മൂക്കില് നുള്ളിക്കോ... ഇത്രയും ഉന്നതനായ ഒരുദ്യോഗസ്ഥനെ ഇങ്ങനെ ചവിട്ടി തേയ്ക്കണോ? ഒരു തരത്തിലും തിരിച്ചെടുക്കേണ്ടെന്ന് കരുതിയിരുന്ന ജേക്കബ് തോമസിനെ അവസാനം എടുത്തത് തൂമ്പയും കോടാലിയും ഉണ്ടാക്കുന്ന സ്ഥാപനത്തില്; വിജിലന്സില് ആയിരുന്നപ്പോള് കേസില് കുടുക്കിയ മന്ത്രിക്ക് കീഴില് നിയമിക്കുമ്പോള്
മലയാളികളുടെ ഇടയില് ഏറെ ആദരവ് പിടിച്ചുപറ്റിയ അപൂര്വം പോലീസ് ഉദ്യോഗസ്ഥരില് ഒരാളാണ് ജേക്കബ് തോമസ്. ശക്തമായ നിലപാടിന്റെ പേരില് വര്ഷങ്ങളോളം സസ്പെന്ഷനിലായ ഉദ്യോഗസ്ഥന് കൂടിയാണ് ഡി.ജി.പി. ജേക്കബ് തോമസ്. ഒന്നര വര്ഷത്തിലേറെയായി സസ്പെന്ഷനിലായിരുന്ന ജേക്കബ് തോമസിനെയാണ് സര്വീസില് തിരിച്ചെടുത്തത്. വ്യവസായ വകുപ്പിനു കീഴിലുള്ള മെറ്റല് ഇന്ഡസ്ട്രീസ് ലിമിറ്റഡിന്റെ മാനേജിങ് ഡയറക്ടറായാണു നിയമനം. തിരിച്ചെടുക്കണമെന്നു കേന്ദ്ര അഡ്മിനിസ്ട്രേറ്റിവ് ട്രിബ്യൂണല് ഉത്തരവിട്ട് രണ്ടു മാസത്തിനു ശേഷമാണു സര്ക്കാരിന്റെ തീരുമാനം.
എന്തായാലും ഈ നിയമനം ഏറെ വിവാദമായിട്ടുണ്ട്. തന്റെ സീനിയോറിറ്റിയും കേഡര് ചട്ടങ്ങളും കണക്കിലെടുത്താണു നിയമനമെങ്കില് പരിഗണിക്കുമെന്നാണ് സംസ്ഥാനത്തെ ജേക്കബ് തോമസ് അന്നു പ്രതികരിച്ചത്. സംസ്ഥാനത്തു ഡി.ജി.പിമാരുടെ രണ്ടു കേഡര് തസ്തികകളും രണ്ട് എക്സ് കേഡര് തസ്തികകളുമാണുള്ളത്. ജേക്കബ് തോമസിനെ നിയമിച്ച തസ്തിക ഡി.ജി.പിയുടെ കേഡര് തസ്തികയായി ഉയര്ത്തും.
ജേക്കബ് തോമസിന് ഉചിതമായ നിയമനം നല്കണമെന്ന് ആഭ്യന്തര സെക്രട്ടറി ബിശ്വാസ് മേത്ത ചീഫ് സെക്രട്ടറിക്കു ശിപാര്ശ നല്കിയിരുന്നു. ഇതേത്തുടര്ന്ന് തസ്തിക കണ്ടെത്താന് ബിശ്വാസ് മേത്തയെത്തന്നെ ചുമതലപ്പെടുത്തി. അദ്ദേഹത്തിന്റെ അന്വേഷണത്തിലാണു മെറ്റല് ഇന്ഡസ്ട്രീസ് ലിമിറ്റഡ് എം.ഡി സ്ഥാനം ഒഴിവുണ്ടെന്നു കണ്ടെത്തിയത്. നിയമന ഉത്തരവില് മുഖ്യമന്ത്രി പിണറായി വിജയന് ഇന്നലെ ഒപ്പുവച്ചു.
