51 വിദ്യാര്ഥികള്ക്ക് കടന്നല് കുത്തേറ്റു
മലപ്പുറം കൊളത്തൂര് പാങ്ങ് വെസ്റ്റ് എഎല്പി സ്കൂളില് രാവിലെ ഒന്പതേകാലോടെ സ്കൂള് ബസില്നിന്നിറങ്ങി ക്ലാസുകളിലേക്ക് തിരിച്ച 51 വിദ്യാര്ഥികള്ക്ക് കടന്നല് കുത്തേറ്റു.
ഇതില് സാരമായി പരുക്കേറ്റ 11 പേരെ മലപ്പുറം കോട്ടപ്പടി താലൂക്ക് ആശുപത്രിയില് പ്രവേശിപ്പിച്ചു. സ്കൂളിനു പുറത്തുനിന്ന് ഇരച്ചെത്തിയ കടന്നല്ക്കൂട്ടമാണ് ആക്രമിച്ചത്. സമീപത്തെ വീട്ടിലെ തെങ്ങു മുറിക്കുന്നതിനിടെയാണ് കടന്നല്ക്കൂടിളകിയതെന്നു കരുതുന്നു.
കുത്തേറ്റ കുട്ടികളെ നാട്ടുകാരുടെ സഹായത്തോടെ അധ്യാപകര് ഉടനെ ചെണ്ടിയില് പിഎച്ച്സിയില് എത്തിച്ച് പ്രാഥമിക ചികിത്സ നല്കി. ഒന്നിലേറെ കുത്തേറ്റ 11 കുട്ടികളെയാണ് താലൂക്ക് ആശുപത്രിയിലേക്കു മാറ്റിയത്. കുട്ടികളുടെ തലയിലും ദേഹത്തു പല ഭാഗത്തും കുത്തേറ്റിട്ടുണ്ട്. ഒന്നാം ക്ലാസ് മുതല് നാലാം ക്ലാസ് വരെയുള്ള കുട്ടികളാണ് കടന്നല് ആക്രമണത്തിനിരയായത്. കടന്നല് കുത്തേറ്റതിനു ശേഷം ചില കുട്ടികള്ക്ക് ഛര്ദിയുമുണ്ടായി.
പ്രീപ്രൈമറിയടക്കം 260 കുട്ടികള് പഠിക്കുന്ന സ്കൂളാണിത്. സ്കൂളിലേക്ക് സ്കൂള് ബസിലെ ആദ്യ ട്രിപ്പില് എത്തിയതായിരുന്നു കുട്ടികള്. കടന്നല് സാന്നിധ്യം തിരിച്ചറിഞ്ഞതിനാല് മറ്റ് ബസുകള് സ്കൂള് പരിസരത്തേക്ക് എത്തുന്നത് കുറെ നേരത്തേക്ക് തടഞ്ഞുവച്ചിരുന്നു.
https://www.facebook.com/Malayalivartha
