വിശന്നു കരഞ്ഞ് കുഞ്ഞുങ്ങള്‍ മണ്ണുവാരിത്തിന്നുന്നത് ഏത് പെറ്റമ്മയ്ക്ക് സഹിക്കാനാവും...... വിശന്നു കരയുന്ന കുട്ടികളുടെ ദയനീയാവസ്ഥ കണ്ട് നാട്ടുകാര്‍ ശിശുക്ഷേമ സമിതിയില്‍ വിവരമറിയിച്ചപ്പോള്‍ പരിശോധിക്കാനെത്തിയ ഉദ്യോഗസ്ഥര്‍ കണ്ടത് നെഞ്ചു തകര്‍ക്കുന്ന കാഴ്ചയായിരുന്നു, ഒറ്റമുറിയില്‍ ആറുകുഞ്ഞുങ്ങള്‍, വിശന്നുകാളുന്ന വയറുമായി നാല് സഹോദരങ്ങള്‍ അവശരായി നിലംപറ്റികിടക്കുന്നു... കൈതമുക്ക് റെയില്‍വേ പുറമ്പോക്കിലാണ് കുഞ്ഞുങ്ങളുമായി വീട്ടമ്മ നിസ്സഹായാവസ്ഥയില്‍ കഴിഞ്ഞിരുന്നത്. ഭക്ഷണംപോലും കിട്ടാതെ വിശന്നുകരയുന്ന കുട്ടികളുടെ ദയനീയാവസ്ഥ കണ്ട് നാട്ടുകാരില്‍ ചിലരാണ് ശിശുക്ഷേമ സമിതിയില്‍ വിവരമറിയിച്ചത്. പരിശോധിക്കാനെത്തിയ ഉദ്യോഗസ്ഥരും നേരിട്ടതു കണ്ണ് നനയുന്ന അനുഭവങ്ങള്‍. പഴകിയ ഫ്‌ലക്‌സ് ഷീറ്റുകള്‍കൊണ്ട് മൂടിയ ഒറ്റമുറി കുടിലിലാണ് ഈ ആറ് കുഞ്ഞുങ്ങളും കഴിയുന്നത്.

മൂത്ത ആണ്‍കുട്ടിക്ക് ഏഴ് വയസ്സാണ് പ്രായം. ഏറ്റവും ഇളയകുട്ടിക്ക് മൂന്ന് മാസവും. ഇതിനിടയില്‍ അഞ്ചര, നാല്, മൂന്ന്, ഒന്നര വയസ്സുകാരായ മറ്റു നാലുപേരും. അച്ഛന്‍ തെങ്ങുകയറാനും കൂലിപ്പണിക്കും മറ്റും പോകാറുണ്ട്. കൂലിയായി കിട്ടുന്നതില്‍ നല്ലൊരു പങ്കും മദ്യപിച്ച് തീര്‍ക്കുമെന്നും ചെലവിനൊന്നും നല്‍കാറില്ലെന്നും അമ്മ പറയുന്നു. ഇതാണ് കുടിലില്‍ പട്ടിണി പുകയാന്‍ കാരണം.

നിസ്സഹായാവസ്ഥ ബോധ്യപ്പെട്ടതിനെ തുടര്‍ന്ന് ഒന്നര വയസ്സും മൂന്നുമാസവും പ്രായമുള്ളവരൊഴികെ കുഞ്ഞുങ്ങളെ തിങ്കളാഴ്ച രാത്രി ഏഴോടെ ശിശുക്ഷേമ സമിതി ഏറ്റെടുത്തു. രണ്ടു ആണ്‍കുട്ടികളും രണ്ടു പെണ്‍കുട്ടികളുമാണിവര്‍. കൊഞ്ചിച്ച് മതിയായില്ലെങ്കിലും അവരുടെ വയറെരിയാതിരിക്കാന്‍ ആറു പിഞ്ചോമനകളില്‍ നാലുപേരെയും സംസ്ഥാന ശിശുക്ഷേമ സമിതിക്കു കണ്ണീരോടെ കൈമാറി. ദിവസവും ശിശുക്ഷേമ സമിതിയില്‍ എത്തി കുഞ്ഞുങ്ങളെ കാണാമെന്നും സ്ഥിതി മെച്ചപ്പെട്ടാല്‍ തിരികെ കൂട്ടിക്കൊണ്ട് പോകാമെന്നുമുള്ള ഉദ്യോഗസ്ഥരുടെ വാക്കിലാണ് അമ്മക്ക് അല്‍പമെങ്കിലും ആശ്വാസമായത്.