ഐ.ഐ.എഫ്.എൽ. വെൽത്ത് ഹുറുൺ ഇന്ത്യയിലെ അതിസമ്പന്നരുടെ പട്ടിക പുറത്തിറക്കി. ഇന്ത്യയിലെ അതി സമ്പന്നന്മാരുടെ പട്ടികയിൽ മലയാളികളും സ്ഥാനം പിടിച്ചിട്ടുണ്ട്. 23 മലയാളികളാണ് രാജ്യത്തെ സമ്പന്നരുടെ കൂട്ടത്തിൽ ഉൾപ്പെട്ടിരിക്കുന്നത്. ഈ പ്രാവശ്യവും മലയാളി സമ്പന്നരിൽ ഒന്നാമൻ ലുലു ഗ്രൂപ്പ് ചെയർമാൻ എം.എ. യൂസഫലി തന്നെയാണ് . യൂസഫലിയുടെ ആസ്തി 35,700 കോടി രൂപയാണ്. മലയാളികളിൽ ഒന്നാമനായ ഇദ്ദേഹം ഇന്ത്യൻ സമ്പന്നരിൽ 21-ാം സ്ഥാനത്താണ്‌ വരുന്നത്. 26000 ത്തിനടുത്ത് ഇന്ത്യാക്കാരടക്കം 31,000-ത്തോളം പേർ ജോലി ചെയ്യുന്ന ഗൾഫിലെ പ്രമുഖ വ്യാപാര സ്ഥാപനമായ എം.കെ. ഗ്രൂപ്പിന്റെയും ലുലു ഹൈപ്പർ മാർക്കറ്റ് ഗ്രൂപ്പിന്റെയും മാനേജിങ് ഡയറക്ടറാണ് യൂസഫലി. ഇദ്ദേഹത്തിന്റെ ഇടപെടലുകൾ ശക്തമാണ് . വ്യവസായിയായ എം.എ.യൂസഫലിയുടെ ഇടപെടലിെനത്തുടര്‍ന്ന് തുഷാർ വെള്ളാപ്പള്ളിക്ക് ജാമ്യം അനുവദിച്ചത് ശ്രദ്ധേയമായിരുന്നു.

മലയാളികളിൽ രണ്ടാം സ്ഥാനത്ത് ഷംഷീർ വയലിൽ ആണ് വന്നിരിക്കുന്നത്. വി.പി.എസ്. ഹെൽത്ത്‌ കെയർ ഗ്രൂപ്പ് ചെയർമാനും മാനേജിങ് ഡയറക്ടറുമായ ഷംഷീർ വയലിൻറെ ആസ്തി 13,200 കോടി രൂപയാണ്‌. ഇന്ത്യൻ സമ്പന്നരിൽ 58-ാം സ്ഥാനമാണ് ഇദ്ദേഹത്തിനുള്ളത്. മൂന്നാം സ്ഥാനത്ത് രവി പിള്ളയാണ്. ആർ.പി. ഗ്രൂപ്പ് മാനേജിങ് ഡയറക്ടർ രവി പിള്ളയുടെ ആസ്തി 11,600 കോടി രൂപയാണ്. ഇന്ത്യൻ സമ്പന്നരിൽ അദ്ദേഹം 69-ാം സ്ഥാനത്താണ്. ഗൂഗിൾ ക്ലൗഡ് സി.ഇ.ഒ. തോമസ് കുര്യനാണ് നാലാം സ്ഥാനത്ത്. ഇദ്ദേഹത്തിന്റെ ആസ്തി 10,600 കോടി രൂപയാണ് . ഇന്ത്യൻ സമ്പന്നരിൽ 80-ാം സ്ഥാനത്താണ് അദ്ദേഹം. അഞ്ചാം സ്ഥാനത്ത് ആലുക്കാസ് ജൂവലറി സ്ഥാപകനും ചെയർമാനുമായ ജോയ് ആലുക്കാസാണ്. 9,400 കോടി രൂപയുടെ ആസ്തിയാണ് ജോയ് ആലുക്കാസിന് ഉള്ളത്. ഇന്ത്യൻ സമ്പന്നരിൽ 98-ാം സ്ഥാനമാണ് അദ്ദേഹത്തിന്.

