തെങ്ങില് കയറാതെയും ചെത്താതെയും കള്ള് ഉണ്ടാക്കാനുള്ള വിദ്യ പാലക്കാട്ട് പൊടിപൊടിക്കുന്നു... തമിഴ്നാടുമായി അതിര്ത്തി പങ്കിടുന്നിടത്തും ഇത്തരത്തിലുള്ള വ്യാജകള്ള് സുലഭമാണ്
തെങ്ങില് കയറാതെയും ചെത്താതെയും കള്ള് ഉണ്ടാക്കാനുള്ള വിദ്യ പാലക്കാട്ട് പൊടിപൊടിക്കുന്നു. തമിഴ്നാടുമായി അതിര്ത്തി പങ്കിടുന്നിടത്തും ഇത്തരത്തിലുള്ള വ്യാജകള്ള് സുലഭമാണ്. ഇത് എന്തുകൊണ്ടാണ് ഉണ്ടാക്കുന്നതെന്ന് കണ്ടെത്താനുള്ള ശ്രമത്തിലാണ് എക്സൈസ്. ഒരു കുടം കള്ളുണ്ടാക്കാന് കലക്കിയ പൊടിയുടെ രണ്ട് തുള്ളി മതി. കണ്ടാല് നല്ല നാടന് ചെത്ത് കള്ള് പോലിരിക്കും. മണവും ഗുണവും കെങ്കേമം എന്നാണ് വില്പ്പനക്കാര് അവകാശപ്പെടുന്നത്. എക്സൈസ് നടത്തിയ പരിശോധനയിലാണ് തുരുതുരപ്പ് എന്ന പേരില് പ്രാദേശികമായി അറിയപ്പെടുന്ന പൊടി പിടിച്ചെടുത്തത്. ഇതിനൊപ്പം ഉപയോഗിക്കുന്ന കൊഴുപ്പുള്ള ദ്രാവകം എന്താണെന്ന് തിരിച്ചറിഞ്ഞിട്ടില്ല. രണ്ടിന്റെയും സാമ്പിളുകള് കൊച്ചിയിലെ ലാബില് പരിശോധനയ്ക്ക് അയയ്ച്ചിട്ടുണ്ട്.
പാലക്കാട്ടെ തമിഴ്നാട് അതിര്ത്തി പ്രദേശങ്ങളില് വ്യാജ കള്ളുണ്ടാക്കുന്ന ദ്രാവകത്തിന്റെയും പൊടിയുടെയും വില്പ്പന അതീവരഹസ്യമാണ്. ഇവിടങ്ങളിലെ ചില കടകളില് ചെറിയ കുപ്പികളില് ഇതിനുള്ള ദ്രാവകം ലഭിക്കും. പരിചയക്കാര്ക്ക് മാത്രമേ നല്കൂ. 100 ഗ്രാം പൊടിക്കും 100 മില്ലി ദ്രാവകത്തിനും 200 രൂപ നല്കണം. കള്ള് കലക്കാനുള്ള പൊടി പോലെ കാഴ്ചയില് തോന്നുമെങ്കിലും സാധാരണ ഉപയോഗിക്കുന്ന സാക്രിനേക്കാള് കൂടിയ പൊടിയാണെന്ന് എക്സ്സൈസ് സംശയിക്കുന്നു. അതിനാലാണ് പരിശോധനയ്ക്കായി ലാബില് അയച്ചത്. തൊഴിലാളികളും മറ്റ് സ്ഥലങ്ങളില് നിന്ന് എത്തുന്നവരുമാണ് ഇത്തരം കള്ള് ഉപയോഗിക്കുന്നത്. പലപ്പോഴും ഇവ വിലക്കുറവില് ലഭിക്കുന്നു എന്നത് കൂടുതല് ആവശ്യക്കാര് എത്താന് കാരണമാകുന്നു.
ഈവര്ഷം ആദ്യം തെങ്കാശി സ്വദേശി അറുമുഖ സ്വാമി ഒറിജിനലിനെ വെല്ലുന്ന വ്യാജ കള്ള് നിര്മിച്ചത് എക്സൈസ് ഇന്റലിജന്സ് പിടിച്ചെടുത്തിരുന്നു. 80 ലിറ്റര് വെള്ളത്തില് മൂന്ന് ടീ സ്പൂണ് പ്രത്യേക പൗഡര് കലര്ത്തുമ്പോള് 20 ലിറ്റര് കള്ള് ലഭിക്കും. അറുമുഖ സ്വാമിയുടെ ബന്ധുവായ തെങ്കാശിക്കാരനാണ്് പൊടിയുടെ രഹസ്യ ചേരുവ തയാറാക്കുന്നത്. ചോളപ്പൊടിയില് യൂറിയ, വാനില എസന്സ്, സോഡിയം ലയോറല് സള്ഫേറ്റ് എന്നിവ കലര്ത്തിയ ശേഷം മിക്സിയില് അടിച്ച് കൂട്ട് തയ്യാറാക്കും. അത് വെള്ളവുമായി ചേര്ത്ത് 20 മിനിട്ട് ഫ്രിഡ്ജില് വച്ച് തണുപ്പിച്ചാല് നല്ല ഒന്നാന്തരം വ്യാജക്കള്ള് റെഡി. കേരളത്തില് പഴയപോലെ കള്ള് ചെത്ത് വ്യാപകമല്ലാത്തത് കൊണ്ടാണ് ഇത്തരത്തില് വ്യാജ കള്ളുകള് അതിര്ത്തിപ്രദേശങ്ങളില് വ്യാപകമായി ലഭിക്കുന്നത്.
നല്ല കള്ള് വിറ്റിരുന്ന ഷാപ്പുകാര്ക്ക് അറുമുഖ സ്വാമി തലവേദനയായതോടെയാണ് അവര് വിവരം എക്സൈസിനെ അറിയിച്ചത്. ഇയാള് ആട്ടിയ മാവിന്റെ കച്ചവടം നടത്തുകയായിരുന്നു. അതിനാല് തെളിവുകള് ശേഖരിച്ച ശേഷമാണ് എക്സൈസ് വലയിലാക്കിയത്. അറുമുഖ സ്വാമി ഉപയോഗിക്കുന്ന ബൈക്കിന്റെ നമ്പര് വ്യാജമാണെന്ന് കണ്ടെത്തിയതോടെയാണ് സംശയം ബലപ്പെട്ടത്. വീട്ടില് നടത്തിയ പരിശോധനയില് ആവശ്യക്കാര്ക്കായി കരുതിവച്ചിരുന്ന 120 കിലോയോളം പൗഡര് കണ്ടെടുത്തിരുന്നു. ബാറുകളില് പോയി മദ്യപിക്കാന് പണമില്ലാത്തവരും ബിവറേജസില് ക്യൂ നില്ക്കാന് മടിയുള്ളവരുമാണ് ഇത്തരത്തിലുള്ള വ്യാജ കള്ളും മറ്റ് ലഹരിവസ്തുക്കളും ഏറ്റവും കൂടുതല് ഉപയോഗിക്കുന്നതെന്ന് എക്സൈസ് ഉദ്യോഗസ്ഥര് പറയുന്നു.
https://www.facebook.com/Malayalivartha
