ഓഹരി വിപണിയില്‍ കനത്ത ഇടിവ്... ബിഎസ്ഇ സെന്‍സെക്‌സ് 700 പോയിന്റ് താഴ്ന്ന നിലയിൽ. നിഫ്റ്റി 23,200 എന്ന സൈക്കോളജിക്കല്‍ ലെവലിന് താഴെയാണ്. എണ്ണവില ഉയര്‍ന്നതും അമേരിക്കന്‍ ബോണ്ട് യീല്‍ഡ് വര്‍ധിച്ചതുമാണ് വിപണിക്ക് വിനയായത്.

ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 103 ഡോളറിന് മുകളിലാണ്. അമേരിക്ക- ഇറാന്‍ സംഘര്‍ഷത്തിന് അയവ് വരുന്നതുമായി ബന്ധപ്പെട്ട് അനിശ്ചിതത്വം തുടരുന്നതാണ് വില ഉയര്‍ന്നുനില്‍ക്കാന്‍ കാരണം.

കൂടാതെ 2007ന് ശേഷമുള്ള ഏറ്റവും ഉയര്‍ന്ന നിലയിലാണ് യുഎസ് ട്രഷറി യീല്‍ഡ്. കൂടാതെ അമേരിക്കയിലെ ബിസിനസ് ആക്ടിവിറ്റി അഞ്ചുവര്‍ഷത്തിനിടയിലെ ഏറ്റവും ശക്തമായ നിലയിലാണ് എന്ന് വ്യക്തമാക്കുന്ന കണക്കുകള്‍ പുറത്തുവന്നിരുന്നു. ഇതിന് പിന്നാലെ ഡോളര്‍ ശക്തിയാര്‍ജിച്ചതും വിപണിയെ ബാധിക്കുകയും ചെയ്തു.

ഡോളറിനെതിരെ രൂപയുടെ മൂല്യത്തില്‍ 11 പൈസയുടെ ഇടിവാണുണ്ടായത്. 95.84ലേക്കാണ് രൂപ താഴ്ന്നത്. എണ്ണവില ഉയര്‍ന്നതും യുസ് ബോണ്ട് യീല്‍ഡ് വര്‍ധിച്ചതും ഡോളര്‍ കരുത്താര്‍ജിച്ചതും തന്നെയാണ് രൂപയെ ബാധിച്ചത്. പ്രധാനമായി നഷ്ടം നേരിട്ടത് എച്ച്ഡിഎഫ്‌സി ബാങ്ക്, ബജാജ് ഫിനാന്‍സ്, റിലയന്‍സ്, ആക്‌സിസ് ബാങ്ക് ഓഹരികളാണ്.