കോട്ടയത്ത് വീട്ടമ്മയെ തലയ്ക്കടിച്ചു കൊന്ന കേസിലെ പ്രതി മുഹമ്മദ് ബിലാലിനെ കുറിച്ചുള്ള കൂടുതല് വിവരങ്ങള് പുറത്ത്.... അധികം സംസാരിക്കാത്ത സ്വഭാവക്കാരന്, ചെറുപ്രായത്തിലും ഇയാള് കുറ്റകൃത്യങ്ങള് ചെയ്തിരുന്നതായി പൊലീസ് ...
കോട്ടയത്ത് വീട്ടമ്മയെ തലയ്ക്കടിച്ചു കൊന്ന കേസിലെ പ്രതി മുഹമ്മദ് ബിലാലിനെ കുറിച്ചുള്ള കൂടുതല് വിവരങ്ങള് പുറത്ത്. ചെറുപ്രായത്തിലും ഇയാള് കുറ്റകൃത്യങ്ങള് ചെയ്തിരുന്നതായി പൊലീസ് കണ്ടെത്തി. ആലപ്പുഴ സക്കറിയ ബസാറിലെ ബന്ധുവീട്ടില് നിന്നാണ് ചെറുപ്രായത്തില് മുഹമ്മദ് ബിലാല് വളര്ന്നത്.
പ്രതിയുമായി തെളിവെടുപ്പിന് പൊലീസ് സംഘം ഇന്നലെയാണ് ആലപ്പുഴയില് എത്തിയത്. പ്രതിയായ മുഹമ്മദ് ബിലാലിനെ തിരിച്ചറിയാന് പ്രധാന കാരണം കൊല നടത്തിയ വീട്ടില് നിന്നു കാര് മോഷ്ടിച്ചതാണ്. ഈ കാര് മുഹമ്മദ് ബിലാല് ഒളിപ്പിച്ചത് ആലപ്പുഴയിലാണ്. ഇവിടെ നടത്തിയ അന്വേഷണത്തില് മുഹമ്മദ് ബിലാലിന്റെ കുട്ടിക്കാലത്തെ കുറിച്ച് പൊലീസിനു കൂടുതല് വിവരങ്ങള് ലഭിച്ചു.
കൊലപാതകത്തിനു ശേഷം കാറുമായി കടന്ന മുഹമ്മദ് ബിലാലിന്റെ യാത്ര സാധാരണ വഴിയില് നിന്നു മാറിയായിരുന്നു. ചെങ്ങളത്തെ പെട്രോള് പമ്പില് കയറിയ ശേഷം വൈക്കം വഴി ആലപ്പുഴയിലേക്ക്. ആലപ്പുഴ നഗരത്തിലെ മുഹമ്മദന്സ് സ്കൂളിനു സമീപം കാര് ഉപേക്ഷിച്ചു. മൂന്നാം ക്ലാസ് വരെ ബിലാല് പഠിച്ചത് ഈ സ്കൂളിലായിരുന്നു.
അന്ന് ആലപ്പുഴ വട്ടപ്പള്ളിയിലെ ബന്ധുവിന്റെ വീട്ടില് താമസിച്ചായിരുന്നു പഠനം. കാര് മൂടിയിട്ട ശേഷം ആലപ്പുഴയില് നിന്നു ബസുകള് മാറിക്കയറി എറണാകുളത്ത് എത്തി. ഇതിനിടെ ഇടപ്പള്ളിയിലെ ഹോട്ടലില് ജോലി സംഘടിപ്പിച്ചു. നന്നായി പാചകം അറിയുന്ന ബിലാലിനെക്കുറിച്ചു കാര്യമായി അന്വേഷിക്കാതെയാണു ഹോട്ടലുകാര് ജോലിക്ക് എടുത്തതെന്നാണു വിവരം
തിങ്കളാഴ്ച രാവിലെ പത്തോടെയാണു ബിലാല് ചെങ്ങളം കരിമ്പിന്ചിറ ഫ്യൂവല്സ് പെട്രോള് പമ്പില് എത്തിയതെന്നു പമ്പ് ജീവനക്കാരന് ടിജു ഓര്മിക്കുന്നു. കാറിന്റെ വലതു പിന്ഭാഗം ബങ്കിന്റെ അടുത്ത് എന്ന തരത്തിലാണു നിര്ത്തിയത്. ടാങ്ക് കാറിന്റെ ഇടതു ഭാഗത്താണ്, മാറ്റി നിര്ത്തണം എന്ന് ടിജു ആംഗ്യം കാണിച്ചു. കാര് പിന്നോട്ടെടുത്തു ശരിയായ രീതിയില് നിര്ത്തി.
