ദുബായ് പണമുള്ളവരെ സംബന്ധിച്ച് സ്വപ്ന ഭൂമിയാണ്. ലോകത്ത് പല സ്ഥലത്തും കിട്ടാത്ത പല സുഖ സൗകര്യങ്ങളും ഇവിടെ ലഭ്യമാണ്. മറ്റുള്ളവരുടെ പരാതായില്ലാതെ എന്തും നടക്കും. പരാതിയുമായി ആരെങ്കിലും വന്നാല്‍ എന്താണ് സംഭവിക്കുമെന്ന് ആര്‍ക്കും അറിയില്ല. ഏത് കൊല കൊമ്പനായാലും അകത്താകും. അത്രയ്ക്ക് കടുപ്പമാണ് ഗള്‍ഫിലെ നിയമം. ഇത്രയുമധികം ജീവിത സൗകര്യമുള്ള സ്വപ്ന ഭൂമി വേറെയില്ല തന്നെ. അത്രയ്ക്കാണ് ദുബായിലെ ഹൈ ടെക് ജീവിതം. മലയാളികളുടെ കൊച്ച് കേരളം കൂടിയാണ് ദുബായ്. എവിടെ നോക്കിയാലും മലയാളികള്‍ തന്നെയാണ്. മലയാളി ഹോട്ടലുകളും അവയ്ക്ക് മലയാളം പേരുകളും സുലഭം. ഈ ദുബായ് സ്വപ്നങ്ങള്‍ നുകരാനുള്ള വേദിയായി കണ്ട് എത്തുന്നവര്‍ നിരവധിയാണ്. നാട്ടിലാകുമ്പോള്‍ വലിയ പാടാ. ഇവിടെയാകുമ്പോള്‍ കുഴപ്പമില്ലല്ലോ എന്നാണ് പലരുടേയും വയ്പ്പ്.

സ്വപ്നയുടെയും തട്ടകമാണ് ദുബായ്. ദീര്‍ഘകാലമായി സ്വപ്‌നയും കുടുംബവും യു.എ.ഇയിലായിരുന്നു. അവിടെ കോണ്‍സുലേറ്റുമായി ബന്ധപ്പെട്ടുള്ള പ്രവര്‍ത്തനങ്ങളില്‍ സ്വപ്‌നയുടെ പിതാവ് പങ്കാളിയായിരുന്നു. ഷേയ്ഖുമാരുമായി നല്ല അടുപ്പമായിരുന്നു. ആ ബന്ധമാണ് സ്വപ്നയെ കോണ്‍സുലേറ്റിലെത്തിച്ചത്. സ്വപ്‌നയുടെ ലോക്കറില്‍ നിന്ന് വന്‍ തുകയും സ്വര്‍ണവും കണ്ടെത്തിയ സംഭവത്തിലും ദുബായെ ബന്ധപ്പെടുത്തിയിരുന്നു. ഇവ വിവാഹത്തിന് ഷെയ്ഖ് സമ്മാനിച്ചതാണെന്നാണ് സ്വപ്‌നയുടെ അഭിഭാഷകന്‍ കോടതിയെ അറിയിച്ചത്. അതേസമയം ഈ സ്വര്‍ണത്തേയും പണത്തേയും പറ്റിയുള്ള അന്വേഷണത്തില്‍ മറ്റൊരു നിര്‍ണായക കണ്ടെത്തലാണ് എന്‍ഐഎ നടത്തിയിരിക്കുന്നത്.

സ്വപ്‌ന സുരേഷിന്റെ ബാങ്ക് ലോക്കറില്‍ നിന്ന് കണ്ടെത്തിയ ഒരുകോടി രൂപ, സംസ്ഥാന സര്‍ക്കാരിന്റെ ലൈഫ് മിഷന്‍ പദ്ധതിയിലെ കരാറിന് സ്വകാര്യ കമ്പനിക്ക് നല്‍കിയതിന്റെ കമ്മീഷനാണെന്നാണ് സ്വപ്നയുടെ പുതിയ നിലപാട്. ഇതിന്റെ വഴിയും ദുബായിലേക്കാണ് നീളുന്നത്. ഇതിലാണ് സ്വപ്ന സുരേഷും സര്‍ക്കാര്‍ മുന്‍ സെക്രട്ടറി ശിവശങ്കറും ഒന്നിച്ച് നടത്തിയ ദുബായ് യാത്രയും ചര്‍ച്ചയാകുന്നത്. കേരളത്തിലെ ഒരു സെക്രട്ടറി ഔദ്യോഗിക സംഘം യാത്ര ചെയ്യുന്നതിന് 4 ദിവസം മുമ്പേ എന്തിന് ഒന്നിച്ച് യാത്ര ചെയ്ത് ദുബായിലെത്തിയെന്ന സാമാന്യ ചോദ്യമാണ് ഉയരുന്നത്.

