മനസില് ലഡു പൊട്ടുമ്പോള്... ലോക് ഡൗണ് സമയത്ത് കേരളത്തിന് പുറത്ത് കടക്കണമെങ്കില് കടമ്പകളേറെ; ആപ്പില് രജിസ്റ്റര് ചെയ്യണം ക്വാറന്റൈന് വേണം; ഇതെല്ലാം കാറ്റില് പായിച്ച് സ്വപ്നയും സന്ദീപും ബെംഗലുരൂവില് വിലസുമ്പോള് ചോദ്യം പല വഴിക്ക്; നമ്മുടെ സഹായമില്ലാതെ കേന്ദ്രം ഇവരെ പിടികൂടുന്നത് കാണട്ടെയെന്ന് ഊറിച്ചിരിച്ചവരുടെ ചിരി മാഞ്ഞ വഴി ഇങ്ങനെ
ഒരു സ്വര്ണക്കടത്ത് കേസിന് രാഷ്ട്രീയ മാനം വന്നത് സ്വപ്ന സുരേഷ് രംഗപ്രവേശനം ചെയ്തതോടെയാണ്. കേരളത്തിലെ പ്രബല രാഷ്ട്രീയ പാര്ട്ടികള് ഇരുചേരിയിലായി അങ്കം തുടങ്ങുന്നതിനിടേയാണ് സ്വപ്ന മുങ്ങിയത്. കേന്ദ്രം അന്വേഷിക്കട്ടെയെന്ന് സംസ്ഥാനം ലെറ്ററെഴുതി തീരുമാനിച്ചപ്പോള് കുറ്റപ്പെടുത്തലുമായി പ്രതിപക്ഷവും രംഗത്തെത്തി. അതിനിടെ കസ്റ്റംസ് അന്വേഷണം കൊഴുപ്പിക്കുകയും ചെയ്തു. എന്നാല് കസ്റ്റംസ് പഠിച്ച പണി പതിനെട്ടും നോക്കിയിട്ടും സ്വപ്നയേയും സന്ദീപിനേയും മാത്രം കിട്ടിയില്ല. കസ്റ്റംസാകട്ടെ കേരള പോലീസിന്റെ സഹായം തേടിയതുമില്ല. സ്വപ്നയെ കണ്ടെത്താനാകാതെ ഒരാഴ്ചയായപ്പോള് നമ്മുടെ സഹായമില്ലാതെ സ്വപ്നയെ പൊക്കുന്നത് കാണട്ടെയെന്ന ഊറിച്ചിരികളും വന്നു. എന്നാല് എന്ഐഎ കേസ് ഏറ്റെടുത്തതോടെ അതിലും വലിയ കളികളാണ് കളിച്ചത്. ഊറിച്ചിരിച്ചവരുടെ ചിരി മായിപ്പിച്ച് 24 മണിക്കൂറിനുള്ളില് അവരെ അറസ്റ്റു ചെയ്തു.
സംസ്ഥാനത്തെ പിടിച്ചുകുലുക്കിയ സ്വര്ണക്കള്ളക്കടത്തു കേസില് ഉള്പ്പെട്ടവര് തെളിവുകള് നശിപ്പിക്കും മുന്പു തന്നെ അതിവേഗം നീങ്ങാന് എന്ഐഎ തീരുമാനിച്ചപ്പോള് അവര് കുരുക്കിലായി.
അന്വേഷണ ഉദ്യോഗസ്ഥനായ ഡിവൈഎസ്പി രാധാകൃഷ്ണപിള്ള കളിയിക്കാവിള വെടിവയ്പു കേസിന്റെ കുറ്റപത്രം സമര്പ്പിക്കാന് ചെന്നൈയില് പോയിരിക്കെയാണ് ബെംഗളൂരുവില് പ്രതികള് അറസ്റ്റിലായത്. ഒരു കൂടിയാലോചനയ്ക്കും കാത്തുനില്ക്കാതെ ചടുലമായി നീങ്ങാന് എന്ഐഎയ്ക്കു ഡല്ഹിയില് നിന്നു കിട്ടിയ നിര്ദേശത്തിന്റെ ഭാഗമായിരുന്നു ഇത്.