പട്ടികയിൽ ആദ്യ പത്തിൽ ഇടം നേടിയ മലയാളികൾ ഇവരൊക്കെയാണ്. ശോഭ ലിമിറ്റഡിന്റെ ചെയർമാൻ പി.എൻ.സി. മേനോൻ. 8,800 കോടി ആസ്തിയാണ് അദ്ദേഹത്തിന് ഉള്ളത്. അദ്ദേഹത്തിന്റെ ഭാര്യ ശോഭ മേനോൻ 5,200 കോടി ആസ്തിയുടെ പട്ടികയിൽ സ്ഥാനം നേടിയിട്ടുണ്ട്. കല്യാൺ ജൂവലേഴ്‌സ് ചെയർമാനും എം.ഡി.യുമായ ടി.എസ്. കല്യാണരാമനും കുടുംബവും 5,200 കോടിയുടെ ആസ്തിയുടെ അതിൽ ഉൾപ്പെടുന്നു. മുത്തൂറ്റ് ഫിനാൻസ് എം.ഡി. ജോർജ് അലക്സാണ്ടർ 4,000 കോടി ആസ്തിയുണ്ട്. , മണപ്പുറം ഫിനാൻസ് എം.ഡി. വി.പി. നന്ദകുമാറിൻറെ ആസ്തി 3,700 കോടി രൂപയാണ്. രാജ്യത്തെ സമ്പന്നരുടെ പട്ടികയിൽ ഇടം പിടിച്ച സ്ത്രീകൾ ഇവരാണ്. ശോഭ മേനോൻ, ബിന്ദു പി.എൻ.സി. മേനോൻ, ഷീല കൊച്ചൗസേപ്പ്, സൂസൻ തോമസ്, അന്ന അലക്സാണ്ടർ, ലത മാത്യൂസ്, സാറാ ജോർജ്, എലിസബത്ത് ജേക്കബ് എന്നീ എട്ട് മലയാളി വനിതകളാണ് ഇത്തവണ പട്ടികയിൽ ഇടം നേടിയിരിക്കുന്നത്. എന്നാൽ ഇന്ത്യയിലെ സമ്പന്നരുടെ കൂട്ടത്തിൽ ആദ്യ പത്തിൽ ഒരു സ്ത്രീ സ്ഥാനം നേടിയില്ല എന്നത് ശ്രദ്ധേയം.

ഐ.ഐ.എഫ്.എൽ. വെൽത്ത് ഹുറുൺ പുറത്ത് ഇറക്കിയ സമ്പന്നരുടെ പട്ടികയിൽ ഒന്നാം സ്ഥാനത്ത് മുകേഷ് അംബാനി തന്നെയാണ്. തുടർച്ചയായ എട്ടാം തവണയാണ് മുകേഷ് അംബാനി ഹുറുൺ പട്ടികയിൽ ഒന്നാമതെത്തുന്നത് . 3.8 ലക്ഷം കോടി രൂപയുടെ ആസ്തിയാണ് അദ്ദേഹത്തിനുള്ളത് . ലോകത്തിലെ കണക്ക് വച്ച് നോക്കുമ്പോൾ അതിസമ്പന്നരിൽ എട്ടാം സ്ഥാനത്താണ് അംബാനി ഇടം പിടിച്ചിരിക്കുന്നത്. ഇന്ത്യൻ സമ്പന്നരിൽ രണ്ടാം സ്ഥാനം നേടിയിരിക്കുന്നത് 1.86 ലക്ഷം കോടി രൂപയുടെ ആസ്തിയുമായി എസ്.പി. ഹിന്ദുജയും കുടുംബവുമാണ് . വിപ്രോയുടെ സ്ഥാപകനായ അസിം പ്രേംജിയാണ് മൂന്നാം സ്ഥാനത്ത് ഇടം പിടിച്ചിരിക്കുന്നത്. 1.17 ലക്ഷം കോടി രൂപയുടെ ആസ്തിയാണ് അസിം പ്രേംജിക്കുള്ളത് .ഇന്ത്യൻ സമ്പന്നരിൽ നാലാം സ്ഥാനത്തു ലക്ഷ്മി മിത്തലും കുടുംബവുമാണ് വന്നിരിക്കുന്നത്. 1.07 കോടി രൂയാണ് ഇവരുടെ ആസ്തി. ഗൗതം അദാനി അഞ്ചാം സ്ഥാനത്ത് ആണ് ഇടം നേടിയിരിക്കുന്നത്. 94,500 കോടിയുടെ ആസ്തിയാണ് ഇവർക്ക് ഉള്ളത്.