രാഷ്ട്രീയത്തില്‍ പലതരം എതിരഭിപ്രായങ്ങള്‍ ഉണ്ടാകാം. എങ്കിലും പദവികളെ എപ്പോഴും മാനിക്കണം. അല്ലാതെ വായില്‍ തോന്നുന്നത് വിളിച്ചു പറഞ്ഞാല്‍ ഇതായിരിക്കും അവസ്ഥ. തൃശൂരിലാണ് ഏറെ കൗതുകമുണ്ടാകുന്ന സംഭവമുണ്ടായത്. കഴിഞ്ഞ ദിവസം തൃശൂരിലെ പരിപാടിയ്ക്ക് ഔദ്യോഗിക യാത്രക്കിടെയാണ് സംഭവം. മുഖ്യമന്ത്രിയുടെ വാഹനവ്യൂഹം കടന്നുപോകാന്‍ ഗതാഗതം നിയന്ത്രിച്ചതിനാലാണ് യുവാവ് അസ്വസ്ഥനായത്. തുടര്‍ന്ന് എല്ലാവരും കേള്‍ക്കെ ഉച്ചത്തില്‍ അസഭ്യം പറയുകയും ചെയ്തു. കേട്ടു നിന്നവര്‍ യുവാവിന് ആവേശം കയറ്റി പൊട്ടിച്ചിരിച്ചു.

ഈ സ്ഥലത്ത് സുരക്ഷയ്ക്ക് നേതൃത്വം നല്‍കിയത് തൃശൂര്‍ പോലീസ് അസി. കമ്മിഷണറാണ്. യുവാവ് അസഭ്യം പറയുന്നത് അസി. കമ്മീഷണറും കേട്ടു. ആള്‍ക്കാരുടെ ചിരിയും കൂടിയായപ്പോള്‍ സംഭവത്തില്‍ കമ്മീഷണര്‍ ഇടപെട്ടു. അസി. കമ്മിഷണര്‍ യുവാവിനെ ശകാരിച്ചു. എന്തിനാ തെറിവിളിക്കുന്നതെന്ന് ചോദിച്ചു. ഇതോടൊപ്പം ബൈക്കിന്റെ താക്കോല്‍ ഊരിയെടുത്തു. ചുറ്റും പോലീസുകാരും വളഞ്ഞു. ഇതിനിടെ പതറിപ്പോയ യുവാവ് സംഭവം പന്തിയല്ലെന്ന് കണ്ട് കൈ തട്ടിമാറ്റി വണ്ടി എങ്ങനെയോ സ്റ്റാര്‍ട്ട് ചെയ്ത് രക്ഷപ്പെടാന്‍ ശ്രമം നടത്തി. ഇതോടെ കമ്മീഷണറും പോലീസുകാരും വല്ലാതെയായി. വലിയൊരു ജനക്കൂട്ടമാണ് റോഡില്‍. ഉടന്‍ തന്നെ കമ്മീഷണര്‍ വയര്‍ലസിലൂടെ മെസേജ് നല്‍കുയും യുവാവിന് പിറകെ ഓടുകയും ചെയ്തു. കൂടെ ബാക്കിയുള്ള പോലീസുകാരും. പക്ഷെ യുവാവ് രക്ഷപ്പെട്ടു. ഏതാനും മീറ്ററകലെ പോലീസ് സംഘം ബൈക്ക് വീണ്ടും തടഞ്ഞെങ്കിലും നിര്‍ത്താതെ പോകാന്‍ യുവാവ് ശ്രമിച്ചു. യുവാവിനെ ബലപ്രയോഗത്തിലൂടെ ഒടുവില്‍ കുടുക്കി.

40 വയസുള്ള ചിറ്റിലപ്പിള്ളി അമ്പിഴപ്പിള്ളി ആന്‍സണ്‍ വടക്കന്‍ ആണ് പോലീസ് പിടിയിലായത്.

ഇക്കഴിഞ്ഞ തിങ്കളാഴ്ച മുഖ്യമന്ത്രിക്ക് തിരക്കിട്ട പരിപാടികളാണ് തൃശൂരില്‍ ഉണ്ടായിരുന്നത്. മുഖ്യമന്ത്രിയുടെ സന്ദര്‍ശനമായതിനാല്‍ ജില്ലയില്‍ പഴുതടച്ച സുരക്ഷയാണ് ഒരുക്കിയത്. വി.വി.ഐ.പി. സന്ദര്‍ശനമായതിനാല്‍ ഓരോ പ്രധാന ജംഗ്ഷനുകളിലും പ്രധാന പോലീസ് ഉദ്യോഗസ്ഥര്‍ക്ക് ചുമതലയും നല്‍കിയിരുന്നു. ഇതിനിടെയാണ് രാവിലെ ഒന്‍പതോടെ മുഖ്യമന്ത്രി പിണറായി വിജയന്റെ വാഹനവ്യൂഹം തൃശൂര്‍ ഗുരുവായൂര്‍ പാതയിലൂടെ പുഴയ്ക്കലെത്തിയത്. അപ്പോഴാണ് സംഭവം നടന്നത്. വാഹന വ്യൂഹത്തിനു കടന്നു പോകാന്‍ പൊലീസ് ഗതാഗതം നിയന്ത്രിച്ചിരുന്നു. ഏതാനും മിനിറ്റുകള്‍ കാത്തുനിന്നപ്പോഴേക്കും യുവാവ് അസ്വസ്ഥനായി. ഗതാഗതം നിയന്ത്രിച്ച എസിപി വി.കെ. രാജുവിനോടു യുവാവ് കയര്‍ക്കുകയും ചെയ്തു. മുഖ്യമന്ത്രിയുടെ വാഹന വ്യൂഹം എത്തിയപ്പോഴാണ് എല്ലാവരും കേള്‍ക്കെ യുവാവ് അസഭ്യം പറഞ്ഞത്. ഇതോടെ എസിപി എത്തി ബൈക്കിന്റെ താക്കോല്‍ ഊരിയെടുത്തത്. പഴയ ബൈക്ക് ആയതുകൊണ്ട് താക്കോല്‍ ഇല്ലാതെയും സ്റ്റാര്‍ട്ട് ചെയ്യാവുന്ന അവസ്ഥയിലായിരുന്നതിനാലാണ് യുവാവിന് രക്ഷപ്പെടാന്‍ സാധിച്ചത്.

വയര്‍ലെസിലൂടെ എ.സി.പി. നിര്‍ദേശം നല്‍കിയതനുസരിച്ച് ശോഭ സിറ്റിക്കു സമീപത്തു വച്ച് പൊലീസ് സംഘം ബൈക്ക് തടഞ്ഞു. നിര്‍ത്താതെ മുന്നോട്ടു കുതിച്ച ബൈക്ക് ബല പ്രയോഗത്തിലൂടെയാണ് പൊലീസ് പിടികൂടിയത്. കൃത്യ നിര്‍വഹണം തടസപ്പെടുത്തിയതിനും കേസെടുത്തു. ഏതായാലും യുവാവ് പെട്ടുപോയിരിക്കുകയാണ്.