കാറില് ഇരുന്ന പ്രതി ആ ഭാഗത്തെ ചില്ല് അല്പം താഴ്ത്തി. പെട്രോള് അടിക്കാന് പറഞ്ഞു. പ്രതി മാസ്ക് ധരിച്ചിരുന്നു. മുഖം വ്യക്തമായി കണ്ടില്ല. പെട്രോളിന്റെ പണം കൊടുത്ത ശേഷം കാര് മുന്നോട്ട് എടുത്തപ്പോള് പമ്പിന്റെ തറയില് കാര് ഇടിച്ചു സിമന്റ് അടര്ന്നു. ഇതു കാര്യമാക്കാതെ പ്രതി കാര് ഓടിച്ചു കുമരകം ഭാഗത്തേക്കു പോകുകയായിരുന്നുവെന്നു ടിജു പറയുന്നു.
ആലപ്പുഴയില് തെളിവെടുപ്പിനു എത്തിച്ചപ്പോള് നിരവധിപേര് മുഹമ്മദ് ബിലാലിനെ കാണാനെത്തി. ഇവരില് ചിലര് ബിലാലിനെ തിരിച്ചറിഞ്ഞു. അഞ്ച് കൊല്ലം മുന്പ് വരെ ഇയാള് നഗരത്തില് പല ഇടങ്ങളിലായി ജോലി ചെയ്തിരുന്നു. തട്ടുകടകള്, വ്യാപാരസ്ഥാപനങ്ങള് തുടങ്ങി നിരവധി സ്ഥലങ്ങളില് ഇയാള് ജോലി ചെയ്തിട്ടുണ്ട്. മോഷണവും അക്രമവും പതിവായതോടെ എല്ലായിടത്ത് നിന്നും പുറത്താക്കുകയായിരുന്നു. ബിലാല് ചെയ്ത കുറ്റകൃത്യങ്ങള് ഇപ്പോഴും ഓര്ക്കുന്നവരും ഈ കൂട്ടത്തിലുണ്ട്.
ചെറുപ്പത്തില് പഠിച്ച മുഹമ്മദിയന് സ്കൂളിനു സമീപത്തെ വിജനമായ റോഡരികിലാണ് മോഷ്ടിച്ച കാര് മുഹമ്മദ് ബിലാല് ഉപേക്ഷിച്ചത്. ഈ സ്ഥലം നേരത്തെ തന്നെ നോക്കിവച്ചിരുന്നു. കാര് ഉപേക്ഷിച്ച ശേഷം ബസിലും ലോറിയിലുമായി ഇയാള് കൊച്ചിയിലെത്തി. അവിടെ ഒരു ഹോട്ടലില് ജോലിയ്ക്ക് നിന്നു. ആര്ക്കും ഒരു സംശയവും തോന്നാത്ത രീതിയിലാണ് ഇടപ്പള്ളിയിലെ ഹോട്ടലില് ജോലിയ്ക്കു നിന്നത്. ഹോട്ടലിലെ സിസിടിവി ദൃശ്യങ്ങള് പൊലീസിനു ലഭിച്ചിട്ടുണ്ട്. അധികം സംസാരിക്കാത്ത സ്വഭാവക്കാരനാണ് മുഹമ്മദ് ബിലാല്. ഹോട്ടല് ജോലി കഴിഞ്ഞ് വീട്ടിലേക്ക് മടങ്ങിയെത്തിയ സമയത്താണ് പൊലീസ് ബിലാലിനെ പിടികൂടിയത്.
"
https://www.facebook.com/Malayalivartha