മന്ത്രിമാർക്ക് താത്പര്യം വിദേശ യാത്രയിലാണെന്ന ഹൈക്കോടതി പരാമർശം പുറത്തു വന്നതോടെ കേരള ഭരണത്തിൽ സി പി എം കേന്ദ്രകമ്മിറ്റി ഇടപെടാൻ ആലോചിക്കുന്നു. രാജ്യത്തിന്റെ ചരിത്രത്തിൽ നിന്ന് 2021 ൽ അപ്രത്യക്ഷമാകാതിരിക്കാനാണ് ഇത്തരമൊരു നടപടി.

ഹെലികോപ്റ്റർ വിവാദം ഉൾപ്പെടെ കേരള സർക്കാരിനെതിരെ അഴിമതി ആരോപണം ഉയർന്നതോടെയാണ് കേന്ദ്രം ഇടപെടുന്നത് . കേന്ദ്രനേത്യത്യം സംസ്ഥാന നേത്യത്വത്തിന് നിർദ്ദേശം നൽകിയതിനെ തുടർന്നാണ് ദേവസ്വം ബോർഡ് പ്രസിഡന്റ് എൻ എസ് എസ് ജനറൽ സെക്രട്ടറി ജി. സുകുമാരൻ നായരെ കണ്ടത്. ഇത്തരത്തിലാണ് മുന്നോട്ടു പോകുന്നതെങ്കിൽ കേരളത്തിൽ നിന്നും സി പി എം പൂർണമായും ഇല്ലാതാകുമെന്ന ധാരണ സിപിഎം പി.ബിക്ക് ഉണ്ടായിട്ടുണ്ട്. ഇതിൽ ഒരു മാറ്റമുണ്ടാക്കാനാണ് കേന്ദ്ര നേതൃത്വം ശ്രമിക്കുന്നത്. എന്നാൽ പിണറായി അതിന് അനുവദിക്കുമോ എന്നാണ് കണ്ടറിയേണ്ടത്.

സംസ്ഥാനത്ത് അഴിമതി വ്യാപകമാണെന്ന തോന്നൽ ഉണ്ടായിട്ടുണ്ടെന്നാണ് യച്ചൂരി ഉൾപ്പെടെയുള്ള പി.ബി. അംഗങ്ങളുടെ വിലയിരുത്തൽ. അത് ശരിയാണോ അല്ലെയാ എന്ന കാര്യം അദ്ദേഹത്തിന് ഉറപ്പില്ല. എന്നാലും ഡൽഹിയിൽ മാധ്യമപ്രവർത്തനം നടത്തുന്ന മലയാളികളായ ചില മാധ്യമ പ്രവർത്തകരിൽ നിന്നും ലഭിച്ച വിവരങ്ങളുടെ അടിസ്ഥാനത്തിലാണ് പിബിയുടെ അനുവാദത്തോടെ യച്ചൂരി അനൗദ്യോഗിക ഇടപെടലുകൾ നടത്തുന്നത്.

കേരളത്തിലെ അഴിമതികൾ സർക്കാർ തലത്തിൽ നടക്കുന്നതാണെന്ന് സി പി എം പി.ബി വിശ്വസിക്കുന്നില്ല. അതായത് പിണറായിയോ മന്ത്രിമാരോ അഴിമതി നടത്തുന്നതായി കേന്ദ്ര നേതൃത്വം കരുതുന്നില്ല. അതേസമയം ഉയർന്ന ഉദ്യോസ്ഥർ വൻതോതിൽ അഴിമതി നടത്തുന്നു. മുഖ്യമന്ത്രിയുടെ ഓഫീസിലും സർവ സാധാരണമാണ്. ഇവിടെയുള്ള സാധാരണ ഉദ്യോഗസ്ഥർ കുറ്റക്കാരല്ല. എന്നാൽ ഉന്നത ഉദ്യോഗസ്ഥരുടെ ഇടപെടൽ ദുരൂഹമാണെന്ന് സി പി എം കേന്ദ്രകമ്മിറ്റി കരുതുന്നു. പിണറായിയെ കേരളത്തിന്റെ അവസാനത്തെ സി പി എം മുഖ്യമന്ത്രിയായി കാണാൻ തങ്ങൾ ആഗ്രഹിക്കുന്നില്ലെന്നാണ് സി പി എം കേന്ദ്രനേതൃത്വത്തിന്റെ വിലയിരുത്തൽ.ബംഗാളിൽ സംഭവിച്ചത് കേരളത്തിലും സംഭവിക്കാതിരിക്കണമെന്ന് സിപിഎം കരുതുന്നു. എന്നാൽ കാര്യങ്ങൾ ബംഗാൾ മട്ടിലാണ് നീങ്ങുന്നത്.

