയിച്ചു. സ്വകാര്യ ഗോശാലയില്‍ കണ്ടത് മനഃസാക്ഷിയെ ഞെട്ടിക്കുന്ന ക്രൂരതയാണെന്ന് മന്ത്രി പറഞ്ഞു. മേല്‍ക്കൂരപോലുമില്ലാത്ത സ്ഥലത്താണ് പശുക്കളെ പാര്‍പ്പിച്ചിട്ടുള്ളത്. കൃത്യമായി തീറ്റയും നല്‍കുന്നില്ല. മന്ത്രി നിര്‍ദേശം നല്‍കിയതിനെ തുടര്‍ന്ന് കേരള ഫീഡ്‌സില്‍ നിന്ന് കാലിത്തീറ്റയും ക്ഷീരവികസന വകുപ്പ് പച്ചപ്പുല്ലും ഗോശാലയിലെത്തിച്ചു. വെറ്ററിനറി ഡോക്ടര്‍മാരെത്തി പശുക്കളെ പരിശോധിക്കും. അവരുടെ റിപ്പോര്‍ട്ട് ലഭിച്ചശേഷം ഗോശാല സര്‍ക്കാര്‍ ഏറ്റെടുക്കുന്നത് പരിഗണിക്കുമെന്ന് മന്ത്രി പറഞ്ഞു. 

കുതിരമാളികക്ക് സമീപത്ത് കൊട്ടാരംവക ഭൂമിയിലാണ് ക്ഷേത്രത്തിലേക്ക് പാല്‍ നല്‍കാനായി സിനിമ പ്രവര്‍ത്തകര്‍ ഉള്‍പ്പെടെ അംഗങ്ങളായ ട്രസ്റ്റ് സ്വകാര്യ ഗോശാല തുടങ്ങിയത്. ഇപ്പോള്‍ ക്ഷേത്രത്തിലേക്ക് പാല്‍ നല്‍കുന്നത് പേരിന് മാത്രമാണ്. 36 പശുക്കളാണ് ഇപ്പോള്‍ ഇവിടെ പട്ടിണികിടന്ന് എല്ലുംതോലുമായ അവസ്ഥയിലുള്ളത്. ക്ഷേത്രം ഗോശാലയിലേക്ക് ഈ പശുക്കളെ മാറ്റാന്‍ തയാറാണെന്ന് ട്രസ്റ്റ് ഭാരവാഹികള്‍ പറയുന്നു. പ്രളയവും ശബരിമല പ്രശ്‌നവുമെല്ലാം വന്നതോടെ ഫണ്ട് ലഭിക്കുന്നത് കുറഞ്ഞതാണ് പശുക്കളുടെ പരിപാലനത്തില്‍ പ്രശ്‌നമുണ്ടാകാന്‍ കാരണമെന്നും അവര്‍ പറയുന്നു. ഗോശാലയിലെ പശുക്കുട്ടിയെ പട്ടി കടിച്ചതിനെ തുടര്‍ന്നാണ് ഇവിടത്തെ ദുരവസ്ഥ പുറംലോകം അറിഞ്ഞത്. മന്ത്രി കടകംപള്ളി സുരേന്ദ്രന്‍ കഴിഞ്ഞദിവസം ഗോശാല സന്ദര്‍ശിച്ചിരുന്നു. പശുക്കള്‍ക്ക് മതിയായ തീറ്റ ലഭ്യമാക്കുന്നില്ലെന്ന് മാത്രമല്ല, വൃത്തിഹീനമായ സ്ഥലത്താണ് പാര്‍പ്പിച്ചിട്ടുള്ളതും.

അതേസമയം ഉത്തരേന്ത്യയില്‍ നിന്നും ഞെട്ടിക്കുന്ന സംഭവങ്ങളാണ് ഓരോ ദിവസവും ഉണ്ടാകുന്നത്. പശുവിനെ നല്‍കാന്‍ യു.പിയിലെ ആശ്രമത്തിലേക്കുപോയ ചെങ്ങന്നൂര്‍ സ്വദേശിയുടെ മരണത്തില്‍ ദുരൂഹത ഇപ്പോഴും ഒഴിയുന്നില്ല. ചെങ്ങന്നൂര്‍ പാണ്ഡവന്‍പാറ അര്‍ച്ചന ഭവനത്തില്‍ വിക്രമനാണ് (55) സ്വാമിയോടൊപ്പം പശുവുമായി ഡല്‍ഹിയില്‍ പോയി ദുരൂഹ സാഹചര്യത്തില്‍ മരണമടഞ്ഞത്. ക്ഷീര കര്‍ഷകനായിരുന്ന ഇദ്ദേഹം കറവപ്പശുക്കളുടെ കച്ചവടം നടത്തിയാണ് ഉപജീവനമാര്‍ഗം കണ്ടെത്തിയിരുന്നത്.

പെരിങ്ങാലയിലുള്ള ആശ്രമത്തിലെ സ്വാമിയുടെ ഡല്‍ഹി മധുരവൃന്ദാവന്‍ ആശ്രമത്തിലേക്ക് വെച്ചൂര്‍ പശുവിനെ വാങ്ങാനാണ് സ്വാമി വിക്രമനെയും കൂട്ടി ജൂണ്‍ 16ന് നാട്ടില്‍നിന്ന് പോയതെന്നാണ് ബന്ധുക്കള്‍ പറയുന്നത്. 
23ന് വൈകീട്ട് അഞ്ചുമണിയോടെ അരുണിനെ ഫോണില്‍ വിളിച്ചാണ് പിതാവ് മരിച്ചതായി അറിയിച്ചത്. രാത്രിയില്‍ വിജനമായ സ്ഥലത്ത് അരുണിനെ കൂട്ടിക്കൊണ്ടുപോയി ട്രക്കില്‍ കൊണ്ടുവന്ന മൃതദേഹത്തിന്റെ മുഖം മാത്രം കാണിച്ചു. തിങ്കളാഴ്ച വെളുപ്പിനെ വിമാനത്തില്‍ മൃതദേഹം നാട്ടിലെത്തിച്ചു. മക്കളുടെ പരാതിയില്‍ ചെങ്ങന്നൂര്‍ പോലീസ് കേസെടുത്തിരിക്കുകയാണ്.