അടുത്തിടെ ഏറ്റവുമധികം ചര്‍ച്ച ചെയ്തതാണ് മോട്ടോര്‍ വാഹന നിയമമനുസരിച്ചുള്ള കടുത്ത പിഴ ഈടാക്കുന്നത്. പിടിവീണാല്‍ കീശ കാലിയാകുന്ന തരത്തിലാണ് നിയമം കര്‍ശനമാക്കിയത്. പ്രായപൂര്‍ത്തിയാകാത്തവര്‍ വാഹനമോടിച്ചാല്‍ 25,000 രൂപ പിഴയും മൂന്ന് വര്‍ഷം തടവുമാണ് ശിക്ഷ. മദ്യപിച്ച് വാഹനമോടിച്ചാല്‍ ആറ് മാസം തടവും 10,000രൂപ പിഴയുമാണ് ശിക്ഷ. കുറ്റം ആവര്‍ത്തിച്ചാല്‍ പിഴ 15,000 രൂപയും തടവ് രണ്ട് വര്‍ഷവും ആകും. ഹെല്‍മെറ്റ്, സീറ്റ് ബെല്‍റ്റ് എന്നിവ ധരിക്കാതെ വാഹനം ഓടിച്ചാല്‍ പിഴ 1000 രൂപയാണ് പിഴ ഈടാക്കുന്നത്. നിയമം കര്‍ശനമായി നടപ്പിലാക്കിയതോടെ ജന രോക്ഷവും ഉയര്‍ന്നു.

ഇതോടെ ഗതാഗത നിയമ ലംഘനങ്ങള്‍ക്കുള്ള പിഴ കുറയ്ക്കുന്നതിനെക്കുറിച്ച് മോട്ടോര്‍വാഹനവകുപ്പ് ആലോചിച്ചു തുടങ്ങി. ഇതനുസരിച്ച് കേന്ദ്രത്തിന് കത്തും നല്‍കി. കുറ്റകൃത്യങ്ങളുടെ തീവ്രത അനുസരിച്ചല്ല കേന്ദ്രനിയമത്തില്‍ പിഴ നിശ്ചയിച്ചിട്ടുള്ളതെന്നാണ് സംസ്ഥാനത്തിന്റെ പരാതി. കേന്ദ്രത്തിന് കത്തയച്ചെങ്കിലും മറുപടി ലഭിക്കാത്ത സാഹചര്യത്തില്‍ പിഴ കുറയ്ക്കാനുള്ള നടപടികളുമായി മുന്നോട്ടുപോകുകയാണ്.

ഹെല്‍മെറ്റ്, സീറ്റ് ബെല്‍റ്റ് എന്നിവ ഉപയോഗിക്കാതിരിക്കുന്നതിനുള്ള പിഴ സംബന്ധിച്ചാണ് ഏറെ ആരോപണം ഉയര്‍ന്നത്. വ്യക്തികളുടെ നേരിട്ടുള്ള സുരക്ഷാ കാര്യങ്ങളില്‍ അത്ര കടുംപിടിത്തം വേണ്ടെന്ന നിലപാടിലാണ് സര്‍ക്കാര്‍. അപ്പോഴേ ഉണ്ടായ വാദമാണ് തകര്‍ന്ന റോഡിന് ആര് പിഴ ഈടാക്കുമെന്ന്. റോഡപകടങ്ങള്‍ക്ക് പ്രധാന കാരണമാണ് റോഡിലെ കുഴികള്‍. റോഡ് നേരെയാക്കാത്തതിനാല്‍ യാത്രക്കാര്‍ അനുഭവിക്കുന്ന ദുരിതങ്ങള്‍ക്ക് കണക്കില്ല. റോഡിന്റെ കുഴി കാരണം ഒരു യുവാവിന് പോലും കഴിഞ്ഞ ദിവസം ദാരുണാന്ത്യം ഉണ്ടായിരിക്കുകയാണ്. ബുക്കും പേപ്പറും ലൈസന്‍സും ഹെല്‍മറ്റും എല്ലാം ഉണ്ടായിട്ടും ജീവന്‍ നഷ്ടപ്പെട്ടു. കുഴി കാരണം. ഇതിന് ഫൈനില്ലേയെന്നോണ് സോഷ്യല്‍ മീഡിയ ചോദിക്കുന്നത്.