യച്ചൂരിക്ക് പുറമേ മലയാളി അംഗമായ എം എ ബേബിക്കും പിണറായിയോട് താത്പര്യമില്ല. ബേബി കേരള പാർട്ടിക്കെതിരെ കർശനമായ നിലപാടുകളാണ് പി.ബിയിൽ എടുക്കുന്നത്. മാവോയിസ്റ്റ് എന്ന പേരിൽ യു എ പി എ ചുമത്തിയ മാർക്സിസ്റ്റുകാരുടെ കാര്യത്തിൽ ബേബി പിന്നറായിയെ തുറന്ന് എതിർത്തു. പിണറായിയുടെ സാന്നിധ്യത്തിൽ അദ്ദേഹത്തിനെതിരെ സംസാരിക്കുക പോലും ചെയ്തു. തിരുവനന്തപുരത്ത് എത്തിയ ബേബി സർക്കാരിനെതിരെ പരസ്യമായി പ്രതികരിച്ചു.

അടിയന്തിര ഘട്ടങ്ങളിൽ ഉപയോഗിക്കാനുള്ള ഹെലികോപ്റ്റർ വാടകയ്ക്ക് എടുക്കാനുള്ള സർക്കാർ നീക്കത്തെ സിപിഎം കേന്ദ്രനേത്യത്യം സാകൂതം ശ്രദ്ധിക്കുന്നുണ്ട്. കൂടുതൽ സേവനങ്ങൾ നൽകാമെന്നേറ്റ കമ്പനിയെ ഒഴിവാക്കി കൊണ്ടാണ് പവൻ ഹാൻസ് എന്ന കമ്പനിയിൽ നിന്നും ഹെലികോപ്റ്റർ വാടകയ്ക്ക് എടുക്കാൻ സർക്കാർ തീരുമാനിച്ചത്. ഇക്കാര്യത്തിൽ മുഖ്യമന്ത്രിയുടെ ഉപദേഷ്ടാവിനെതിരെ ആരോപണം ഉയർന്നിട്ടുണ്ട്. മാസം 1.44 കോടിക്കാണ് മൂന്ന് ഹെലികോപ്റ്റർ വാടകക്ക് എടുക്കാൻ തീരുമാനിച്ചത്. പിന്നീട് ഇതിൽ മാറ്റമുണ്ടായി. ഒരു ഹെലികോപ്ർ ഇതേ തുകക്കാണ് വാടകക്ക് എടുക്കുന്നത്. കടുത്ത സാമ്പത്തിക പ്രതിസന്ധിയിലുള്ള സർക്കാരിനെ ഇത്തരത്തിൽ ദുരൂപയോഗം ചെയ്യുന്നതിന് പിന്നിൽ വ്യക്തമായ അജണ്ടയുണ്ടെന്നാണ് ആരോപണം.

അതിടെ കേരള ജല അതോറിറ്റിയിലും സമാനമായ അഴിമതിക്ക് കളമൊരുങ്ങിയിട്ടുണ്ട്. ചുരുക്കത്തിൽ അഴിമതി വിരുദധ പ്രതിച്ഛായയോടെ അധികാരമേറ്റ സർക്കാർ കൂടുതൽ പ്രതിരോധത്തിലായി തീർന്നിരിക്കുകയാണ്. ഇത് പിബിയെ ശരിക്കും ഭയപ്പെടുത്തുന്നു .