പാര്‍ട്ടിയോട് ഇടഞ്ഞു നില്‍ക്കുന്ന പ്രെഫ. കെ.വി തോമസിനെ അനുനയിപ്പിക്കാന്‍ അദ്ദേഹത്തിന് എ.ഐ.സി.സിയുടെ നിര്‍ദേശപ്രകാരം പ്രത്യേക പദവി നല്‍കും. കെ.പി.സി.സിയും ജനങ്ങളും തമ്മിലുള്ള സമ്പര്‍ക്കത്തില്‍ ഹൈകമാന്റ് തൃപതിയില്ല. ഈ സാഹചര്യത്തില്‍ കൂടിയാണ് പബ്ലിക് റിലേഷനും മാധ്യമങ്ങലുടെയും ചുമതലയുള്ള പ്രത്യേക പദവി നല്‍കാന്‍ ഹൈകമാന്റ് തീരുമാനിച്ചത്. എന്നാല്‍ പദവി എന്തായിരിക്കുമെന്നതിനെ കുറിച്ച് തീരുമാനമായിട്ടില്ല.

ലോക്‌സഭാ തിരഞ്ഞെടുപ്പ് സമയത്ത് ഹൈബി ഈഡനുവേണ്ടി സീറ്റു വിട്ടു നല്‍കാന്‍ കെ.വി തോമസിന് താല്‍പര്യമുണ്ടായിരുന്നില്ല. എന്നാല്‍ പാര്‍ട്ടി സമ്മര്‍ദ്ദത്തിന് വഴങ്ങി സീറ്റു വിട്ടു നല്‍കുകയായിരുന്നു. അതിന് ശേഷം എറണാകുളം നിയോജക മണ്ഡലത്തിലേക്ക് നടന്ന ഉപതെരഞ്ഞെടുപ്പില്‍ മത്സരിക്കാന്‍ തയാറെടുത്തിരുന്നുവെങ്കിലും കോണ്‍ഗ്രസിന്റെ സംസ്ഥാന നേതൃത്വം ഇതിനെ മുളയിലെനുള്ളി. ഇതിനെ തുടര്‍ന്ന് കടുത്ത അതൃപ്തിയിലായിരുന്നു അദ്ദേഹം. തുടര്‍ന്ന് നരേന്ദ്രമോദിയെ അനുകൂലിക്കുന്ന രീതിയില്‍ പ്രസംഗം നടത്തിയത് ഇദ്ദേഹം ബി.ജെ.പിയിലേക്കാണെന്ന തരത്തില്‍ പോലും വാര്‍ത്തകള്‍ വന്നിരുന്നു. ഇതിനിടെ ഉമ്മന്‍ചാണ്ടിയും രമേശ് ചെന്നിത്തലയും ഉള്‍പ്പെടെയുള്ള മുതിര്‍ന്ന നേതാക്കള്‍ ഇടപ്പെട്ടു അദ്ദേഹത്തെ അനുനയിപ്പിച്ച് നിര്‍ത്തുകയായിരുന്നു.

കെ.പി.സി.സി ഭാരവാഹികളുടെ ജംബോ പട്ടികയില്‍ പോലും സ്ഥാനം ലഭിക്കാതിരുന്നതും അദ്ദേഹത്തെ ആസ്വസ്തനാക്കിയിരുന്നു. ഈ പട്ടികക്കെതിരെ എ.ഐ.സി.സിക്ക് പരാതി നല്‍കുകയും ചെയ്തു. ഈ സാഹചര്യത്തില്‍ കൂടിയാണ് അദ്ദേഹത്തിന് പുതിയ പദവി നല്‍കി പാര്‍ട്ടിക്കൊപ്പം കൂട്ടുന്നത്. തദ്ദേശ സ്വയം ഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് അടുക്കുന്ന സാഹചര്യത്തില്‍ പാര്‍ട്ടിക്കുള്ളിലെ അപസ്വരങ്ങള്‍ പരമാവധി കുറക്കുന്നതിന്റെ ഭാഗമാണിത്.