ഏറെ നാളത്തെ പ്രാര്‍ത്ഥനയ്ക്കും കഠിന പ്രയത്‌നത്തിനും ശേഷം വിക്രംലാന്‍ഡറിന്റെ അവശിഷ്ടങ്ങള്‍ ചന്ദ്രോപരിതലത്തില്‍ കണ്ടെത്തിയതായി നാസ അറിയിച്ചിരിക്കുകയാണ്. നാസയുടെ ലൂണാര്‍ ഉപഗ്രഹത്തിന്റെ ശക്തിയേറിയ ക്യാമറാക്കണ്ണുകളാണ് വിക്രംലാന്‍ഡറിന്റെ അവശിഷ്ടങ്ങള്‍ കണ്ടെത്തിയത്.

ഉപഗ്രഹചിത്രങ്ങള്‍ ലഭിച്ചതറിഞ്ഞ ഇന്ത്യയിലെ കംപ്യൂട്ടര്‍ രംഗത്തെ വിദഗ്ധനായ ഷണ്‍മുഖ സുബ്രമണ്യന്റെ സംശയമാണ് കൂടുതല്‍ വ്യക്തമായ ചിത്രങ്ങളിലൂടെ വിക്രം ലാന്‍ഡറാണെന്ന് നാസ സ്ഥിരീകരിച്ചത്.

ഉപഗ്രഹചിത്രങ്ങളെ വിശകലനം ചെയ്യുന്ന ഷണ്‍മുഖം കണ്ടെത്തിയ അസ്വാഭാവികങ്ങളായ വസ്തുക്കളെക്കുറിച്ചുള്ള സംശയമാണ് നാസക്ക് കൈമാറിയതെന്ന് നാസ അധികൃതര്‍ വ്യക്തമാക്കി. നാസയുടെ ലൂണാര്‍ അഥവാ എല്‍ആര്‍ഒ ടീമാണ് സാധ്യതമനസ്സിലാക്കി ക്യാമറാക്കണ്ണുകളെടുത്ത ചിത്രങ്ങളെ വീണ്ടും അപഗ്രഥിച്ചത്. ചന്ദ്രോപരിതലത്തില്‍ കണ്ടെത്തിയ പ്രത്യേക തരം തരികളും അവകിടന്ന സ്ഥാനവും ഐഎസ്ആര്‍ഒ നല്‍കിയ വിവരങ്ങളും വച്ചാണ് വിക്രംലാന്‍ഡര്‍ ഇടിച്ചിറങ്ങിയത് തന്നെ എന്ന് സ്ഥിരീകരിച്ചിരിക്കുന്നത്. ഇടിച്ചിറങ്ങിയ സ്ഥലത്തിന്റെ അളവുകളും ഉപഗ്രഹം മനസ്സിലാക്കി. അതുപ്രകാരം നവംബര്‍ മാസത്തില്‍ ലൂണാറെടുത്ത ചിത്രങ്ങളാണ് നിലവില്‍ ലഭിച്ചിരിക്കുന്നതില്‍ ഏറ്റവും വ്യക്തമെന്നും നാസ പറയുന്നു.

ഇന്ത്യയുടെ ചന്ദ്രയാന്‍ രണ്ട് വിക്രം ലാന്‍ഡറിനെ കണ്ടെത്താന്‍ നാസ തുടര്‍ച്ചയായ ശ്രമമാണ് നടത്തിയത്. ചന്ദ്രന്റെ ദക്ഷിണ ധ്രൂവത്തില്‍ വിക്രം ലാന്‍ഡര്‍ ഇടിച്ചിറങ്ങിയ മേഖലയില്‍ നവംബര്‍ പത്തിന് വീണ്ടും തിരച്ചില്‍ നടത്താനാണ് നാസ തീരുമാനിച്ചത്. ഈ തെരച്ചിലാണ് വിജയം നേടിയത്.

