റീത്തുമായി പോയത് മരണത്തിലേക്ക്... മരണവീട്ടിലേക്കുള്ള റീത്തുമായി ബൈക്കില്‍ പോകവേ അപകടം, യുവാവിന് ദാരുണാന്ത്യം
റീത്തുമായി പോയത് മരണത്തിലേക്ക്. മരണവീട്ടിലേക്കുള്ള റീത്തുമായി ബൈക്കില്‍ പോകവേയുണ്ടായ അപകടത്തില്‍ യുവാവിന് ദാരുണാന്ത്യം. വെള്ളിമണ്‍ ഇടവട്ടം ചുഴുവന്‍ചിറ സജീഷ് ഭവനില്‍ സജീഷ്‌കുമാറിന്റെ മകന്‍ യദുകൃഷ്ണ(17)നാണ് മരിച്ചത്. കൊട്ടിയം ശ്രീനാരായണ പോളിടെക്‌നിക്കിലെ രണ്ടാംവര്‍ഷ വിദ്യാര്‍ഥിയായ യദുകൃഷ്ണന്‍. കൂടെയുണ്ടായിരുന്ന പതിമൂന്നുകാരനെ ഗുരുതര പരിക്കുകളോടെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
യദുകൃഷ്ണന്‍ പഠനത്തോടൊപ്പം പൂക്കടയിലെ സഹായിയായി ജോലിചെയ്യുന്നുണ്ട്. യാത്ര ചെയ്യവേ മുന്നിലുണ്ടായിരുന്ന സ്‌കൂട്ടര്‍ ഇടറോഡിലേക്ക് തിരിയുന്നതുകണ്ട് ബ്രേക്ക് ചെയ്ത ബൈക്ക് നിയന്ത്രണം വിട്ട് സ്‌കൂട്ടറിലും തുടര്‍ന്ന് വൈദ്യുത തൂണിലും ഇടിക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു.
ഇന്നലെ രാവിലെ 11.30ന് ശിവഗിരിപാങ്ങോട് സംസ്ഥാന പാതയില്‍ കരീപ്ര നടമേല്‍ ജങ്ഷന് സമീപത്താണ് അപകടം നടന്നത്.
വൈദ്യുത തൂണില്‍ തലയിടിച്ച് പരിക്കേറ്റ യദുകൃഷ്ണനെ ഉടന്‍ തന്നെ മീയണ്ണൂരിലെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. പൂക്കട ഉടമയായ ഇടയ്ക്കിടം ഗുരുനാഥന്‍മുകള്‍ സിജു ഭവനില്‍ സിജുവിന്റെ മകന്‍ അജസാണ് ഒപ്പമുണ്ടായിരുന്നത്. അജസിന്റെ ഇടതുകൈയ്ക്കും മുഖത്തുമാണ് പരിക്ക്. സ്‌കൂട്ടര്‍ യാത്രക്കാര്‍ നിസ്സാര പരിക്കുകളോടെ രക്ഷപ്പെട്ടു. യദുകൃഷ്ണന്റെ മൃതദേഹം ആശുപത്രി മോര്‍ച്ചറിയില്‍.
"
https://www.facebook.com/Malayalivartha
