പൗരത്വ ഭേദഗതി നിയമത്തിനെതിരായ പ്രക്ഷോഭം ആളിപടരുമ്പോൾ മംഗളൂരുവിൽ ഉണ്ടായ അക്രമ സംഭവങ്ങൾ റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകരെ മംഗളൂരു പൊലീസ് കസ്റ്റഡിയിലെടുത്തത് അപലപനീയമെന്ന് മന്ത്രി കടകംപളളി സുരേന്ദ്രൻ വ്യക്തമാക്കി . അടിയന്തരാവസ്ഥയ്ക്ക് സമാനമായ സംഭവമെന്നാണ് മാധ്യമപ്രവര്‍ത്തകരെ കസ്റ്റഡിയിലെടുത്ത സംഭവത്തെ കടകംപളളി വിശേഷിപ്പിച്ചത്. കർണാടക സംസ്ഥാനം വെളളരിക്കാപ്പട്ടണമാണോയെന്നും കടകംകപളളി ചോദിച്ചു. പൗരത്വ ഭേദഗതി നിയമത്തിനെതിരായ പ്രക്ഷോഭം കൂടുതല്‍ ശക്തമായ നിലയിലേയ്ക്ക് വ്യാപിക്കുകയാണ് .

അതേസമയം മംഗളൂരുവില്‍ പോലീസ് കസ്റ്റഡിയിലെടുത്ത മലയാളി മാധ്യമപ്രവര്‍ത്തകരെക്കുറിച്ച് വ്യാജ പ്രചരണം. വ്യാജ മാധ്യമപ്രവര്‍ത്തകരാണ് മംഗളൂരുവില്‍ റിപ്പോര്‍ട്ട് ചെയ്യാനെത്തിയതെന്നും ഇവര്‍ക്ക് തിരിച്ചറിയല്‍ കാര്‍ഡില്ലെന്നുമുള്ള പ്രചാരണമാണ് മംഗളൂരു പോലീസും ചില മാധ്യമങ്ങളും ചേര്‍ന്ന് നടത്തിയത്. കലാപമുണ്ടാക്കാന്‍ വന്നവരാണ് ഈ മാധ്യമപ്രവര്‍ത്തകര്‍ എന്ന രീതിയിലുള്ള പ്രചാരണമാണ് നടക്കുന്നത്.