കോഴിക്കോട് ജില്ലാ പഞ്ചായത്തിന്റെ അധീനതയിലുള്ള കൂത്താളി ജില്ലാ കൃഷിഫാമിലെ മുഴുവന്‍ കൃഷിയും നൂറുകണക്കിനു കുരങ്ങന്‍മാര്‍ കൂട്ടത്തോടെ വന്നു നശിപ്പിക്കുകയാണ്.

കാട്ടുപന്നികളുടെ ശല്യമാണ് മുന്‍ വര്‍ഷങ്ങളില്‍ ഉണ്ടായിരുന്നത്. അതിനെ ഒരു പരിധി വരെ പ്രതിരോധിച്ച് കൃഷിയെ രക്ഷിക്കാന്‍ ജീവനക്കാര്‍ക്ക് സാധിച്ചിരുന്നു. ഇക്കുറി തെങ്ങിന്‍ തൈ ഉത്പ്പാദിപ്പിക്കാനായി ഏഴായിരത്തോളം വെസ്റ്റ് കോസ്റ്റ് ടോള്‍ വിത്തുതേങ്ങ പാകിയിരുന്നു. മുളച്ച് ആറ് മാസം വളര്‍ച്ചയെത്തിയ തെങ്ങിന്‍ തൈകളില്‍ വളരെ നല്ലൊരു ശതമാനവും നശിപ്പിക്കപ്പെടുകയാണുണ്ടായത്.

രണ്ടുമാസത്തിനിടയില്‍ 1800 തൈകള്‍ ഇതിനോടകം നശിപ്പിച്ചു കഴിഞ്ഞു. തൈകളുടെ കൂമ്പ് വലിച്ചൂരിയെടുത്തു ചവച്ച് തുപ്പുകയാണ് ഇവ ചെയ്യുന്നത്. അടുത്ത ജൂണില്‍ കൃഷിഭവനുകളില്‍ കൂടിയും മറ്റും കര്‍ഷകര്‍ക്കു വിതരണം ചെയ്യേണ്ട തൈകളാണിത്.

കൂത്താളി ജില്ലാ കൃഷിഫാം മൊത്തം 100 ഏക്കര്‍ സ്ഥലത്താണ് വ്യാപിച്ചു കിടക്കുന്നത്. അതില്‍ 40 ഏക്കറോളം സ്ഥലത്താണ് വിവിധ കൃഷിയുള്ളത്. പച്ചക്കറിക്കും വിത്തിനുമായി പച്ചക്കറി വിത്തുകള്‍ പാകിയിട്ടുണ്ട്. ഇതും കുരങ്ങുഭീഷണിയുടെ നിഴലിലാണ്. രാവിലെ മുതല്‍ വൈകീട്ടു വരെ കൃഷിയിടങ്ങളില്‍ കാവല്‍ ഏര്‍പ്പെടുത്തേണ്ടി വരുന്ന ദുരവസ്ഥയുമുണ്ട്.

22 ഫീല്‍ഡുകളായി തിരിച്ചാണ് 40 ഏക്കര്‍ സ്ഥലം കൃഷിക്കായി ഉപയോഗിക്കുന്നത്. വിശാലമായ ഫീല്‍ഡുകളില്‍ പലയിടത്തായാണ് പച്ചക്കറി കൃഷി. പച്ചക്കറികള്‍ പാകമായാല്‍ മുന്‍കാലങ്ങളിലും പറിച്ചു നശിപ്പിരുന്നെങ്കിലും ഇക്കുറി പ്രശ്‌നത്തിന്റെ രൂക്ഷത പതിന്മടങ്ങാണ്. പ്രശ്‌നം വനം വകുപ്പിന്റെ ശ്രദ്ധയില്‍ ഫാം അധികൃതര്‍ പെടുത്തിയിട്ടുണ്ട്.