സ്വപ്നയപ്പറ്റി ഒരു തുമ്പും കിട്ടാതെ വന്നപ്പോള് അവസാനം കസ്റ്റംസ് ഇന്നലെ പോലീസിന്റെ സഹായം തേടിയിരുന്നു. ഇതിനെ തുടര്ന്ന് സ്വപ്നയെ പിടികൂടാന് കൊച്ചി സിറ്റി ഡെപ്യൂട്ടി പൊലിസ് കമ്മിഷണര് ജി. പൂങ്കുഴലിയുടെ നേതൃത്വത്തിലുള്ള സംഘത്തെ ഡിജിപി നിയമിച്ചതിനു തൊട്ടു പിന്നാലെയാണ് എന്ഐഎ പ്രതികളെ പിടിച്ചത്.ട്രിപ്പിള് ലോക്ഡൗണുള്ള തിരുവനന്തപുരം നഗരത്തില് നിന്ന് സ്വപ്നയും സംഘവും രക്ഷപെട്ടതെങ്ങനെ, അന്തര് സംസ്ഥാന യാത്രാ പാസ് സംഘടിപ്പിച്ചതെങ്ങനെ എന്നീ ചോദ്യങ്ങള് ഉയരുന്നുണ്ട്. മാത്രമല്ല കര്ണാടകയും ആപ്പില് രജിസ്റ്റര് ചെയ്യുകയും ക്വാറന്റൈനും വേണം. പക്ഷെ ഇതൊന്നും സ്വപ്നയ്ക്ക് ബാധകമല്ല.
കൊച്ചിയിലുള്ള എന്ഐഎ സംഘത്തിന് അതിവേഗം മറ്റു ജില്ലകളിയേക്കു നേരിട്ട് എത്താന് കഴിയാത്തതിനാല് തല്ക്കാലം കസ്റ്റംസ് ഉദ്യോഗസ്ഥരുടെ സഹായവും തേടിയിട്ടുണ്ട്. ഇതിന്റെ ഭാഗമായാണ് ശിവശങ്കറിന്റെ ഫ്ളാറ്റില് കസ്റ്റംസ് പരിശോധന നടത്തിയത്. കഴിവതും വേഗം തെളിവുകള് പരമാവധി ശേഖരിക്കാനാണ് വെള്ളിയാഴ്ച കൊച്ചിയില് ചേര്ന്ന യോഗത്തില് എന്ഐഎ തീരുമാനമെടുത്തത്.
സ്വര്ണക്കള്ളക്കടത്തു കേസ് കേന്ദ്ര ഏജന്സിയായ കസ്റ്റംസില് നിന്ന് അതിവേഗം ഏറ്റെടുക്കാന് എന്ഐഎയ്ക്കു കഴിഞ്ഞു എന്നത് പ്രത്യേകതയാണ്. സ്വപ്ന ഹൈക്കോടതിയില് മുന്കൂര്ജാമ്യാപേക്ഷ നല്കിയതിനാല് വിധി വരുംവരെ എന്ഐഎ കാത്തിരിക്കുമെന്നായിരുന്നു പൊതുവിലയിരുത്തല്.
പ്രതികള് മുന്കൂര് ജാമ്യാപേക്ഷ നല്കിയാല് സംസ്ഥാന പൊലീസ് കോടതി വിധി വരെ അറസ്റ്റ് ഒഴിവാക്കി കാത്തിരിക്കാറാണു പതിവ്. എന്നാല് എന്ഐഎ ഈ കീഴ്വഴക്കവും മറികടന്നു. യുഎപിഎ അനുസരിച്ചു കേസെടുത്തതിനാല് പ്രതികള്ക്കു മുന്കൂര്ജാമ്യം നല്കാന് കോടതിക്കു കഴിയില്ലെന്ന് ഉറപ്പുള്ളതിനാലാണ് ഇങ്ങനെ ചെയ്തത്. ഈ ഹര്ജി ചൊവ്വാഴ്ചയാണ് കോടതിയില് ഇനി എത്തുക. പ്രതികള് അറസ്റ്റിലായെന്ന് അന്ന് കോടതിയെ അറിയിക്കും. ഇതോടെയാണ് ഊറിച്ചിരിച്ചവരുടെ ചിരി മായുന്നത്.
https://www.facebook.com/Malayalivartha
