ഫോണില് ഭക്ഷണം ഓര്ഡര് ചെയ്ത് അക്കൗണ്ട് നമ്പര് ശേഖരിച്ച് തട്ടിപ്പ്
പത്തനംതിട്ടയിലെ ഹോട്ടലുകളില് പട്ടാള ഉദ്യോഗസ്ഥരാണെന്ന വ്യാജേന ഫോണില് വിളിച്ച് ഭക്ഷണം ഓര്ഡര് ചെയ്യുകയും പണം ബാങ്ക് അക്കൗണ്ടിലേക്ക് ട്രാന്സ്ഫര് ചെയ്യുമെന്ന് അറിയിച്ച് പണം തട്ടുകയും ചെയ്യുന്ന സംഘത്തെ സംബന്ധിച്ച് പോലീസില് പരാതി നല്കിയെങ്കിലും അന്വേഷണം ഊര്ജിതമല്ലെന്ന് വ്യാപാരികള്.
ഇതരസംസ്ഥാനക്കാരായ ആളുകളാണ് ഫോണില് ബന്ധപ്പെടുകയെന്ന് ഹോട്ടല് വ്യാപാരികള് പറഞ്ഞു. ഭക്ഷണത്തിന്റെ വിലയായി പണം ബാങ്കിലേക്ക് ഇടുന്നതിനുവേണ്ടി അക്കൗണ്ട് നമ്പറും എടിഎം കാര്ഡിന്റെ കോപ്പിയും ആവശ്യപ്പെടുന്ന സംഘം ഇത് വാട്ട്സാപ്പിലൂടെ ശേഖരിക്കുകയും ചെയ്തു. കട ഉടമയുടെ ഫോണിലേക്കു വന്ന ഒടിപി കൂടി ശേഖരിച്ച് അക്കൗണ്ടിലെ പണം തട്ടുകയാണ് ഇവരുടെ രീതിയെന്ന് വ്യാപാരികള് പറഞ്ഞു.
ആദ്യം തട്ടിപ്പ് അരങ്ങേറിയത് പത്തനംതിട്ട കോളജ് റോഡിലെ പാറയില് ഹോട്ടലിലാണ്. പിന്നാലെ കോന്നി ഗ്രീന്ചില്ലി ഹോട്ടല്, കുമ്പഴ പരുത്തിയാനിക്കല് ഹോട്ടല് എന്നിവിടങ്ങളിലും തട്ടിപ്പിനു ശ്രമമുണ്ടായി. സമാന സംഭവങ്ങള് ആവര്ത്തിക്കുന്നതിനിടെ പോലീസില് നല്കിയ പരാതിയില് യാതൊരു അന്വേഷണവും നടക്കാത്തത് തട്ടിപ്പുകാര്ക്ക് പ്രയോജനമാകുന്നതായി ഹോട്ടല് ഉടമകള് പറഞ്ഞു. നേരത്തെ റാന്നിയിലും തിരുവല്ലയിലും സമാനസംഭവങ്ങള് ഉണ്ടായി.
തട്ടിപ്പു സംഘങ്ങള്ക്കെതിരെ വ്യാപാരികള് ജാഗ്രത കാട്ടണമെന്നും സംഘത്തെ കുടുക്കാന് നടപടി ഉണ്ടാകണമെന്നും ഹോട്ടല് ആന്ഡ് റസ്റ്റോറന്റ് അസോസിയേഷന് ഭാരവാഹികളായ കെ.എം. രാജ, ശശി ഐസക്, നവാസ് തനിമ എന്നിവര് ആവശ്യപ്പെട്ടു.
https://www.facebook.com/Malayalivartha