ചന്ദ്രന്റ ദക്ഷിണ ധ്രൂവത്തില്‍ ഇടിച്ചിറങ്ങിയ വിക്രം ലാന്‍ഡറിനെ കണ്ടെത്താനുള്ള ഐഎസ്ആര്‍ഒയ്ക്ക് നാസയും പിന്തുണ നല്‍കിയിരുന്നു. വിക്രംലാന്‍ഡര്‍ ഇടിച്ചിറക്കിയ പ്രദേശത്തെ ചിത്രങ്ങളും നാസയുടെ റി കണ്‍സന്‍സ് ഓര്‍ബിറ്റര്‍ പകര്‍ത്തിയിരുന്നു. സെപ്തംബര്‍ 17നായിരുന്നു ഈ മേഖലയില്‍ എല്‍ആര്‍ഒയുടെ അവസാന പറക്കല്‍. അതിന് ശേഷം നവംബര്‍ പത്തിനാണ് നാസയുടെ ഓര്‍ബിറ്റര്‍ വീണ്ടും പറന്നത്. വിക്രംലാന്‍ഡറിനെ കണ്ടെത്താന്‍ ഈ ശ്രമത്തില്‍ കഴിയുമെന്ന പ്രതീക്ഷയിലാണ് നാസ.

വിക്രം ലാന്‍ഡറിനെ തേടിയുള്ള ഐഎസ്ആര്‍ഒയുടെ ശ്രമങ്ങള്‍ നവംബര്‍ അവസാനത്തോടെ വിജയം നേടുമെന്ന സൂചനയാണ് നാസ കേന്ദ്രങ്ങള്‍ നല്‍കുന്നത്. ലാന്‍ഡറിനെ കണ്ടെത്തിത് ഐഎസ്ആര്‍ഒയുടെ ചന്ദ്രയാന്‍ പദ്ധതിക്ക് പുതിയ ആവേശം പകരുമെന്നാണ് ശാസ്ത്രലോകത്തിന്റെ പ്രതീക്ഷ.

അതേസമയം ചന്ദ്രോപരിതലത്തില്‍ വളരെ സമര്‍ത്ഥമായി ഉപഗ്രഹം ഇത്രയടുത്ത് എത്തിക്കാന്‍ ഐഎസ്ആര്‍ഒ നടത്തിയ പരിശ്രമത്തെ നാസ ഒരിക്കല്‍ കൂടി അഭിനന്ദിച്ചു. നിര്‍ഭാഗ്യകരമായ എന്തോ ഒരു കാരണം കൊണ്ടുമാത്രമായിരിക്കാം വിക്രം ലാന്‍ഡര്‍ കണക്കുകൂട്ടലുകളെ തെറ്റിച്ച് ഇടിച്ചിറങ്ങിയതെന്നാണ് നാസയുടെ വിശകലനം.

മൂന്ന് മാസങ്ങള്‍ക്ക് മുമ്പാണ് ഇന്ത്യയുടെ സ്വപ്ന ദൗത്യമായ ചാന്ദ്രയാന്‍ 2 പദ്ധതിയുടെ ഭാഗമായ വിക്രം ലാന്‍ഡര്‍ ചന്ദ്രോപരിതലത്തില്‍ ഇടിച്ചിറങ്ങിയത്. ഇന്ത്യയുടെ അഭിമാന പദ്ധതി അവസാന നിമിഷം ഇല്ലാതായതില്‍ ഭാരതീയരാകെ വിഷമത്തിലായിരുന്നു. വിജയവാര്‍ത്ത അറിയിക്കാനായി പ്രധാനമന്ത്രി നരേന്ദ്ര മോദിയും എത്തിയിരുന്നു. അവസാനം പൊട്ടിക്കരഞ്ഞ ഐഎസ്ആര്‍ഒ ഡയറക്ടറെ മോദി തന്നെ ആശ്വസിപ്പിച്ചു. അതൊരു ഭാരതത്തിന്റെ തേങ്ങലായി മാറി.