അതേ സമയം ഉത്തരവ് വന്നതിന് പിന്നാലെ ഏറെ വിവാദമാകുകയും ചെയ്തു. തൂമ്പ, മണ്വെട്ടി, കോടാലി തുടങ്ങി കാര്ഷികോപകരണങ്ങളും സ്റ്റീല് ഫര്ണിച്ചറുമാണു ഷൊര്ണൂരില് പ്രവര്ത്തിക്കുന്ന മെറ്റല് കോര്പ്പറേഷന്റെ ഉല്പ്പന്നങ്ങള്. ദീര്ഘകാലമായി നഷ്ടത്തിലാണു പ്രവര്ത്തനം. ജീവനക്കാരുടെ എണ്ണം മുപ്പതില്ത്താഴെയാണ്. ഇതില് ഒരു ഡിജിപി റാങ്കിലുള്ള ഉദ്യോഗസ്ഥന് എന്ത് ചെയ്യാനാണ്. ഇത്രയും ഉന്നതനായ ഒരു ഉദ്യോഗസ്ഥനെ ഇവിടെ നിയമിച്ച് എന്തിനാണ് ഭീമമായ ശമ്പളം നല്കുന്നത്.
അതേസമയം വ്യവസായ വകുപ്പില് തന്നെ നിയമിച്ചത് പകപോക്കലാണെന്നാണ് ജേക്കബ് തോമസിന്റെ പ്രതികരണം. താന് വിജിലന്സില് ജോലിചെയ്യുമ്പോള് കേസില് കുടുങ്ങി പുറത്തുപോയ ആളാണ് മന്ത്രിയെന്നും ചില തസ്തികകളില് നിയമിക്കുമ്പോള് അത് നല്കുന്ന സന്ദേശം ജനം തിരിച്ചറിയുമെന്നും പറഞ്ഞു.
ഒരു ഡിജിപിയുടെ പണി ഇരുമ്പ് ഉണ്ടാക്കലാണോ എന്നതൊക്കെ സര്ക്കാരിന്റെ തീരുമാനമാണല്ലോ എന്നും പറഞ്ഞു. ഡിജിപി റാങ്കിലുള്ളയാള് ഇടപെടേണ്ട ക്രമസമാധാന പ്രശ്നം ഇരുമ്പുണ്ടാക്കുന്നിടത്ത് ഉണ്ടോയെന്ന് അറിയില്ലെന്നും പ്രതികരിച്ചു. ഡി.ജി.പി കേഡര് തസ്തികയില് നിയമനം നല്കണമെന്ന ജേക്കബ് തോമസിന്റെ ആവശ്യം സര്ക്കാര് തള്ളിയാണ് സ്റ്റീല് ആന്ഡ് മെറ്റല് ഇന്ഡസ്ട്രീസ് എം.ഡിയായി നിയമിച്ചത്.
ഓഖി ദുരന്ത ദുരിതാശ്വാസത്തില് സര്ക്കാരിനെ വിമര്ശിച്ചതോടെ 2017 ഡിസംബറിലാണു ജേക്കബ് തോമസിനെ സസ്പെന്ഡ് ചെയ്തത്. അനുമതിയില്ലാതെ പുസ്തകം പ്രസിദ്ധീകരിച്ചതിനടക്കം സസ്പെന്ഷന് നടപടികള് ആവര്ത്തിച്ചു.
എന്തായാലും കിട്ടിയ സ്ഥലത്ത് ജോലി ചെയ്ത് കരുത്ത് തെളിയിക്കാനാണ് ജേക്കബ് തോമസിന്റെ തീരുമാനം. അതിലൂടെ കിട്ടുന്ന ചെറിയ പഴുതുപോലും വലുതാക്കാനാണ് ജേക്കബ് തോമസ് ശ്രമിക്കുക. അതെല്ലാം കാത്തിരുന്ന് കാണാം.
https://www.facebook.com/Malayalivartha
