ചില വക്ര ബുദ്ധികളും അപൂര്വം കുരുട്ടു രാഷ്ട്രീയക്കാരും തെറ്റായ പ്രചാരണം നടത്തുന്നു; അതിഥി തൊഴിലാളികള്ക്ക് കൂടുതല് പരിഗണന എന്ന മട്ടിലാണ് ഇവര് പ്രചരണം നടത്തുന്നതെന്ന് മുഖ്യമന്ത്രി
കോവിഡുമായി ബന്ധപ്പെട്ട് സംസ്ഥാനത്ത് ചില വക്ര ബുദ്ധികളും അപൂര്വം കുരുട്ടു രാഷ്ട്രീയക്കാരും തെറ്റായ പ്രചാരണം നടത്തുന്നുവെന്ന് മുഖ്യമന്ത്രി പിണറായി വിജയന്. ഇത്തരക്കാര്ക്കെതിരേ കര്ശന നടപടി സ്വീകരിക്കുമെന്ന് അദ്ദേഹം വ്യക്തമാക്കി. അതിഥി തൊഴിലാളികള്ക്ക് കൂടുതല് പരിഗണന എന്ന മട്ടിലാണ് ഇവര് പ്രചരണം നടത്തുന്നതെന്നും മുഖ്യമന്ത്രി വാര്ത്താസമ്മേളനത്തില് പറഞ്ഞു.
പത്തനംതിട്ട തണ്ണിത്തോടില് കോവിഡ് നിരീക്ഷണത്തില് കഴിയുന്ന പെണ്കുട്ടിയുടെ വീടിനുനേരെയുണ്ടായ അക്രമത്തെ മുഖ്യമന്ത്രി പിണറായി വിജയന് അപലപിച്ചു. ഇത്തരം പ്രവര്ണതകള് ഒരിക്കലും അംഗീകരിക്കാന് കഴിയില്ല. അക്രമം നടത്തിയവര്ക്കെതിരേ ധാക്ഷിണ്യമില്ലാത്ത നടപടി ഉണ്ടാകുമെന്നും മുഖ്യമന്ത്രി അറിയിച്ചു. ചൊവ്വാഴ്ച രാത്രിയിലാണ് തണ്ണിത്തോട് ഇടക്കണത്ത് കോവിഡ് നിരീക്ഷണത്തില് കഴിയുന്ന പെണ്കുട്ടിയുടെ വീടിനുനേരെ ആക്രമണം ഉണ്ടായത്.
കോയമ്ബത്തൂരില് നിന്നും കേരളത്തിലേക്ക് മടങ്ങി എത്തിയതിനെ തുടര്ന്നാണ് പെണ്കുട്ടി നിരീക്ഷണത്തില് കഴിയുന്നത്. പെണ്കുട്ടിയുടെ അച്ഛനെ ആക്രമിക്കുമെന്ന ഭീഷണിയെ തുടര്ന്ന് ഇവര് മുഖ്യമന്ത്രിക്ക് പരാതി നല്കിയിരുന്നു. ഇതിനു പിന്നാലെയാണ് ആക്രമണം നടന്നത്.
സന്നദ്ധം വോളണ്ടിയര്മാരുടെ രജിസ്ട്രേഷന് ഊര്ജിതമായി നടന്നുവെന്ന് മുഖ്യമന്ത്രി വ്യക്തമാക്കി. മൊത്തത്തില് ആവശ്യമുള്ളതില് അധികം വോളണ്ടിയര്മാര് രജിസ്റ്റര് ചെയ്തിട്ടുണ്ട്. പക്ഷേ 119 തദ്ദേശ സ്വയംഭരണ സ്ഥാപങ്ങളില് 50 താഴെ മാത്രം വോളണ്ടിയര്മാരാണുള്ളത്. ഇവിടെയും ശരാശരി എണ്ണം ആവശ്യമുണ്ട്. ഇക്കാര്യത്തില് പ്രത്യേക ഇടപടലിന് തീരുമാനിച്ചിട്ടുണ്ടെന്നും മുഖ്യമന്ത്രി പറഞ്ഞു.
സംസ്ഥാനത്ത് പോലീസിന്റെ സേവനം ഫലപ്രദമായി നടക്കുകയാണെന്ന് മുഖ്യമന്ത്രി ചൂണ്ടിക്കാണിച്ചു. നല്ലരീതിയുലുള്ള സേവനമാണ് പൊലീസ് പൊതുവെ നടത്തുന്നത്. എന്നാല് ചില തെറ്റായ പ്രവണതകള് അപൂര്വമായി റിപ്പോര്ട്ട് ചെയ്യപ്പെടുന്നുണ്ട്. വീണ്ടുവിചാരമില്ലാതെ പെരുമാറുന്ന ഒറ്റപ്പെട്ട ചില അനുഭവങ്ങള് ഉണ്ടാകുന്നുണ്ട്. ഔചിത്യപൂര്ണമായ ഇടപെടലാണ് ഉണ്ടാകേണ്ടതെന്നും അതാണ് സര്ക്കാര് പ്രതീക്ഷിക്കുന്നതെന്നും മുഖ്യമന്ത്രി പറഞ്ഞു.
ആശുപത്രികളില് അടിയന്തിര ചികിത്സക്ക് രക്തം കിട്ടാനുള്ള ബുദ്ധിമുട്ടുകള് റിപ്പോര്ട്ട് ചെയ്തിട്ടുണ്ടെന്ന് മുഖ്യമന്ത്രി പറഞ്ഞു. രക്തദാനത്തിന് സന്നദ്ധരാകുന്നവര് ഈ അവസരത്തില് മുന്നോട്ട് വരണം. മൊബൈല് യൂണിറ്റ് വഴിയും രക്തം ശേഖരിക്കാനുള്ള സംവിധാനമുണ്ടാകും. നേരതതെ തന്നെ രക്തദാന സേന രൂപീകരിച്ച സ്ഥാപനങ്ങളും സംഘടനകളും ഇക്കാര്യത്തില് ശ്രദ്ധിക്കണമെന്ന് അഭ്യര്ത്ഥിക്കുന്നതായും അദ്ദേഹം പറഞ്ഞു.
കണ്ണട ഉപയോഗിക്കുന്നവര്ക്ക് കണ്ണട കടകളില് പോകാന് നിര്വാഹമില്ലെന്ന് കാര്യം ശ്രദ്ധയില്പ്പെട്ടിട്ടുണ്ടെന്ന് അദ്ദേഹം പറഞ്ഞു. ആഴ്ചയില് ഒരു ദിവസം കണ്ണട കടകള്ക്ക് ഇളവ് നല്കാന് തീരുമാനിച്ചതായും അദ്ദേഹം കൂട്ടിച്ചേര്ത്തു.
https://www.facebook.com/Malayalivartha