2018ല്‍ പ്രളയത്തിന് ശേഷം സഹായം തേടി ദുബായ് സന്ദര്‍ശനത്തിന് കേരളത്തിലെ ഔദ്യോഗിക സംഘം പോകുന്നതിന് 4 ദിവസം മുമ്പ് ശിവശങ്കറും സ്വപ്നയും ഒരേ വിമാനത്തില്‍ ദുബായിലേക്ക് തിരുവനന്തപുരത്ത് നിന്നു പോയെന്ന് അന്വേഷണ സംഘം നേരത്തെ കണ്ടെത്തിയിരുന്നു. ആ സന്ദര്‍ശനത്തില്‍ പല ഇടപാടുകളും നടന്നെന്നാണ് സംശയിക്കുന്നത്. അതിലാണ് യു.എ.ഇ റെഡ് ക്രെസന്റ് അതോറിറ്റി പ്രളയ സഹായത്തിനായി 20 കോടി രൂപയുടെ സഹായം വാഗ്ദാനം ചെയ്തത്. തുടര്‍ന്ന് കഴിഞ്ഞ വര്‍ഷം ജൂലൈ 11 ന് ഇതു സംബന്ധിച്ച കരാര്‍ ഒപ്പിട്ടു. സ്വപ്‌നയാണ് ഈ ചടങ്ങിന് മേല്‍നോട്ടം വഹിച്ചത്. ഈ സഹായം ഉപയോഗിച്ച് തൃശൂര്‍ വടക്കാഞ്ചേരിയിലാണ് സര്‍ക്കാരിന്റെ 2 ഏക്കര്‍ ഭൂമിയില്‍ 140 ഫ്‌ലാറ്റുകള്‍ നിര്‍മിക്കുന്നത്. ഇതിനു കരാര്‍ നല്‍കിയ കമ്പനി വാഗ്ദാനം ചെയ്ത ഒരുകോടി രൂപയാണ് ബാങ്കില്‍ നിന്നും കണ്ടെടുത്തതെന്നാണ് സ്വപ്ന കോടതിയെ അറിയിച്ചത്.

പ്രളയത്തില്‍ വീട് തകര്‍ന്ന പാവപ്പെട്ടവര്‍ക്ക് വീടുവയ്ക്കാനാണ് തുകയനുവദിച്ചത്. ആ പാവപ്പെട്ടവരില്‍ സ്വപ്ന സ്വന്തം പേരും കൂടി ചേര്‍ത്തു. സ്വന്തമായി വീടില്ലാത്ത തനിക്ക് കോണ്‍സല്‍ ജനറല്‍ തുക നല്‍കുകയായിരുന്നെന്നാണ് സ്വപ്ന പറയുന്നത്. അത്തരം കമ്മീഷന്‍ ഇടപാടുകള്‍ അനുവദനീയമാണെന്നും സ്വപ്‌ന അവകാശപ്പെടുന്നു. എങ്ങനെയുണ്ട്.

ഈ തുകയാണ് ശിവശങ്കറിന്റെ ചാര്‍ട്ടേഡ് അക്കൗണ്ടിന്റെയും സ്വപ്നയുടെയും പേരില്‍ എടുത്ത ബാങ്ക് ലോക്കറില്‍ നിന്ന് കണ്ടെത്തിയത്. ലോക്കറില്‍ കണ്ടെത്തിയ ഒരുകോടി രൂപയ്ക്കു പുറമേ, ബാങ്ക് അക്കൗണ്ടിലുണ്ടായിരുന്ന 56 ലക്ഷം രൂപയും കമ്മീഷന്‍ ഇനത്തില്‍ ലഭിച്ചതാണെന്നു സ്വപ്‌ന കോടതിയില്‍ ബോധിപ്പിച്ചു. എന്തായാലും സ്വപ്നയുടേയും ശിവശങ്കറിന്റേയും ദുബായ് യാത്രയുടെ കാണാപ്പുറങ്ങള്‍ ഉടന്‍ പുറത്താകും. അതിനായുള്ള അന്വേഷണ സംഘത്തിന്റെ യാത്ര തുടങ്ങിക്കഴിഞ്ഞു.