പ്രധാനമന്ത്രി നരേന്ദ്ര മോദി ആഹ്വാനം ചെയ്ത ജനതാ കര്‍ഫ്യൂവിനു തലേദിവസമായ ശനിയാഴ്ച കേരളത്തില്‍ റെക്കോര്‍ഡ് മദ്യവില്‍പന. 21ന് സംസ്ഥാനത്തെ ബിവറേജസ് ഷോപ്പുകളിലൂടെ വിറ്റത് 63.92 കോടി രൂപയുടെ മദ്യം. വെയര്‍ഹൗസുകളിലൂടെ വിറ്റത് 12.68 കോടിയുടെ മദ്യമാണ്.

കഴിഞ്ഞവര്‍ഷം ഇതേദിവസം ബിവറേജസ് ഔട്ട്ലറ്റിലൂടെ വിറ്റത് 29.23 കോടിയുടെ മദ്യ‌മാണ്. വില്‍പനയില്‍ 118.68 ശതമാനം വര്‍ധനയാണ് ഉണ്ടായത്. 265 മദ്യവില്‍പനശാലകളാണ് ബിവറേജസ് കോര്‍പറേഷനുള്ളത്. കണ്‍സ്യൂമര്‍ഫെഡിന്റെ 36 മദ്യവില്‍പനശാലകളുടെ കണക്ക് ലഭിച്ചിട്ടില്ല. ശരാശരി 26 കോടിയുടെ മദ്യവില്‍പനയാണ് സംസ്ഥാനത്ത് ഒരു ദിവസം നടക്കുന്നത്.

എന്നാല്‍ ജനതാ കര്‍ഫ്യൂവിന്റെ തലേദിവസം വന്‍ വില്‍പ്പനയാണ് നടന്നതെന്ന് കണക്കുകള്‍ വ്യക്തമാക്കുന്നു. മദ്യത്തില്‍ നിന്നുള്ള വില്‍പന നികുതി 2018 -19 ല്‍ 9615 കോടി രൂപയായിരുന്നു. 2019 - 20 (ജനുവരി 31വരെ) 7864.71 കോടി നികുതിയായി ലഭിച്ചു. 2018-19ല്‍ വിറ്റത് 216.34 ലക്ഷം കേയ്സ് മദ്യവും 121.12 ലക്ഷം കേയ്സ് ബിയറുമാണ്. 2019-20ല്‍ 186.82 ലക്ഷം കേയ്സ് മദ്യവും 96.20 ലക്ഷം കേയ്സ് ബിയറും വിറ്റു.

2009-10 മുതല്‍ 2018-19 വരെ ബാറുകള്‍, മറ്റ് ലൈസന്‍സികള്‍, കണ്‍സ്യൂമര്‍ഫെഡ്, ബിവറേജസ് കോര്‍പറേഷന്‍ തുടങ്ങിയവ വഴി വിറ്റത് 99,473 കോടിയുടെ മദ്യമാണ്. കള്ളുഷാപ്പുകള്‍വഴിയുള്ള വില്‍പനയുടെ കണക്ക് ഇതില്‍ ഉള്‍പ്പെട്ടിട്ടില്ല.