വർക്കലയിൽ വിദ്യാർഥിനി കടലിൽ തിരയിൽപ്പെട്ട് മരിച്ചു. അവധിയാഘോഷിക്കാൻ വർക്കലയിലെത്തിയ ഒഡിഷ സ്വദേശിനി പ്രിയങ്ക സാഹോ (19) ആണ് മരിച്ചത്.

സുഹൃത്തുക്കൾക്കൊപ്പം ഇന്നലെ വൈകുന്നേരം ബീച്ചിൽ കുളിക്കാനിറങ്ങിയപ്പോഴായിരുന്നു അപകടം സംഭവിച്ചത്. ബംഗളൂരുവിൽ പൈലറ്റ് കോഴ്സ് വിദ്യാർഥിനിയായ പ്രിയങ്കയും സുഹൃത്തുക്കളും വെള്ളിയാഴ്ചയാണ് വർക്കലയിലെത്തിയത്. ശനിയാഴ്ച കടലിൽ കുളിക്കുന്നതിനിടെ പ്രിയങ്കയും സുഹൃത്തുക്കളും തിരയിൽപ്പെടുകയായിരുന്നു.

നാട്ടുകാരും മത്സ്യത്തൊഴിലാളികളും ചേർന്ന് മൂവരെയും കരയ്ക്കെത്തിച്ച് ആശുപത്രിയിൽ എത്തിച്ചെങ്കിലും പ്രിയങ്കയുടെ ജീവൻ രക്ഷിക്കാനായി കഴിഞ്ഞില്ല. കൂടെയുണ്ടായിരുന്ന മറ്റ് രണ്ട് യുവതികൾ രക്ഷപ്പെട്ടു. ഒഡിഷ ഖോർഡ സ്വദേശി ബിജയകുമാറിന്റെയും മംമ്തയുടെയും മകളാണ് പ്രിയങ്ക. മൃതദേഹം താലൂക്ക് ആശുപത്രി മോർച്ചറിയിലാണ്.