മരടിലെ ഫ്ലാറ്റുകള് പൊളിക്കും മുമ്പ് നഷ്ടപരാഹിരം നല്കുന്നതിനായി ബാലകൃഷ്ണന് നായര് കമ്മിറ്റി നടത്തിയ അന്വേഷണത്തില് ഞെട്ടിക്കുന്ന വിവരങ്ങളാണ് കണ്ടെത്തിയത്
മരടിലെ ഫ്ലാറ്റുകള് പൊളിക്കും മുമ്പ് നഷ്ടപരാഹിരം നല്കുന്നതിനായി ബാലകൃഷ്ണന് നായര് കമ്മിറ്റി നടത്തിയ അന്വേഷണത്തില് ഞെട്ടിക്കുന്ന വിവരങ്ങളാണ് കണ്ടെത്തിയത്. റിയല് എസ്റ്റേറ്റ് രംഗത്തെ വലിയ ചതിക്കുഴികളിലേക്കുള്ള ചൂണ്ടുപലകയാണ് മരട്. സംസ്ഥാനത്ത് ഇത്തരത്തില് നിരവധി ബില്ഡര്മാര് ഉടമകളെ പറ്റിച്ചതായി സംശയം ഉയര്ന്നിട്ടുണ്ട്. മരട് മുന്സിപാറ്റിയിലെ രേഖകള് പ്രകാരം 343 ഫ്ലാറ്റുകളില് 191ന്നും ബില്ഡര്മാരുടെ ഉടമസ്ഥതയിലാണ്. പകുതിയിലധികം ഉടമകളും പണം മുഴുവന് നല്കിയിട്ടും ഉടമസ്ഥാവകാശം തങ്ങളുടെ പേരിലാക്കാന് താല്പര്യം കാട്ടിയുമില്ല. അതെന്താണെന്ന് കൂടുതല് അന്വേഷണത്തിലേ വ്യക്തമാകൂ.
ഉടമസ്ഥാവകാശം ഇല്ലാത്തവര്ക്ക് നഷ്ടപരിഹാരം ലഭിക്കാനുള്ള സാധ്യത വളരെ കുറവാണ്. റവന്യൂ രേഖകള് പ്രകാരം ആരാണോ ഫ്ലാറ്റിന്റെ ഉടമ, അവര്ക്കേ നഷ്ടപരിഹാരം ലഭിക്കൂ. അങ്ങനെയെങ്കില് മരടിലെ വിഷയം കൂടുതല് സങ്കീര്ണമാകും. ബില്ഡര്മാരുടെ അക്കൗണ്ടും മറ്റ് ആസ്തികളും സര്ക്കാര് മരവിപ്പിച്ചിട്ടുണ്ടെങ്കിലും പകുതിയിലധികം ഫ്ലാറ്റുകള് അവരുടെ തന്നെ പേരിലായതിനാല് വലിയ നഷ്ടപരിഹാര തുക നല്കുന്നതില് നിന്ന് അവര്ക്ക് തടിതപ്പാം. അപ്പോഴും 152 പേര്ക്ക് മാത്രമേ നഷ്ടപരിഹാരം ലഭിക്കൂ. മുനിസിപ്പാലിറ്റി രേഖകള് പ്രകാരം ജയിന് കോറല് കോവിലെ 122 അപ്പാര്ട്ട്മെന്റുകളും ബില്ഡര്മാരുടെ ഉടമസ്ഥതയിലാണ്. ഉടമകള്ക്ക് ബില്ഡര്മാര് കൈവശ അവകാശ സര്ട്ടിഫിക്കറ്റ് നല്കിയിട്ടില്ല.
എച്ച് ടു ഒ ഹോളി ഫെയ്ത്ത് അപ്പാര്ട്ട്മെന്റില് 49 ഫ്ലാറ്റുകളാണ് ബില്ഡര്മാരുടെ പേരില് ഇപ്പോഴുമുള്ളത്. ഇവിടെയൊക്കെ യഥാര്ത്ഥ അവകാശികളാണ് താമസിക്കുന്നത്. ആല്ഫാ സെറിന്ഡ ബില്ഡര്മാരുടെ പേരില് 11ഉം ഗോള്ഡന് കായലോരം ബില്ഡര്മാരുടെ ഉടമസ്ഥതയില് ഒന്പതും ഫ്ലാറ്റുകളുണ്ട്. ബില്ഡര്മാരുടെ ആസ്തികള് മരവിപ്പിച്ച ശേഷം ഉടമകള്ക്ക് നഷ്ടപരിഹാരം നല്കണമെന്നാണ് സുപ്രീംകോടതി ഉത്തരവിട്ടിരിക്കുന്നത്. ആദ്യം സര്ക്കാര് 25 ലക്ഷം വീതം നഷ്ടപരിഹാരം നല്കണമെന്നും പിന്നീട് ആ തുക കണ്ട് കെട്ടിയ സ്വത്തുകളില് നിന്ന് സര്ക്കാര് ഈടാക്കണമെന്നുമാണ് വ്യവസ്ഥ. നിലവിലെ സാഹചര്യം അനുസരിച്ച് പണം വാങ്ങി ഫ്ലാറ്റുകള് വാങ്ങിയ പകുതിയോളം പേര്ക്ക് നഷ്ടപരിഹാരത്തിന് യോഗ്യതയില്ലാത്ത സ്ഥിതിയാണുളളത്.
ഇത് മനസിലാക്കി ചില ഫ്ലാറ്റ് ഉടമകള് ഈ വിഷയം മരട് മുന്സിപ്പാലിറ്റിയുടെ ശ്രദ്ധയില്പ്പെടുത്തിയിട്ടുണ്ട്. ഉടമസ്ഥാവകാശം ഇല്ലാത്തവരുടെ പക്കല് ഫ്ലാറ്റ് വില്ക്കുന്നതിന് അടക്കമുള്ള രേഖകള് ഉണ്ട്. ബാലകൃഷ്ണന് നായര് കമ്മിറ്റി ആദ്യം പരിഗണിക്കുക ഈ പ്രശ്നമായിരിക്കും. കൈവശാവകാശ സര്ട്ടിഫിക്കറ്റില്ലാത്ത ഫ്ലാറ്റ് ഉടമകള് ഈ വിഷയം ഉയര്ത്തിക്കൊണ്ട് വരാനുള്ള ശ്രമം ആരംഭിച്ചിട്ടുണ്ട്. സംസ്ഥാനം കണ്ടതില് വെച്ച് ഏറ്റവും വലിയ റിയല്എസ്റ്റേറ്റ് വഞ്ചനയാണ് മരടില് നടന്നിരിക്കുന്നത്. ഉടമകളില് പലരും ഉയര്ന്ന നിരക്കില് അപ്പാര്ട്ട്മെന്റുകള് വാങ്ങിയ ശേഷം വിലകുറച്ച് രജിസ്ട്രേഷന് നടത്തിയതായും സൂചനയുണ്ട്. അങ്ങനെയെങ്കില് ഇവര് വാങ്ങിയ യഥാര്ത്ഥ വില നഷ്ടപരിഹാരമായി ലഭിക്കുകയുമില്ല.
https://www.facebook.com/Malayalivartha
