എറണാകുളത്ത് വാനിലെത്തിയ സംഘം നാലുവയസുകാരനെ തട്ടിക്കൊണ്ട് പോയതായി സംശയിക്കുന്നു. കുട്ടിയെ രക്ഷിക്കാന്‍ ശ്രമിച്ച കോളെജ് വിദ്യാര്‍ഥിനിയെ കുത്തി പരുക്കേല്‍പ്പിച്ചതായും പോലീസ് പറയുന്നു. തിങ്കളാഴ്ച ഉച്ചയോടെ നടന്ന സംഭവത്തില്‍ കൈത്തണ്ടയ്ക്ക് പരുക്കേറ്റ വിദ്യാര്‍ഥിനി സ്വകാര്യ ആശുപത്രിയില്‍ ചികിത്സയിലാണ്.

പെണ്‍കുട്ടി ബസ് സ്റ്റോപിലെത്തിയപ്പോള്‍ സമീപം നിര്‍ത്തിയ വാനില്‍ നിന്ന് ഒരു കുട്ടി കരഞ്ഞുകൊണ്ട് ഓടി വന്നുവെന്ന് പൊലീസ് പറയുന്നു. പെട്ടെന്ന് മുഖം മറച്ചയൊരാള്‍ വാനില്‍ നിന്ന് പിന്നാലെയെത്തി കുട്ടിയെ വലിച്ചിഴച്ച് കൊണ്ട് പോയി. തട്ടിക്കൊണ്ട് പോകുകയാണെന്ന് സംശയം തോന്നിയതിനാല്‍ പെണ്‍കുട്ടി ഓടിച്ചെന്ന് കുട്ടിയുടെ കാലില്‍ പിടിച്ച് വലിച്ചു. അപ്പോഴാണ് സംഘത്തിലൊരാള്‍ പെണ്‍കുട്ടിയെ കത്തികൊണ്ട് ആക്രമിച്ചതെന്നും പകച്ച് പോയ പെണ്‍കുട്ടിയെ തള്ളിമാറ്റി വാന്‍ വേഗത്തില്‍ കടന്നുകളഞ്ഞെന്നുമാണ് പെണ്‍കുട്ടി മൊഴിയില്‍ പറയുന്നത്. പൈപ്പ്‌ലൈന്‍ റോഡിലൂടെ ആലുവ ഭാഗത്തേക്കാണ് വാഹനം പോയതെന്നും പെണ്‍കുട്ടി പറയുന്നു.

കോളജിലേക്ക് പോകുന്നതിനായി ബസ്സ്‌റ്റോപ്പിലെത്തിയ പെണ്‍കുട്ടി പിന്നീട് സ്വകാര്യ ആശുപത്രിയില്‍ ചികിത്സ തേടുകയായിരുന്നു. അതേസമയം ഇതുവരേക്കും കുട്ടിയെ കാണാതായതായി പരാതി ലഭിച്ചിട്ടില്ലെന്നാണ് പൊലീസ് പറയുന്നത്. പെണ്‍കുട്ടി നല്‍കിയ പരാതിയുടെ അടിസ്ഥാനത്തില്‍ ആലുവ വരെയുള്ള റോഡുകളിലെയും സമീപത്തെ വ്യാപാര സ്ഥാപനങ്ങളിലെയും സിസിടിവിയും മൊബൈല്‍ ടവറും പരിശോധിച്ചുവരികയാണെന്ന് പൊലീസ് അറിയിച്ചു.