കൊല്‍ക്കത്ത ശ്രീശാരദാ മഠം, രാമകൃഷ്ണ ശാരദാമിഷന്‍ എന്നിവയുടെ മുന്‍ ആഗോള ഉപാധ്യക്ഷയും തൃശൂര്‍ ശാരദാമഠം പ്രസിഡന്റുമായ അജയപ്രാണ മാതാ (93) സമാധിയായി. സ്വാതന്ത്ര്യസമര സേനാനി കുറൂര്‍ നീലകണ്ഠന്‍ നമ്പൂതിരിപ്പാടിന്റെ ജ്യേഷ്ഠന്‍ കുറൂര്‍ പരമേശ്വരന്‍ നമ്പൂതിരിപ്പാടിന്റെയും കൊച്ചി കണവള്ളി കല്യാണിക്കുട്ടി അമ്മയുടെയും മകളാണ്. അമ്മുക്കുട്ടി തമ്പുരാട്ടി എന്നായിരുന്നു പൂര്‍വാശ്രമത്തിലെ പേര്.

ഹൃദയസംബന്ധമായ അസുഖത്തെ തുടര്‍ന്നു ചികിത്സയില്‍ ഇരിക്കേ ഇന്നലെ ഉച്ചയ്ക്കു ഒരു മണിയ്ക്ക്് ശാസ്തമംഗലം ശ്രീരാമകൃഷ്ണ മിഷന്‍ ആശുപത്രിയിലാണ് വിട പറഞ്ഞത്. സമാധി ചടങ്ങുകള്‍ കോവിഡ് നിയന്ത്രണങ്ങള്‍ പാലിച്ചുകൊണ്ടു തൃശൂര്‍ പുറനാട്ടുകരയിലെ ശാരദാമഠം ആസ്ഥാനത്ത് ഇന്നു 10-ന് നടക്കും.

ശ്രീരാമകൃഷ്ണമഠം മുന്‍ അധ്യക്ഷന്‍ സ്വാമി രംഗനാഥാനന്ദയ്ക്കു ശേഷം മഠം പരമ്പരയിലെ കേന്ദ്ര സ്ഥാനത്തെത്തിയ രണ്ടാമത്തെ മലയാളിയാണ് അജയപ്രാണ മാതാ. 1952-ല്‍ മഠത്തിന്റെ തൃശൂര്‍ കേന്ദ്രത്തില്‍ ചേര്‍ന്ന അജയപ്രാണ മാതാ 21 വര്‍ഷം മഠം സ്‌കൂളില്‍ അധ്യാപികയായിരുന്നു. 1973-ല്‍ തിരുവനന്തപുരം കേന്ദ്രത്തിലെത്തി. കൊല്‍ക്കത്ത ശാരദാമഠത്തിന്റെ ആവശ്യപ്രകാരം സിഡ്നിയില്‍ 1982-ല്‍ മഠം സ്ഥാപിച്ച് 30 വര്‍ഷത്തോളം അവിടെ പ്രവര്‍ത്തിച്ചു.

മലേഷ്യ, സിംഗപ്പൂര്‍ എന്നിവിടങ്ങളില്‍ വേദാന്തപ്രചാരണം നടത്തി. ന്യൂ സൗത്ത് വെയില്‍സില്‍ രാമകൃഷ്ണ ശാരദ വേദാന്ത സൊസൈറ്റിയിലും പ്രവര്‍ത്തിച്ചു. 2011-ല്‍ ഇന്ത്യയില്‍ മടങ്ങിയെത്തി തൃശൂര്‍ പുറനാട്ടുകര ശാരദാമഠത്തിന്റെ അധ്യക്ഷയായി. തൈക്കാട് ശാരദാ മിഷനില്‍ പൊതുദര്‍ശനത്തിനു വച്ച ഭൗതിക ശരീരം വൈകിട്ട് 4-നു തൃശൂരിലെ മഠം ആസ്ഥാനത്തേക്കു കൊണ്ടുപോയി.