ശബരിമലയില്‍ ആചാരസംരക്ഷണത്തിനിറങ്ങിയ ബി.ജെ.പി നേതാവ് കെ.സുരേന്ദ്രനെ എല്‍.ഡി.എഫ് സര്‍ക്കാര്‍ 240 കേസുകളില്‍ കുടുക്കിയെങ്കിലും അതുകൊണ്ടൊന്നും കോന്നി ഉപതെരഞ്ഞെടുപ്പില്‍ അദ്ദേഹത്തെ തളയ്ക്കാനാവില്ല. സുരേന്ദ്രനെ കൊണ്ട് കോന്നിയില്‍ താമര വിരിയിപ്പിക്കാന്‍ ആര്‍.എസ്.എസ് എല്ലാ ഒരുക്കങ്ങളും തുടങ്ങിക്കഴിഞ്ഞു. പാര്‍ലമെന്റ് തെരഞ്ഞെടുപ്പില്‍ മത്സരിച്ചപ്പോള്‍ കോന്നി നിയമസഭാ മണ്ഡലത്തില്‍ യു.ഡി.എഫും ബി.ജെ.പിയും തമ്മിലുള്ള വോട്ട് വ്യത്യാസം മൂവായിരം വോട്ടിന് അടുത്താണ്. സുരേന്ദ്രന് 46,946 വോട്ട് കിട്ടി. അതായത് 32.47 ശതമാനം വോട്ട്. 2014ല്‍ ഇതേ സ്ഥാനത്ത് 18,222 വോട്ടേ ലഭിച്ചിരുന്നുള്ളൂ. ബി.ജെ.പിക്ക് എല്‍.ഡി.എഫുമായി 0.3% വോട്ടിന്റെ വ്യത്യാസമേ മണ്ഡലത്തില്‍ ഇപ്പോഴുള്ളൂ. ലോക്‌സഭാ തെരഞ്ഞെടുപ്പ് ഫലം അനുസരിച്ചുള്ള കണക്കാണിത്.

അതിനാല്‍ ബി.ജെ.പിയുടെ ആത്മവിശ്വാസം കൂടിയിട്ടുണ്ട്. പത്തനംതിട്ടയിലെ സുരേന്ദ്രന്റെ റാലിയില്‍ കെ.സുരേന്ദ്രന്‍ പങ്കെടുത്തപ്പോള്‍ വലിയ ജനപങ്കാളിത്തമാണ് ഉണ്ടായത്. കെ. സുരേന്ദ്രന്റെ പേരില്‍ 240 പോലീസ് കേസുകള്‍ ഉണ്ടെന്നാണ് സാക്ഷ്യപത്രം. ഏറ്റവും കൂടുതല്‍ ക്രിമിനല്‍ കേസുകള്‍ സ്വന്തം പേരിലുള്ള സ്ഥാനാര്‍ഥിയാണ് കെ. സുരേന്ദ്രന്‍. ഉപതിരഞ്ഞെടുപ്പുമായി ബന്ധപെട്ട് വരണാധികാരിക്ക് സമര്‍പ്പിച്ച നാമനിര്‍ദേശ പത്രികയിലാണ് കേസുകളുടെ വിവരം ഉള്ളത്. മിക്കതും കോടതിയുടെ പരിഗണനയിലാണ് . പാലക്കാട് ഒഴികെയുള്ള എല്ലാ ജില്ലകളിലും കെ സുരേന്ദ്രന്റെ പേരില്‍ കേസുണ്ട്.

കാസര്‍കോട് 33, കണ്ണൂര്‍ 1, കോഴിക്കോട് 2, വയനാട് 1, മലപ്പുറം 1, തൃശ്ശൂര്‍ 6, എറണാകുളം 13, ഇടുക്കി 17, ആലപ്പുഴ 56, കോട്ടയം 8, പത്തനംതിട്ട 30, കൊല്ലം 68, തിരുവനന്തപുരത്ത് മൂന്ന് എന്നിങ്ങനെയാണ് കേസുകളുടെ എണ്ണം. ശബരിമല വിഷയവുമായി ബന്ധപ്പെട്ട് സുരേന്ദ്രനെ അറസ്റ്റ് ചെയ്തതോടെയാണ് എല്‍.ഡി.എഫ് സര്‍ക്കാര്‍ മറ്റ് കേസുകള്‍ കുത്തിപ്പൊക്കിയത്. വധശ്രമം, കലാപശ്രമം, സംഘം ചേര്‍ന്ന് ആക്രമിക്കല്‍, ഭീഷണിപ്പെടുത്തല്‍, പൊതുമുതല്‍ നശിപ്പിക്കല്‍, ഔദ്യോഗിക കൃത്യനിര്‍വ്വഹണം തടസ്സപ്പെടുത്തല്‍, അപകീര്‍ത്തിപ്പെടുത്തല്‍ തുടങ്ങിയ വകുപ്പുകളാണ് കെ സുരേന്ദ്രനെതിരെ ചുമത്തിയിരിക്കുന്നത്. നെയ്യാറ്റിന്‍കര മുതല്‍ കാസര്‍കോട് വരെയുള്ള കോടതികളില്‍ സുരേന്ദ്രനെതിരെ കോസുകളുണ്ട്.

ശബരിമല സമരത്തില്‍ സുരേന്ദ്രന്‍ ഇടപെട്ടതോടെയാണ് ജനപിന്തുണ വര്‍ദ്ധിച്ചത്. പത്തനംതിട്ട ലോക്‌സഭാതെരഞ്ഞെടുപ്പില്‍ അദ്ദേഹം മത്സരിക്കണമെന്ന് ബി.ജെ.പി പ്രവര്‍ത്തകര്‍ ആവശ്യപ്പെട്ടത്. സ്ഥാനാര്‍ത്ഥി നിര്‍ണയത്തിനും മുമ്പായിരുന്നു അത്. സുരേന്ദ്രന്‍ സ്ഥാനാര്‍ത്ഥിയാകണമെന്ന് ആവശ്യപ്പെട്ട് മണ്ഡലത്തില്‍ ഫഌക്‌സുകള്‍ നിറഞ്ഞതോടെ നേതൃത്വം അദ്ദേഹത്തെ കളത്തിലിറക്കുകയായിരുന്നു. രണ്ട് ലക്ഷത്തി 97,000 വോട്ടാണ് അദ്ദേഹം നേടിയത്. അത് ബി.ജെ.പിയുടെ, മണ്ഡലത്തിലെ റെക്കോഡ് വോട്ടാണ്. മൂന്നാംസ്ഥാനത്തേക്ക് പോയെങ്കിലും വോട്ടിംഗ് ശതമാനത്തിലുണ്ടായ വര്‍ദ്ധന ബി.ജെ.പിക്ക് വലിയ ആത്മവിശ്വാസമാണ് നല്‍കിയത്. അതും കോന്നി മണ്ഡലത്തിലെ ഈഴവ വോട്ടുകളുടെ സാനിധ്യവും സുരേന്ദ്രന് അനുകൂലമാകുമെന്നാണ് ആര്‍.എസ്.എസിന്റെ കണക്ക് കൂട്ടല്‍.