അലനെയും താഹയെയും ആജീവാനന്ത കാലം ജയിലിൽ അടക്കാൻ കേസ് എൻ ഐ എക്ക് കൈമാറിയത് സർക്കാരിന്റെ നാടകീയനീക്കം. സംസ്ഥാന പോലീസിന്റെ കൈയിൽ നിന്നും കേസ് എൻ ഐ എക്ക് വിട്ടുകൊടുത്തത് ഉന്നതരുടെ നിർദ്ദേശ പ്രകാരമാണെന്നാണ് വിവരം.

അതേസമയം സംഭവം സി പി എമ്മിന്റെ അടിവേര് ഇളക്കി തുടങ്ങി. സി പി എം പ്രവർത്തകരായ അലനെയും താഹയെയും ദേശീയ അന്വേഷണ ഏജൻസിക്ക് പണയം വച്ചതോടെ മലബാറിൽ സി പി എം പ്രവർത്തകർ കൂട്ടത്തോടെ പാർട്ടി വിടാൻ ഒരുങ്ങുന്നു. സി പി എമ്മിനെക്കാൻ നല്ലത് ബി ജെ പിയും ആർ എസ് എസുമാണെന്ന് തുറന്നു പറഞ്ഞു കൊണ്ടാണ് ഒരു കൂട്ടം പ്രവർത്തകർ സിപിഎം വിടാൻ ആലോചിക്കുന്നത്.

യുവ മാവോയിസ്റ്റുകളുടെ കാര്യത്തിൽ പോലീസ് ചില വിട്ടുവീഴ്ചകൾ ചെയ്യുമെന്നാണ് മലബാറിലെ പാർട്ടി പ്രവർത്തകർ കരുതിയിരുന്നത്. സർക്കാർ അതിന് നിർദ്ദേശം നൽകിയിട്ടുണ്ടെന്ന് പാർട്ടി നേതാക്കൾ കുടുംബത്തെ അറിയിച്ചിരുന്നു. എന്നാൽ തുടക്കം മുതൽ മുഖ്യമന്ത്രി മാവോയിസ്റ്റ് വിഷയത്തിൽ കർശന നിലപാടാണ് സ്വീകരിച്ചത് . സിപിഎം നേതൃത്വം കർശന നിലപാട് വേണ്ടെന്ന തീരുമാനത്തിലായിരുന്നു. കോടിയേരി സ്ഥലത്തിലെങ്കിലും അദ്ദേഹവും വിഷയത്തിൽ ഇടപെട്ടു. സി പി എം കോഴിക്കോട് ജില്ലാ സെക്രട്ടറി യുവാക്കളെ രക്ഷിക്കുന്ന നിലപാടാണ് ആദ്യം മുതൽ സ്വീകരിച്ചതെങ്കിലും പിന്നീട് നിശബ്ദനായി.

സി പി എമ്മിന്റെ പരസ്യമായ സഹായം സർക്കാരിന്റെ ഇമേജ് മോശമാക്കുമെന്ന് കണ്ടപ്പോഴാണ് രഹസ്യപിന്തുണയിലേക്ക് കാര്യങ്ങൾ നീങ്ങിയത്. മുഖ്യമന്ത്രി ഉൾപ്പെടെയുള്ളവർ അലനെയും താഹയെയും തള്ളി പറഞ്ഞിട്ടും ഇവരുടെ കുടുംബം സർക്കാരിനെതിരെ രംഗത്തെത്താത്തത് ഇതു കൊണ്ടായിരുന്നു. സി പി എമ്മിലെ ഒരു കൂട്ടം നേതാക്കൾ ഇവർക്ക് വേണ്ടി ഇടപെട്ടിരുന്നു. കോഴിക്കോട് എസ്.പി. എ.വി. ജോർജ് സി പി എം വിശ്വസ്തനാണ്. അലനും താഹക്കും അനുകൂലമായ നിലപാട് പരസ്യമായി സ്വീകരിച്ച ജോർജ് പക്ഷേ കേന്ദ്ര അന്വേഷണ ഏജൻസിക്ക് കൃത്യമായ വിവരങ്ങൾ കൈമാറിയിരുന്നു. ഇതാണ് യുവാക്കളെ തേടി എൻ ഐ എ എത്താനുള്ള കാരണം.