കൊച്ചി എളംകുളം മെട്രോ റെയില്‍വേ സ്‌റ്റേഷനു സമീപം സഹോദരന്‍ അയ്യപ്പന്‍ റോഡിലെ കുഴിയില്‍ വീണ സ്‌കൂട്ടര്‍ യാത്രികനാണ് ബസ് ദേഹത്തു കയറി ദാരുണാന്ത്യം സംഭവിച്ചത്. കൊച്ചിയിലെ സ്വകാര്യ സ്ഥാപനത്തില്‍ പ്രോഗ്രാം മാനേജരായി ജോലി ചെയ്യുന്ന ഇടുക്കി കുളമാവ് സ്വദേശിയായ 32 കാരന്‍ ആര്‍. ഉമേഷ് കുമാര്‍ ആണു മരിച്ചത്. കുളമാവ് കൊച്ചുകരയില്‍ വീട്ടില്‍ രവീന്ദ്രന്റെ മകനാണ്. കുഴിയില്‍ വീണ സ്‌കൂട്ടര്‍ റോഡില്‍ തെന്നി വീഴുകയും പിറകെവന്ന സ്വകാര്യ ബസ് അദ്ദേഹത്തിന്റെ ദേഹത്തു കയറുകയുമായിരുന്നു.

ഇന്നലെ രാവിലെ ഒമ്പതരയോടെയാണ് നഗരത്തെ നടുക്കിയ സംഭവം. ഹോണ്ട ഡിയോ വാഹനത്തില്‍ എറണാകുളം ഭാഗത്തേക്ക് പോകുകയായിരുന്ന ഉമേഷ്, കുഴികണ്ട് വെട്ടിച്ചപ്പോള്‍ വാഹനം മറിയുകയായിരുന്നു. എരമല്ലൂര്‍ എറണാകുളം റൂട്ടിലോടുന്ന ജപമാല എന്ന ബസ് യുവാവിന്റെ തലയിലൂടെ കയറിയിറങ്ങുകയുമായിരുന്നു. അപകടം നടന്നയുടന്‍ ജീവനക്കാര്‍ ബസ് റോഡരികില്‍ നിര്‍ത്തിയശേഷം ഓടി രക്ഷപ്പെട്ടു.

ദാരുണ സംഭവം കണ്ട് സ്ത്രീകളടക്കമുള്ള യാത്രക്കാര്‍ നിലവിളിയായി. ആരും സംഭവസ്ഥലത്തേക്ക് അടുക്കാതായതോടെ സ്റ്റീഫന്‍ എന്ന വഴിയാത്രക്കാരനാണു തൊട്ടടുത്ത സ്ഥാപനത്തില്‍നിന്നും മുണ്ട് വാങ്ങി മൃതദേഹം പുതപ്പിച്ചത്.

ഹെല്‍മെറ്റ് ധരിച്ചിരുന്ന യുവാവിന്റെ തല ഹെല്‍മെറ്റില്‍ കുടുങ്ങിയ നിലയില്‍ തന്നെയാണ് ആശുപത്രിയിലേക്ക് മാറ്റിയത്. സംസ്‌കാരം ഇന്നു പോസ്റ്റ്‌മോര്‍ട്ടത്തിനു ശേഷം നടത്തും. ഭാര്യ ദിവ്യ, മകള്‍: ദിയ.

ഈ സംഭവം മലയാളികളെ ഏറെ വേദനിപ്പിച്ചിരിക്കുകയാണ്. യാത്രക്കാരെ പിഴിയുന്നതിന് മുമ്പ് റോഡിലെ കുഴികളടയ്ക്കണമെന്നാണ് എല്ലാവരും ഒരുപോലെ ആവശ്യപ്പെടുന്നത്.