അലന്റെയും താഹയുടെയും വീട്ടുകാരോട് ഹൈക്കോടതിയെ സമീപിക്കാൻ ഉപദേശിച്ചത് പോലീസാണ്. ഹൈക്കോടതി ആവശ്യപ്പെട്ട കേസ് ഡയറി വളരെ ശക്തമായിരുന്നു. മാവോയിസ്റ്റുകളുടെ വീട്ടിൽ നിന്ന് രഹസ്യരേഖകളൊന്നും പിടി കൂടിയിട്ടില്ലെന്ന് പോലീസ് പരസ്യമായി പറഞ്ഞെങ്കിലും അതല്ല കോടതിയിൽ ഹാജരാക്കിയത്. ചില നോട്ടീസും പുസ്തകങ്ങളും മാത്രം കിട്ടിയെന്നാണ് പോലീസ് പറഞ്ഞത്. എന്നാൽ അതായിരുന്നില്ല വാസ്തവം.

മാവോയിസ്റ്റ് അനുഭാവം കൊണ്ടു മാത്രം ഒരാളെ മാവോയിസ്റ്റ് ആക്കരുതെന്ന് കോടതികൾ പലവട്ടം പറഞ്ഞിട്ടുണ്ട്. ഈ കേസിൽ കോടതി എന്ത് പറയുമെന്ന് കണ്ടറിയാം. ഒരിക്കലും ദുർബലമായ ഒരു കേസിൽ ഹൈക്കോടതി യു. എ പി എ ചുമത്താൻ അനുവദിക്കില്ല. മുമ്പും ഇത്തരത്തിലുള്ള നീക്കങ്ങളെ ഹൈക്കോടതി എതിർത്തിട്ടുണ്ട്. അതിന് മുമ്പ് തന്നെ സംഗതി എൻ ഐ എക്ക് കൈമാറി സി പി എം കൈകഴുകി.

അലനെയും താഹയെയും കേന്ദ്ര സർക്കാരിന് വിട്ടു കൊടുക്കരുതെന്നായിരുന്നു വീട്ടുകാരുടെ പ്രാർത്ഥന. അതുകൊണ്ടാണ് അവർക്കെതിരെ കേരള സർക്കാർ ആദ്യം തന്നെ നടപടിയെടുത്തത്. ഒരിക്കലും സഖാക്കളെ ബിജെപിയുടെ ഭാഗ്യപരീക്ഷണത്തിന് വിട്ടു കൊടുക്കാൻ സി പി എം തയ്യാറാവില്ലെന്ന് വീട്ടുകാരും സി പി എം പ്രവർത്തകരും കരുതി.

പ്രോസിക്യൂഷന്റെ ഭാഗത്ത് നിന്ന് പോലും സഖാക്കൾക്ക് കാര്യമായ സഹായം ലഭിച്ചില്ല. ഇനി തീരുമാനമെടുക്കേണ്ടത് ഹൈക്കോടതിയാണ്. അതേസമയം മലബാറിൽ നിന്ന് ഒരു വലിയ വിഭാഗം സി പി എം പ്രവർത്തകർ മാവോയിസത്തിലേക്ക് തിരിയുന്നുണ്ടെന്നും അതിൽ നിന്ന് അവരെ പിന്തിരിപ്പിക്കാൻ വേണ്ടിയാണ് ഇപ്രകാരം ചെയ്തതെന്നും വിവരമുണ്ട്. അലനെയും താഹയെയും ഒതുക്കിയില്ലെങ്കിൽ കൂടുതൽ പ്രവർത്തകർ മാവോയിസ്റ്റ് ആകാൻ സാധ്യതയുണ്ടെന്ന കണക്കുകൂട്ടലിലാണ് പോലീസ് നീക്കം കർശനമാക്കിയതെന്നും റിപ്പോർട്ടുണ്ട്.